1 THESALON

Kawhhran Hnenih Paul Cakuat Pakhatnak

Thuhmaihruai

Thesalonika khua cu Rom Acozah ukmi Masidonia pengah khawpi a si.

Filipi a fehsan hnuah hi khua ah Paul in Kawhhran a din. Asinain rei lote-ah Paul cu dodaltu a nei. Miphun dang Judah biaknak lamih thinlung a hoi deuh pawl hnenah Paul in Khristian Thuthang ṭha a phuang ih a hlawhtlinmi kha Judah mi pawl in an iksiik. Curuangah Paul cu hranhram in Thesalonika khua ihsin Berea ah an fehter. Korin khua a thlen hnuah Paul in Thesalonika khuaih Kawhhran thuhla kha a hnaṭuanpi Timote hnen ihsin a thei.

Paul in Thesalon Kawhhran hnenih ca a voikhatnak a kuatmi hi cuih

Khristian pawl thapeknak ah le beidong loin an hnget theinak dingih a

nganmi a si. Zumnak le duhdawtnak an neih thuhla a theih tikah an

parah lungawi thu a sim. An hnen a rak um lai ih a nunzia vun mang sal dingin a theihter hai. Cule Khrih ratsalnak ding thu thawn peh aw in thusuhnak a ummi pawl kha a let. Ziangtikah so Khrih a rat sal ding? Khrih a ratsal hlanih a thimi zumtu pawl hi a ratsal tikih kumkhua nunnak sungah covo an nei ve ding maw? ti thusuhnak pawl hi let dingih a zuammi pawl an si. Paul ih a forh duh bikmi cu: Khrih cu a ra sal ding, a sinain cumi in nan hnaṭuan lo pelhter hlah seh, tihi a si.

Thutlangpi
Thu hramthoknak (1.1)
An hnenih lungawi thu le porhnak thu (1.2-3.13)
Khristian nuncan daan hrangih forhnak (4.1-12)
Khrih ratsalnak thu zirhnak (4.13-5.11)
A neta bik forhnak (5.12-22)
Thunetnak le cibai buknak (5.23-28)

1 Thesalon 1

1Paul, Silas le Timote in, Thesalonika khuaih a ummi Kawhhran,

Pathian kan Pa le Bawipa Jesuh Khrih ih ta a si mi, nan hnenah ca kan

lo kuat.

Pathian zaangfahnak le daihnak cu nan hnenah um hramseh.

Thesalon Khristian Pawl Nunnak Le Zumnak

2Nanmah ih ruangah Pathian cat loin kan thangṭhat ih kan thlacamnak in kan lo ciing ringring a si.

3Ziangtin tile nan zumnak cu nitin nan nuncan daanih a langnak thu, duhdawtnak nan neih ruangah nasa zetih hna nan ṭuannak thu le kan Bawipa Jesuh Khrih sungih ruahsannak nan neihmi a hnget daan pawl thu thlacamnak in kan Pa Pathian hnenah kan sim ringring.

4U le nau pawl, Pathian in a lo duhdawt ih amah ih minung si dingah a lo hriil, ti kan thei a si.

5Ziangah tile Thuthang ṭha nan hnen kan thlenpi tikah ṭongkam

meen lawng si loin cahnak huham le Thlarau Thianghlim le thutak a sinak theihfelnak thawn kan thlenpi a si. Nan hnenih kan um sungah ziangbangtuk in kan um kan tlang a si, ti cu nan thei; nanmah ih ṭhatnak hrangah a si.

6Kan nundaan le kan Bawipa nundaan nan cawng ih harsatnak tampi nan tong nain Jesuh Khrih ih thu cu Thlarau Thianghlim hnen ihsin a rami lungawinak thawn nan pom a si.

7Curuangah nanmah cu Masidonia le Akhaia * pengih a ummi zumtu Khristian pawl hrangah zohṭhim tlakmi nan si.

8Ziangah tile Bawipa ih thu cu nanmah ih hnen ihsin Masidonia le Akhaia peng khuazakip ah a thlen lawng si loin Pathian nan zumnak thu cu khuaza ramkipah a thang a si. Kanmah ih sim rero hman a ṭul lo.

9Nan zumnak thuhla a rak theitu pawl hmuahhmuah in kan lo tlawn

laiih in rak cohlan zia, milem pawl nan tlansan ih Pathian nan pan zia, a dikmi le a nungmi Pathian rian dingih nan pan zia tla an sim ih,

10vancung ihsin a Fapa a ratnak ding nan hngahnak khal an sim a

si. A Fapa Jesuh cu thihnak ihsin a thawhtermi le a ra dingmi

Pathian thinhengnak ihsin in runsuaktu a si.

⇑

[Remove Footnotes]