2 KORIN

Khristian Hnenih Paul Cakuat Pahnihnak

Thuhmaihruai

Korin khua Khristian pawl hnenih Paul cakuat a pahnihnak hi Paul le Korin khua Kawhhran karlakih pehtlaih awknak a harsat laifangih nganmi cakuat a si. Kawhhran sung ihsin mi ṭhenkhat in nasa zetin Paul kha an engtai nain an rem awk sal thei ding a duhzia a langter ih an rem awk sal thei tikah a lungawizia khal a sim.

A cakuat hramthoknak lamah Paul in Korin Kawhhran pawl thawn an pehzom awknak thu kha a sim ih ziang ruangah an hmuhsuam tikah nasa zetin a kawk leh ve hai ti thu kha a simfiang. Cumi cun sir awknak le rem awk salnak a suahpi ih cumi ruangih a lungawinak thu khal a sim. Cuih hnuah Judea ram Khristian pawl hrangih thinlung tak thawn an bom venak dingah Kawhhran hnenah zaangfah a dil. A neta bikah Korin Kawhhran sung ummi mi malte in anmah sawn kha tirhthlah dik ah re aw-in Paul kha a deu a si, tiah an timi kha a el ih tirhthlah taktak a sinak kha a langter.

Thutlangpi
Thu Hramthawhnak (1.1-11)
Paul le Korin Kawhhran (1.12-7.16)
Judea ram Khristian pawl hrang thil pekmi (8.1-9.15)
Paul in tirhthlah a si zia a ṭannak (10.1-13.10)
Thunetnak (13.11-13)

2 Korin 1

1Pathian lungkimnak in hriilmi Khrih Jesuh ih tirhthlah keimah Paul le kan unau Timote in Korin khuaih a ummi Pathian Kawhhran le Akhaia peng khuazakipih a ummi mithianghlim hmuahhmuah nan hnenah ca kan lo kuat. 2Kan Pa Pathian le Bawipa Jesuh Khrih ih zaangfahnak le daihnak cu nan tlunah um hramseh.

Pathian Hnenah Lungawi Thu A Sim

3Kan Bawipa Jesuh Khrih ih Pa le a Pathian, mi zaangfahtu kan Pa, ziangtinkim ah bomnak in petu Pathian cu lawm uhsi! 4Harsatnak a phunphun lakah in bawmtu cu Amah a si; cutiin Pathian hnen ihsin kan comi bomnak cu hmang tahratin harsat mangbangnak a phunphun a tongtu pawl kha kan bawm thei ve a si. 5Ziangtin tile Khrih tuarnak a phunphun sungih a teltu kan si vekin Pathian ih bomnak sung khalah Khrih thawngin kan tel ve. 6Harnak kan tonmi cu nanmah ih hnemnak ding le rundamnak hrangah a si. Kannih bomnak kan ngah a si ahcun harsatnak kan tuarmi kha thinsaunak thawn nannih tla nan tuar thei venak dingah bomnak le thazaang a ngahtu nan si ve. 7Cuti a si hrangah nan parih ruahsannak kan neihmi cu a cem dah lo. Ziangah tile kan tuarnak in ṭawmpi vekin hnemnak kan comi khalah in ṭawmpi ve, ti kan thei.

8U le nau pawl, Asia ramih harnak kan tuarmi lo theihter kan duh. Kan parih suanmi thilrit cu a tum ngaingai ih tlunah a rit zet fawn ih nung ding hmanah kan ruat aw nawn lo. 9Thi dingih thurel ciami kan si, tiin kan ruat aw. Sikhalsehla hi bangtuk ih thu a rak um cu kanmah le kanmah rinsan aw loin thihnak ihsin mi a thoter saaltu Pathian kan rinsannak dingah a rak si sawn. 10Cubangtuk ṭihnungza thihnak sung ihsin Pathian in in runsuak ih hmailam khalah in runsuak ko ding. Thlacamnak in in rak bom ruangah, 11in runsuak sal ko ding, tiah Pathian parah rinsannak kan nei. Cuticun kan hrangih nan thlacamnak pawl cu Pathian in a thei ding ih Amah in in thlawsuah ding. Cule kan ai-ah mi tampi in Pathian hnenah lungawi thu an sim ding.

Paul In A Fehnak Ding A Ṭhin

12Kan hmaihngalmi pakhat a um; cumicu ziang a si tile: hi leikhawvel ih kan nundaan le a hleice in nanmah thawn kan pehzom awknak ah hin minung fimnakih ukmi si loin Pathian zaangfahnak huham in in uk ih, Amah Pathian ih in pekmi ṭong lailan * le thinlung taktein kan nunzia kha kan thinlung siaṭha thleidan thiamnak in in theihpimi hi a si. 13Nan hnenih ca ka ngan tikah hin nan siar theimi le nan theih theimi lawnglawng kan ngan. Atu-ah cun in theihnak hi a ṭhen a hrek lawng a si; sikhalsehla famkim zetin in thei leh ding tiah beiseinak ka nei; 14cuticun Bawipa Jesuh ih Ni ah kanmah hi nan hmaihngalnak kan si ding ih nannih khal kan hmaihngalnak nan si ve leh ding.

15Hi thu hi fiangzet ih ka theih ruangah voihnih thlawsuahnak co haiseh tiah a hmaisa-ah cun nanmah ra tlawng dingin ka tum lawk a si. 16Ka tumnak ah cun Masidonia ka tlawn zawng ah ka lo pal phah ding ih ka kir lam tla-ah ka lo pal phah ding tiah ka tum; Judea peng ka vung thlen theinak dingah bomnak tla in pe thei ding, tiah ka ruahmi a si. 17Hitiih timtuahnak ka neih tikah hin nan hnenah thinlung reprai lo minung ka bang maw? Ka khualtlawnnak ding ka tawlrel tikah mahih zawn lawng ruat tahratin, “Asi, a si,” ti hnu ih “Silo, si lo,” tiah thu a thleng leuhleuhtu ka si maw? 18Pathian cu thudik phuangtu a si bangtuk in nan hnenih ka thukammi cu “Asi,” tile “Silo,” ti a ceemcih lo. 19Ziangah tile nan hnenah, Silas, Timote, le keimah in kan phuanmi Pathian ih Fapa Jesuh Khrih cu “Asi,” tile “Silo,” ti a ceemcihtu a si lo. Pathian ih “Asi,” tiih lungkimmi fapa a si. 20Ziangah tile Jesuh Khrih cu Pathian thukammi hmuahhmuah hnenah “Asi,” timi hi a si. Curuangah Jesuh Khrih thawngin Pathian sunloihnak ah “Amen,” tiih kan ti ṭheunak cu a si. 21Kanmah siseh, nanmah siseh, hmun khatah Khrih thawn pumkhat kan si, ti in theih fiangtertu cu Pathian Amah a si. Pathian in Amah ih bulta si dingah in thiadang zo. 22Amah ih bulta kan sinak cu kan parah hminsinnak a ret zo ih kan hrangih ret ciain a ummi hmuahhmuah kan ngah ding ti aamahkhannak ah kan thinlung ah Thlarau Thianghlim in pe zo.

23Hi thu theitu-ah Pathian ih hmin ka saal: ka thinlung theitu Amah a si. Korin khua ra lo dingih ka ruatcatnak cu nanmah ih zawnruah ruangah a si. 24Nan zumnak thu-ah hihi zum uh, hihi zum hlah uh tiin thuneih kan tum lo. Nan zumnak ah cun nan hngetzet ti kan thei. Curuangah nan lungawi thanuamnak hrangah nanmah thawn hnaṭuan tlang ih kan umnak a si.

⇑

[Remove Footnotes]