1 PITER

Cakuat Pakhatnak

Thuhmaihruai

Piter cakuat a pakhatnak hi Asia Minor saklam ram hmunkipah a ṭeekdarhmi, “Pathian hriilmi pawl,” tiih a kawhmi pawl hnenih kuatmi ca a si. Hi cakuat ih a tumtah bikmi cu an zumnak ruangah hremnak le harnak a tuartu pawl thapeknak dingah a si. Ca ngantu in himi thu a sim tikah Jesuh Khrih ih thihnak, thawhsalnak le a tiam ciami a ratsalnak ding Thuthang ṭha thu tla in ruahsannak a neihternak thu a sim. Curuangah hi bangtuk harsatnak pawl tla cu an zumnak kha a ngaingai a si maw, ti hniksaknak a si ti thei in Jesuh Khrih a lang Ni ah ṭuanman an co ding thu ruahsannak an ṭul zia khal a sim.

ṭ Harsatnak caanih thapeknak lawng si loin ca ngantu pa hin Khrih ta an sinak langter dingin an nun theinak dingah a forh fawn.

Thutlangpi
Thu hramthawhnak (1.1-2)
Pathian rundamnak thu a sim sal (1.3-12)
Nun thianghlim nei ding forhnak (1.13-2.10)
Harsat tuar laiih Khristian pawl ṭuanvo (2.11-4.19)
Khristian pawlih tangdornak le ṭuannak (5.1-11)
Thunetnak (5.12-14)

1 Piter 1

1Jesuh Khrih tirhthlah a si mi keimah Piter in Pontus, Galatia, Kappadosia, Asia le Bithinia * pengih raltlaan bangin a ṭhekdarh awmi, Pathian ih hriilmi pawl, nan hnenah ca ka lo kuat.

2Jesuh Khrih ih thu nan thlunnak dingah le amah ih thisen ih thiantermi nan sinak dingah nannih cu kan Pa Pathian tumtahnak bangtuk in hriilmi le amah ih Thlarau in mi thianghlim ih tuahmi nan si.

Pathian zaangfahnak le daihnak cu nan hnenah tlamtlingte in um hramseh.

A Nungmi Ruahsannak

3Kan Bawipa Jesuh Khrih ih Pa le a Pathian cu thangṭhat uhsi. In zaangfahnak a tum ruangah Jesuh Khrih cu thihnak in a thoter ih nunnak thar in pe zo. Cu ruangah a nungmi ruahsannak in kan khat ih, 4Pathian in a minung pawl hrangih a retmi ro cu co dingah hngakhlap in kan um. Cuih ro cu nan hrangah vancungah a lo ret sak ih a siat thei lomi, zohmanih ruk thei lomi le a ziam thei lomi an si. 5Ni neta bikih langter dingah atuih ret ciami rundamnak cu zumnak thawngin Pathian huham ih kilvenmi nanmah ih co ding ro a si.

6Curuangah nan lungawi uh! Harsatnak a phunphun nan tonmi ruangah caan tawite sung riahsia in um hman uhla lungawi in um thotho uh! 7Ziangah tile hi harsatnak nan tuarmi cu nan zumnak a ngai maw ngai lo ti theihnak dingah a si. A siat theimi sui hman meisa in hniksak a si ṭheu. Cu bangtuk in sui hnakih a sunglawi sawnmi nan zumnak cu harsatnak a tuar suak theitu si dingah hniksak a ṭul ve a si. Cule Jesuh Khrih a lang Ni ah thangṭhatnak le sunlawinak le upatnak nan ngah ding a si. 8Amah nan hmu dah lo nain nan duhdawt; nan hmu lo nain nan zum. Curuangah kaa ih sim thei lomi, a maksakmi le a sunglawimi lungawinak nan nei. 9Ziangah tile Jesuh Khrih sungih nan zumnak in tumtahnak nan neihmi nan thlarau rundamnak cu nan co ngah a si.

10Hi rundamnak thu hi profet pawl in an hawlmi le an zingzoimi a rak si; Pathian in a lo pek dingmi hi zaangfahnak laksawng thuhla hi profet pawl in an rak sim sung ciami a si. 11Ziang tikah so cuih caan cu a ra thlen ding * tiah hawl suak an rak tummi a si. An sungih a ummi Khrih ih Thlarau in Khrih ih a tuar dingmi harsatnak le cuih hnu ih a co dingmi sunlawinak thu a rak sim cia tikah atuih caan hi a sawhmi caan cu a si. 12Profet pawl an hnaṭuannak cu anmah ih ṭhathnemnak hrangah si loin nanmah ih ṭhatnak hrangah a si sawn ti kha Pathian in an hnenah a langter. Cutiin profet pawlih an rak simmi cu atu-ah vancung ihsin run thlah a si mi Thlarau Thianghlim ih cahnak thawngin Thuthang ṭha a phuangtu palai pawl hnen ihsin nan theihmi hi a si. Hi thu hi vancungmi hmanin theih an duhmi thu a si.

Thianghlim In Nun Ding A Si

13Curuangah hnaṭuan thok dingah nan thinlung timtuah ciain um uh. Tiar ciain um uhla Jesuh Khrih a lang tikah nan ngah dingmi zaangfahnak parah nan ruahsannak zatein bun uh. 14Pathian duhnak thlun uhla nan aat lai caanih nan rak neihmi tisa duhnakih nan nunnak in lo uk nawn hlah haiseh. 15A lo ko tu Pathian cu Pathian thianghlim a si bangtuk in nitin nan nunnak ah thianghlim in nung ve uh. 16Ca Thianghlim sungah, “Keimah ka thianhlim ruangah nannih khal thianghlim ve uh,” * tiin a um.

17Pathian hnenih thla nan cam tikah kan Pa tiin nan ko. Cuih nan Pa cu mi hmuahhmuah thleidannak nei loin anmah an hnaṭuannak bangtuk ciarin thu a ṭhentu a si. Cuti a si ruangah hi leilung tlun nan nun sungah hin amah ṭihzahnak thawn amah ih hrangah nung uh. 18Nan pu le nan pa ih an lo roh tami zianghman hlawknak um lo nan nundaan ihsin a lo tlensuaktu cu ziang a si ti nan thei ko. A siat theimi sui le ngun bangtuk a si lo. 19A lo luattertu cu a sunglawimi Khrih thisen a si ih Khrih cu soiselnak um lo raitluan tuufa bangtuk a si. 20Amah cu leilung seem hlanah Pathian ih hriil ciami a si zo ih atu nanmah ih hrangah neta bik caanah hin Pathian in a langtermi a si. 21Thihnak ihsin a thawhtertu le sunlawinak a petu Pathian kha Amah thawngin nan zum. Cuti cun nan zumnak le nan ruahsannak cu Pathian parih bunmi an si.

22Atu-ah thutak nan thlunnak ruangin thianfaitermi nan si zo ih zumtu unau dang pawl tla nan thinlung taktein nan duhdawt. Curuangah nan thinlung zatein pakhat le pakhat duhdaw aw uh. 23A nungmi le kumkhua in a hmunmi Pathian ih ṭongkam thawngin hrintharmi nan si zo; a thi theimi nu le pa-ih faate nan si nawn lo, a thi thei lomi ih faate nan si zo. 24Ca Thianghlim in,

25Sikhalsehla Bawipa ih thu cu
⇑

[Remove Footnotes]