3 JOHAN

Cakuat Pathumnak

Thuhmaihruai

Johan cakuat pathumnak hi “Kawhhran Upa,” in Gaius timi Kawhhran hruaitu hnenih a kuatmi a si. Cangantu hin Gaius cu Khristian dang pawl a bawm ruangah a lawm ih Diotrefes timi pa kha ralring uh tiah thu a cah.

Thutlangpi
Thu hramthoknak (1-4)
Gaius a lawm (5-8)
Diotrefes a hnong (9-10)
Demetrias lungkimpinak (11-12)
Thunetnak (13-15)

3 Johan 1

1Kawhhran upa keimah in ka duhdawt zetmi Gaius na hnenah hi ca hi ka lo kuat.

2Ka duhdawtmi ka rual, thlarau lamah damte in na um ti ka theih vekin ziang hmuahhmuahah harhdam le siarem ih na umnak dingah na hrangah thla ka cam; 3Nang cu thutak sungah a um ringringmi na si bangtuk in thutak ah taimakin na um hrih ti thu Khristian unau pawl in in ra sim ih ka lung a awi ngaingai. 4Ka faale pawl thutak sungah an nungcang ti ka theih hnakih ka lung i awitertu thu dang a um nawn lo.

Gaius A Lawm

5Ka duhdawtmi ka rual, na Khristian unau hrang hna na ṭuan tikah, na theih dah lomi an si hmanah rin um zetin na ṭuan a si. 6Duhdawtnak na neih zia cu hi tawk Kawhhran hnenah an ra rel zo. Hmailam an feh hrihnak ding lamzin khalah Pathian lungtong zawng in rak bawm hrih aw. 7Ziangah tile Khrih hnaṭuannak an lamzin an rak thok tikah zum lotu pawl hnen ihsin bomnak ziang hman la loin Khrih hnaṭuan an rak thok a si. 8Curuangah thutak sungih an hnaṭuannak sungah kannih khal kan tel venak dingah kannih Khristian pawl in napi in kan bawm pei.

Diotrefes Le Demetrias

9Kawhhran hnenah ca tawite ka ngan; a sinain an hotu si a duhtu Diotrefes cun ka simmi cu ziang hmanah a siar lo ding. 10Curuangah ka ra thlen tikah a tuahmi hmuahhmuah ka phuang thluh ding; kan thuhla siazet ih a relmi le thuphan a permi pawl ka langter ṭheh ding. Culawng a si hrih lo. Khristian unau pawl an ra tlawn tikah thlen-inn a on duh lo ih thlen-inn on a duhtu pawl hman kha a kham ih cupawl cu Kawhhran sung ihsin phuar dingah a zuam ciamco a si.

11Ka duhdawtmi ka rual, a ṭha lomi kha cawng hlah aw; a ṭhami cawng sawn aw. A ṭhami a tuahtu cu Pathian ta a si, a ṭha lomi a tuahtu cun Pathian a hmu lo.

12Zozo khal in Demetrias an lawm; thutak hrimhrim khal in a lawm a si. Kanmah khal in cumi cu kan theihpi vemi a si ih kan simmi cu a dikmi a si ti na thei.

Cibaibuk Netnak

13Thu lo sim ding tamzet ka nei, a sinain cafung le cati thawn cun ngan ka duh lo. 14Lo tlawn cing ka tum ih cunah hmaitonin ka lo sim leh ding.

15Daihnak na parah um hramseh.

Na rualpi pawl in cibai an lo buk. Kan rualpi pawl kha pumpak ciar in cibai in rak buksak aw.

⇑

[Remove Footnotes]