2 Timote

Hnenih Paul Cakuat Pahnihnak

Thuhmaihruai

Paul in Timote hnenih a cakuat pahnihnak sungah Timote cu mino a si ih a rualpi le bawmtu a si bangtuk in pumpak ruahnak pekmi tampi a tel. A thu tumtah bikmi cu: tuartheinak thu a si. Timote kha Jesuh Khrih thu theihpitu a sinakah rinsan tlak zetih ṭang dingah ruahnak a pek ih thazaang khal a pek. Thuthang ṭha zirhnak dik le Thukam Hlun khal ṭhatein kaihnget dingah, dodaltu le harsat tuarnak tampi a um khal le Thuthang ṭha phurtu le zirhtu ṭuanvo nei dingah a forh ih tha a pek.

Timote cu, “Aatthlak le ziang thei lo thu elawknak,” sungih tel ve pang ding kha ṭih a nunzia thu a sim ih ralrinnak a ce in a pek. Cu bangtuk thu elawknak hin ṭhatnak zianghman a suahpi lo, a ngaitu pawl a siatsuah meen a si, ti thu a sim.

Paul in Timote thucah a duh bik mi cu: amah Paul nunnak le tumtah mi ­ zumnak, thinsaunak, duhdawtnak, tuartheinak le hremnak tuar theinak tla kha zohṭhim dingah a theihter sal a si.

Thutlangpi
Thu hramthoknak (1.1-2)
Thangṭhatnak le forhnak (1.3-2.13)
Ruahnak le ralrin peknak (2.14-4.5)
Paul ih dinhmun (4.6-18)
Thunetnak (4.19-22)

2 Timote 1

1Khrih Jesuh thawn kan pehzom awknak ruangih in tiam ciami nunnak thu phuang dingah Pathian lungkimnak in Khrih Jesuh ih tirhthlah keimah Paul in, 2ka duhdawtmi ka fapa Timote na hnenah ca ka lo kuat. Pathian kan Pa le Khrih Jesuh kan Bawipa in ngilneihnak, zaangfahnak le daihnak lo pe hramseh.

Lungawi Thu Le Thazaang Peknak

3Ka pu le ka pa ih an rak rianmi le thinlung thiangte ih ka rian vemi Pathian hnenah lungawi thu ka sim. A sun a zanih ka thlacamnak ih nangmah ka lo theihtinte in Pathian hnenah lungawi thu ka sim a si. 4Na mitthli a tlak kha ka cing ringring ih ka lungawinak tlamtling dingin lo tong thei ningla ti ka duhzet. 5Zumnak fel na neihmi kha ka ciing ringring. Cuih zumnak cu na pi Lois le na nu Zunis in an rak neihmi zumnak a si. Atu khalah cuih zumnak cu na nei lai a si, tiin ka zum. 6Curuangah na lu parih kutsuannak ka tuah laiih Pathian ih a lo pekmi laksawng kha nung ringring dingin kilkhawi aw tiah ka lo theihternak a si. 7Ziangah tile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si.

8Kan Bawipa ih thu cu mi sim dingah na ningzak hlah. Khrih hrangih thawng a tlami keimai hrang khalah na ningzak hlah. Pathian ih thazaang a lo pek vekin Thuthang ṭha hrangah zonzaihnak tuar ngam sawn aw. 9Pathian in amah ih minung si dingah in ko ih in rundamsuak zo. Cutiih in rundam suaknak cu kanmah tuah theimi kan neih ruangah a si lo, a zaangfahnak le tumtahnak a neihmi ruangah a si sawn. Hi a zaangfahnak cu Khrih Jesuh hmangin caan hramthok hlan ihsin in rak pek zo. 10Asinain in Runtu kan Bawipa Khrih Jesuh a ratnak sungin atu-ah kan hnenah a langter a si. Thihnak ih hmual cu a cemter ih Thuthang ṭha sungin kumkhua nunnak a langter zo.

11Pathian in Thuthang ṭha phuang dingah tirhthlah le zirhtu ah i hriil zo. 12Hi bangtuk ih ka tuarnak cu cutiih in hriilnak ruangah a si. Sikhalsehla ka rinsan ngah-mi hi zo a si ti ka theih ruangah hnangam lunghmuinak ka nei. Curuangah a kut sungih ka kiltermi * thil cu cuih Ni a thlen tiangin himte in amah in a kilkhawi ding tiah fiangtein ka thei. 13Ka lo zirh ciami thudik cu hngetzet in kai ṭha awla na thlun ding le na zohṭhim dingah re ṭha aw. Khrih Jesuh thawn kan pehzom awknak ruangih kan ta a si mi zumnak le duhdawtnak sungah um ringring aw. 14Kan sungih a nungmi Thlarau Thianghlim ih cahnak in na hnenih a lo pekmi thil ṭha pawl cu kil ṭha aw.

15Asia peng sungih a ummi hmuahhmuah in in dungtun ih in tlansan ṭheh zo ti cu na thei. Cuih sungah Figelas le Hermogenes khal an tel. 16Asinain Onesiforas cun voi tampi ka thin i nuamter ruangah Bawipa in a zaangfahnak cu a innsaang sungah thlenter hramseh. 17Thawng sungah ka um nain i zahpi loih Rom khua a ra thlen vete in i hmuhsuak hlan lo i hawl ciamco. 18Khi Ni ah Bawipa in zaangfahnak pe hramseh. Cule Efesa khua ah ziang tlukin ka hrangah hna a ṭuan ti khal fiangtein na theihmi a si.

⇑

[Remove Footnotes]