1 JOHAN

Cakuat Pakhatnak

Thuhmaihruai

Johan cakuat pakhatnak hin hmuitin mi pahnih a nei. Pakhatnak cu ca siartu pawl kha Pathian le a Fapa Jesuh Khrih thawn pawlkomnak nei ih an nunnak dingah a forh. A pahnihnak cu cuih pawlkom awknak a siatter theitu zirhnak dik lo pawl a um ruangah ralrinnak a sim.

Cuih zirhnak dik lomi cu ziang a si tile: hi leitlunih ṭhat lonak hi leilung thawn peh-kaihawk ruangih a ra thlengmi a si; curuangah Pathian Fapa Jesuh Khrih cu leilung thawn pehkaih awknak ngaingai a nei lo, minung bangin taksa ngaingai a nei lo a si, tiin an zirh. Rundamnak timi cu hi leilung nunnak thuhla helhkamnak kan neihmi ihsin luat khi a si, an ti. Rundamnak timi cu ṭhat le ṭhat lo ruangah a si lo; midang duhdawt le duhdawt lo ruang khalah a si cuang lo, an ti.

Hi bangtuk thuzirhnak kalhkih in ca ngantu pa hin Jesuh Khrih cu milai taktak a si ih Jesuh a zumtu le Pathian a duhdawtu cun pakhat le pakhat an duhdaw aw ding a si, tihi thupi zetin a sim.

Thutlangpi
Thu hramthawhnak (1:1-4)
Tleunak le thimnak (1:5-2:29)
Pathian fa le Satan fa (3:1-24)
Thutak le thutak lo (4:1-6)
Duhdawtnak ih ṭuanvo (4:7-21)
Nehtu a si mi rinnak (5:1-21)

1 Johan 1

Nunnak Thu

1A hramthok ihsin a rak um ciami nunnak ih Thu nan hnenah ca in kan ngan. Cumi cu kan hna in kan theihmi le kan mit in kan hmuhmi a si. Kan mit rori in kan rak hmuh ih kan kut rori in kan rak thammi a si. 2Hi nunnak cu hmuh theihmi ih a rung can tikah kannih in kan hmu a si. Curuangah cuih Thu cu nan hnenah kan rel ih Pa thawn a ummi kumkhua nunnak, kan hnenih theihter a si mi Thu kha nan hnenah kan sim a si. 3Pa le a fapa Jesuh Khrih thawn pawlkomnak kan neihmi sungih nan tel venak dingah kan hmuhmi le kan theihmi cu nan hnenah kan phuang a si. 4Kan lungawinak * kim seh tiah hi ca hi nan hnenah kan ngan a si.

Pathian Cu Tleunak A Si

5A Fapa hnen ihsin kan theihmi thu le nan hnenih kan phuanmi cu himi hi a si: Pathian cu tleunak a si ih a sungah thimnak zianghman a um lo. 6Curuangah amah thawn pawlkomnak kan nei kan ti nain thimnak sungih kan um a si ahcun kan ṭong in siseh, kan ṭuannak in siseh, thuphan kan per a si. 7Sikhalsehla amah cu tleunak sungih a um vekin kannih khal tleunak sungih kan um ahcun pakhat le pakhat pawlkom awknak kan nei ih a Fapa Jesuh ih thisen in kan sualnak hmuahhmuah a tlengfai a si.

8Sualnak kan nei lo kan ti ahcun kanmah le kanmah kan bum aw ih kan sungah thutak a um lo. 9Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam ding ih kan mawhnak hmuahhmuah a thiangfaiter ding. 10Asinain sualnak kan tuah lo kan ti ahcun Pathian cu thuphanper ah kan canter ih a thu kan sungah a um lo a si.

⇑

[Remove Footnotes]