TIRHTHLAH

Pawlih Hnaṭuannak

Thuhmaihruai

öTirhthlah pawlih hnaṭuannak,ù timi cabu hi Luka cabu ih peh a si. Hi cabu ih a tumtah bikmi cu Jesuh a thluntu pawl in Thlarau Thianghlim hruainak thawngin Jesuh ih Thuthang ṭha kha “Jerusalem khua le Judea ram le Samaria ram hmuahhmuah le leilung tlun khuazakipih an thanternak,” thu a si (1.8.) Judah mi pawl hnen ihsin a thok ih leilung tlun khuazakip a hrawh ṭhehtu Khristian pawlih zumnak le hnaṭuannak thu a si. Cule hi cabu a ngantu in fiangter a duhmi cu, Khristian pawl hi Rom Acozah dodaltu an si lo ih ṭihnung khal an si lo; Khristian zumnak hi Judah mi zumnak kimtertu a si sawn, ti kha a si.

Hi cabu hi ṭhenthum ah ṭhen a theih: cutiih ṭhen tikah Jesuh Khrih ih Thuthang ṭha an simnak le Kawhhran an um vivo nak a langter.

Hi Tirhthlah cabu sungah hin a thupi zetmi pakhat cu Thlarau Thianghlim thu a si. Thlarau Thianghlim cu Jerusalem ih Jesuh a zumtu pawl parah Pentikos ni ah a rung thleng ih Kawhhran le a hotu pawl a hruai vivo ih thazaang a pek vivo hai. Khristian pawl in an phuanmi thu cu an thusimmi ah a lang. Cuih an thusimmi pawl hmual a neihzia cu hi cabu sungih nganmi thil a cangmi le a zumtu nunnak sungih thil a thleng awmi in a lang a si.

Thutlangpi
1. Tirhthlah pawl in Jesuh thu an phuan hlan timtuahnak (1.1-26)
     a. Jesuh ih neta bik thukham le thutiam pekmi (1.1-14)
     b. Judas ai-awhtu hriilnak (1.26)
2. Jerusalem khawsungih tetti khannak (2.18.3)
3. Judea ram le Samaria ramih thuthang ṭha phuannak (8.412.25)
4. Paul hnaṭuannak (13.1-28.31)
     a. Paul khualtlawn voikhatnak (13.1-14.28)
     b. Jerusalem khuaih thurel khawmnak (15.1-35)
     c. Paul khualtlawn voihnihnak (15.3618.22)
     d. Paul khualtlawn voithumnak (18.2321.16)
     e. Jerusalem le Sisaria le Rom khuaih Paul thawng tlaknak (21.1728.31)

Tirhthlah 1

1Bawipa Theofilas,

Ka cabu hmaisa sungah khan Jesuh in hnaṭuan hram a thawh ihsin vancungih laaksoh a si ni tiang, 2a thil tuahmi hmuahhmuah le a thuzirhmi hmuahhmuah kha ka ngan. Vancung ih laak a si hlanah Amah ih a hriilmi a tirhthlah pawl cu Thlarau Thianghlim cahnak huham thawn ṭhatein thu a zirhta hai. 3A thih hnuah ni sawmli sung an hnenah voi tampi a lang ih a nungsal a si ti kha zohmanih el thei lo dingin phun tampi in a langter. Amah an hmu ih anih in Pathian Uknak thu kha an hnenah a sim. 4Cule hmun khatih an tonkhawm awk laiah, an hnenah hiti in thu a pek: “Jerusalem ihsin khuihmanah feh hlah uh. Ka Pa in laksawng a lo pe ding tiah ka lo sim ciami kha hngak sawn uh. 5Johan cun tidai in baptisma a pe; a sinain ni malte sungah Thlarau Thianghlim thawn baptisma pek nan si ding,” tiah a ti.

Jesuh Cu Vancung ah Laak A Si

6Tirhthlah pawl cu Jesuh thawn an ton awk tikah annih in, “Bawipa, atuih caanah hin Israel mi hnenah Uknak cu na pe sal ding maw?” tiah an sut.

7Jesuh in an hnenah, “A cuih tikcu le nithla cu ka Pa ih thuneihnak ih khiah-mi a si ih nannih theih ṭulmi a si lo. 8Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti. 9Cutiih a sim ṭheh tikah Jesuh cu an mithmuh rori-ah vanah laakso a si ih mero in a phen ih an hmu thei nawn lo.

10Cutiih a hung kainak van cu an zoh cuahco laiah puanvaar sinin mi pahnih hmakhatte-ah an kiangah an rung ding ih, 11“Galilee mi pawl, ziangah so van zoh in nan din cuahco? Nan hnen ihsin vanih a kaimi Jesuh hi vanih a kai lai nan hmuh vek cekci in a rakir sal leh ding,” tiah an ti.

Judas Ai-awhtu Hriilnak

12Cule Jesuh ih tirhthlah pawl cu Olif Tlang ihsin Jerusalem ah an kir. Olif Tlang cu Jerusalem ihsin peng hrek tluk a hlat. * 13Khawpi sungah an vung feh ih an umnak tlunta khaan ah an hung lut. Piter le Johan, Jeim le Andru, Filip le Thomas, Bartholomeo le Matthai, Alfias ih fapa Jeim, phun ṭantu Simon, le Jeim ih fapa Judas tla an si. 14Hmun khatih thlacam tlang dingah an tongkhawm ṭheu ih nunau pawl le Jesuh ih nu Mari le Jesuh ih naule pawl tla an tel.

15Ni malte a rei hnuah zumtu pawl an tongkhawm aw ih minung za le kul hrawng an si. Piter cu a ding ih, 16“Ka u le ka nau pawl, Thlarau Thianghlim in David ih hmurka hmangin a sim ciami Jesuh a kaitu pawl hruaitu Judas ih thu cu Ca Thianghlim sungih an ngan vekin a kim a ṭul a si. 17Judas cu kan hnaṭuanpi sungih tel ve dingah hriilmi a si ruangah kan pawl sungah sungtel a rak si ve,” tiah a ti.

18(Judas in thilsual a tuahmi manih a ngahmi tangka in lo pakhat a lei ih cuih lo sungah a bah ih a thi; a pum a kuai ih a sungril hmuah a pawt ṭheh. 19Cuih thu cu Jerusalem ih a ummi hmuahhmuah in an thei ih anmah ih ṭong in cuih lo cu Akeldama an ti; a tican cu, “Thisen Lo,” tinak a si.)

20Piter in, “Ziangah tile Saam cabu sungah,

21-22“Cuti a si ih Bawipa Jesuh thawhsalnak thutheitu-ah pakhat khat cun in telpi a ṭul a si. Amah cu Bawi Jesuh kan hnenih khual a tlawn vivo sung hmuahhmuah kanmah lakah a tel ih, Johan in baptisma thu a simnak ihsin thokin Jesuh kan hnenin vanih laakso a si ni tiang, kanmah lakah a tel vemi a si ding,” tiah a ti.

23Curuangah mi pahnih ih hmin an pek. Anmah cu Barsabbas ti ih kawhmi Josef, (Justus ti tla in an kawhmi) le Matthias an si. 24Cule thla an cam ih, “Bawipa, nang cun mi thinlung sung na thei ṭheh; himi pahnih lakah zo deuh na hriil ti run langter aw; 25a co dingmi hmunah in fehsantu Judas ih ai-awhtu ah na tirhthlah pawl lakih ṭuanvo la dingah na hriilmi cu run fiangter aw,” tiah an ti. 26Cule an pahnih sungah zoso tirhthlah a si ding ti theihnak ah camcawhfung an zuuk ih Matthias in a ngah. Matthias cu tirhthlah hleikhat pawl hnenah an betcih.

⇑

[Remove Footnotes]