1 KORIN

Kawhhran Hnenih Paul Cakuat Pakhatnak

Thuhmaihruai

Korin khua Khristian hnenih Paul cakuat pakhatnak hi Paul in Korin khuaih a din suahmi Kawhhran sungah hnaihnawhnak le buainak a um ruangih a nganmi a si. Culai ah Korin khua cu Grik ramih khua tumzet pakhat a si ih Rom Acozah ih ukmi Akhaia peng khawpi a si. Pursum leilawnnak lamah le nunphung daan lam khalah a hmin a thangzet. Cule sualralnak le biaknak phun dangdang lam khalah a hmin a thangzet fawn.

Paul in a ngansan duh bikmi cu Kawhhran sungih a ummi ṭhenṭhek awknak le sualralnak, nupa sualnak, ṭhit-um awknak thubuai, raithawi sa ei le ei lo thu, Kawhhran kilkhawinak, Thlarau Thianghlim laksawng pawl le thawhsalnak thu pawl hi an si. Paul in a tlunih thubuai a ummi parah hin Thuthang ṭha in ziangtin a sim, ti kha hmuhnak thuukzet thawn a langter.

Korin cakuat bung hleithum ih a ummi, Pathian in a minung hnenih a pekmi laksawng thupi bik duhdawtnak hi hi cabu sungah cun mi tambik ih an theihmi a si.

Thutlangpi
Thu hramthoknak (1.1-9)
Kawhhran sungih ṭhenṭheknak (1.10-4.21)
Nupa sualnak le innsaang sung thu (5.1-7.40)
Khristian mi le khawvel mi (8.1-11.1)
Kawhhran nunnak le Pathian biaknak (11.2-14.40)
Khrih thawhsalnak le Khrih zumtu pawl (15.1-58)
Judea ram Khristian hrang thawhlawm (16.1-4)
Pumpak thucahnak le thunetnak (16.5-24)

1 Korin 1

1Khrih Jesuh ih a tirhthlah si dingah Pathian lungkimnak in kawhmi keimah Paul le kan unau Sosthenes in, 2Pathian mithiang si dingih kawhmi le Khrih Jesuh thawn nan pehzom awknak thawngin amah ih ta a si mi, Korin khuaih um Pathian Kawhhran le an Bawipa le kan Bawipa Jesuh Khrih a biatu hmunkipih a ummi hnenah ca kan lo kuat a si.

3Pathian kan Pa le Bawipa Jesuh Khrih in zaangfahnak le daihnak lo pe hram seh.

Khrih Sungih Thlawsuahnak

4Khrih Jesuh thawngin zaangfahnak cu nan hnenih pek a si zo ruangah ka Pathian cu ka thangṭhat ringring. 5Ziangah tile Khrih thawn nan pehzom awknak thawngin ziang hmuahhmuah ah tlamtling in pek nan si zo, thusim thiam le theihnak khalah nan famkim ih, 6Khrih thuhla kan phuanmi khal nan sungah a hngetkhoh zo ti a lang a si. 7A lang dingmi Jesuh Khrih kan Bawipa nan hngah laiah hin nan ngah hrih lomi thlarau lam laksawng pakhatte hman a um lo. 8A netnak tiang Amah in a lo kilkhawi hai ding ih cuticun kan Bawipa Jesuh Khrih ih Ni ah mawh nei lo nan si ding. 9A Fapa Jesuh Khrih kan Bawipa thawn pawlkomnak nei dingah a lo kotu Pathian cu rinsantlak a si.

Kawhhran Sungih Ṭhenṭheknak

10Ka u le ka nau tla, nan lakih ṭhenṭheknak a um lonak dingah nan thinlung rual awtein um hram uh tiah kan Bawipa Jesuh Khrih hmin in ka lo dil a si. Rualrem zetin, thinlung khat le tumtahnak bangrep in um uh. 11Ka u le ka nau tla, nan lakah tawh awknak a um ringring ti kha Khlawi ih sungkhat pawl in fiangtein in sim. 12Ka sim duhmi cu, mi hrekkhat in, “Kannih cu Paul ih lamṭang kan si,” nan ti; mi hrekkhat in, “Kannih cu Apollos ih lamṭang kan si,” nan ti; mi hrekkhat in, “Kannih cu Piter ih lamṭang kan si,” nan ti ih mi hrekkhat in, “Kannih cu Khrih ih lamṭang kan si,” tiah dangdang ciarih nan timi hi a si. 13Khrih cu a ṭhenṭhek awmi a si maw? Nan hrangah thinglamtah parih an thahmi cu Paul maw a si? Paul hmin in maw baptisma nan lak? 14Nanmah lakah Khrispas le Kaias siarlo zohman baptisma ka pek hai lo ruangah Pathian ka lawm. 15Curuangah zohman in, “Kei cu Paul hmin in baptisma ka la,” nan ti thei lo ding. 16(Asi, Stefanas le a innsaang baptisma ka pe ngai; midang ka pek cu ka thei lo.) 17Khrih in midang baptisma pe dingah i thlah lo, Thuthang ṭha sim dingah i thlah ih cutiih ka sim tikah milai fimnak ṭongkam hmang in a si lo; ziangah tile leilung fimnak ṭongkam hmang tahratin ka sim ahcun Khrih thinglamtah parih a thihnak hi hmual a nei lo pang ding.

Pathian Ih Huham Le Fimnak

18Thinglamtah parih Khrih thihnak thu hi a hloral cuahcomi pawl hrangah cun aat-hna meen a si; sikhalsehla rundam lai reromi kannih hrangah cun Pathian ih cahnak hmual a si. 19Ca Thianghlim in,

20Curuangah mifim pawl khuiah so an um? Mithiam pawl khuiah so an um? Leilung tlun thu-el thiam pawl khuilamah so an si? Leilung tlunih fimnak hi aat-hna a si, ti kha Pathian in a langter zo a si lo maw? *

21Minung in anmah ih fimnak in Pathian an theih thei lonak dingah amah Pathian in a fimnak in a rak tuah cia zo a si. Sikhalsehla kan phuan mi “aat-thu,” an timi Thuthang ṭha hi hmang tahratin a zumtu pawl rundam dingah Pathian ih tuahmi a si. 22Judah mi pawl in a dik le dik lo theih theinak dingah hmuhsaknak mak hmuh an duh; Grik mi pawl cun fimnak sawn in an hawl. 23Asinain kannih cun thinglamtah i an khenmi Khrih kan phuang ih cuih thu cu Judah mi pawl hrangah riilhbah-nak a si ih Grik mi hrangah cun aat-hna a si. 24Sikhalsehla Pathian ih a kawh ciami pawl hrangah cun Judah mi siseh Zentail mi khal sisehla, cuti kan phuan mi cu Khrih a si ih Khrih cu Pathian cahnak le Pathian fimnak a si. 25Ziangah tile Pathian aatnak cu minung ih fimnak hnakin a fim sawn; cule Pathian ih ṭonṭaihnak cu minung ih cahnak hnakin a cak sawn.

26Ka u le ka nau tla, Pathian in a lo kawh laiah khan ziang bangtuk minung nan rak si kha ciing ringring uh. Milai mit ih kan zoh ahcun mifim le thuneitu le hmaizah tlak cu mi malte ngaingai nan si. 27Sikhalsehla mifim pawl ningzahter dingah leilungih mi-aa timi kha Pathian in a hriil hrim a si; micak le thiltithei pawl ningzahter dingah leilungih mi ṭawnṭai timi kha Pathian in a hriil hrim a si. 28Leilung mi in thupizet ih an ruahmi kha siatsuah dingah an hmuhsuammi, an nautatmi le zianghman ih an siar lomi kha Pathian in a hriil hrim a si. 29Cuti a si ruangah Pathian hmaiah cun zohman an uang aw thei lo ding. 30Khrih Jesuh thawn pehzom aw ih nan nunnak ahhin a hram a thoktu cu Amah Pathian a si ih Amah hnen ihsin Khrih cu kanmah ih fimnak ah a tuah a si. Khrih thawngin kannih cu Pathian thawn kan rem aw zo; Pathian ih mithiang ah kan cang zo ih a luatmi kan si zo. 31Curuangah Ca Thianghlim in,

⇑

[Remove Footnotes]