2 THESALON

Kawhhran Hnenih Paul Cakuat Pahnihnak

Thuhmaihruai

Jesuh Khrih ratsalnak an hngahnak thu-ah thubuai a um ih cuih thu-ah Thesalon Kawhhran sungah hnaihnawhnak a um lai thotho. A voihnihnak Paul ih cakuatmi hi Bawi Jesuh Khrih ratsalnak ni a thleng zo a titu pawlih zumnak a elnak ca a si. Hi zumnak cu a dik lo a si, a ti. Bawi Khrih rat hlanah siatnak le ṭhat lonak hi a dengkor tiang a thleng pei ih Bawi Khrih dodaltu, “Mi Sualral pa,” timi ih hruainak in a si ding, tiah a ngan.

Paul in thupi bikih a sim duhmi cu harnak le tuarnak nasazet a thlen khal le nan zumnak ah fektein ding uh. Cun nan nuncan khawsaknak ah keimah le ka rualpi kha in zohṭhim uh. Kanmah ih hnaṭuan bangtuk in nannih khal ṭuan ve uh, tiah a ngan.

Thutlangpi
Thu hramthawhnak (1.1-2)
Thangṭhatnak le porhnak (1.3-12)
Khrih ratsal thu zirhnak (2.1-17)
Khristian nundaan zirhnak (3.1-15)
Thunetnak le cibai buknak (3.16-18)

2 Thesalon 1

1Paul, Silas * le Timote in Thesalonika khuaih a ummi Kawhhran, Pathian kan Pa le Bawipa Jesuh Khrih ta a si mi, nan hnenah ca kan lo kuat.

2Pathian kan Pa le Bawipa Jesuh Khrih in zaangfahnak le daihnak lo pe hramseh.

Khrih A Ratsal Tikih Thuṭhennak

3Ka u le ka nau tla, nanmah ih ruangah Pathian hnenah kan lung a awizet. Cutiih Pathian kan thangṭhat cu a dikmi a si, ziangah tile nan zumnak a ṭhangzet ih pakhat le pakhat nan duhdawt awknak khal a ṭhang vivo a si. 4Curuangah Pathian Kawhhran pawl hnenah nanmah ih thu-ah kan porh-aw ih harsatnak le hremnak nan tong nacingin tuartheinak le zumnak nan neih thei ruangah kan hmai a hngalzet a si.

5Himi hin Pathian thuṭhennak cu a dik a si ti a langter ih Pathian uknak ruangih a tuarmi nan si ruangah Pathian uknak thawn a tlak awmi nan si. 6Pathian in a dikmi a tuah ding. Harsatnak a lo petu pawlih parah harsatnak a thlenter ve ding; 7harsatnak a tuartu nan hnenah colhdamnak a lo pek ding ih kannih hnen khalah in pe ve ding. Cumi cu kan Bawipa Jesuh le huham thawn a khatmi a vancungmi pawl an rat tikah a tuah ding; 8Pathian a hnongtu le kan Bawipa Jesuh ih Thuthang ṭha a cohlang duh lotu pawl cu meisa hliau thawn a hrem hai ding. 9Annih pawl cu kumkhua siatralnak an tuar ding. Bawipa cu a minung le a zumtu pawl hnen ihsin sunlawinak le upatnak co dingih 10a rat Ni ah, a huham sunlawinak le Bawipa mithmai hmu lo dingin annih pawl cu hnon an si ding. Cule nannih cu nan hnenih kan phuan mi Thuthang ṭha nan zum ruangah Bawipa a sunloihtu le upatnak a petu pawl lakah nan tel ding.

11Curuangah cat loin nan hrangih thla kan camnak a si. Kan Pathian ih a lo kawhsannak thawn mil-aw in nan nun theinak dingah kan dil ringring. A cahnak huham sungin nan duhmi hmuahhmuah cu ṭhatnak ah kimter in nan zumnak ih hnaṭuannak cu amah in tlamtlingter hramseh. 12Cuticun kan Bawipa Jesuh hmin cu sunlawinak nan hnen ihsin a ngah dingih kan Pathian le Bawipa Jesuh Khrih zaangfahnak ruangah nannih khal in sunlawinak cu a hnen ihsin nan ngah ve ding.

⇑

[Remove Footnotes]