KOLOSE

Kawhhran Hnenih Paul Cakuat

Thuhmaihruai

Hi cakuat hi Asia Minor ramah khawpi pakhat Efesa ihsin nisuahnak lamih um Kolose Kawhhran hnenih a kuatmi ca a si. Hi Kawhhran hi Paul ih dinsuahmi a si lo nain a hnaṭuannak ram sungah a um ih cu ruangah Paul in ṭuanvo ka nei a si ti tlukin a ruat aw. Asia ram Rom Acozah ukmi ram sungih khawpi a si mi Efesa ihsin a cuih khua ah Pathian hnaṭuantu a thlahnak khua a si. Paul in Kolose ah zirhnak dik lo zirhtu an um a si ti thu a thei. Cumi pawl cun: mi pakhat in Pathian a theih theinak dingah le rundamnak famkim a co theinak dingah, ‘Thuneitu le thlarau lam uktu pawl,’ (2.8,20) timi a biak a ṭul a si an ti. Cumi tlunah, zumtu pawl in an serh an tan a ṭul, ei le in le a dang cin le daan pawl khal an thlun a ṭul a si, an ti.

Paul in hi zirhnak hi Khristian thuthang taktak thawn an ral aw a si, tiin a ngan. A ca sungih a sim duhmi cu: Jesuh Khrih in rundamnak famkim a pek thei ih a dang zumnak le tuahdaan pawl hin Jesuh hnen ihsin mi a hruai hlo thei sawn a si, tiah a ti. Khrih sungin Pathian in lei le van a seemsuah ih acuih Khrih sung thotho cun Amah ih hnenah a hruaikir sal ding. Khrih thawn pehzomnak lawngin leilung hi rundamnak a ngah ding tiin ruahsannak a um. Cun Paul in hi thuthang ṭha hi zumtu hrangah nitin kan nunnak ah hin ziang vekin sullam a nei ti kha a langter.

Hi cakuat hi Kolose khua ah Taikhikas in a keng. Taikhikas cu Onesimas in a thlun. Onesimas cu sal a si ih a ai-ah Paul in Filemon hnenah cakuat tla a rak ngan sakmi a si.

Thutlangpi
Thuhmaihruai (1.1-8)
Khrih ih sinak le a hnaṭuan (1.9-2.19)
Khrih sungih nunnak thar (2.20-4.6)
Thunetnak (4.7-18)

Kolose 1

1Kolose khuaih a ummi Pathian minung, Khrih thawn nan pehzom awknak ruangah rinsan tlak a si mi Khristian unau pawl nan hnenah, 2Pathian lungkimnak in Khrih Jesuh ih tirhthlah a si mi keimah Paul le Khrih sungah kan unau a si mi Timote in ca kan lo kuat.

Pathian kan Pa in thlawsuahnak le daihnak lo pe hramseh.

Lungawinak Thlacam

3Nan hrangih thla kan cam tik poh ah kan Bawipa Jesuh Khrih ih Pa le kan Pathian hnenah lungawinak thu kan sim ringring. 4Ziangah tile Khrih Jesuh nan zumnak le Pathian minung pawl hmuahhmuah hnenah duhdawtnak nan neih kha kan rak theih ruangah a si. 5A dikmi Thuthang ṭha nan hnenih a ra thlen pek ah ziang bangtuk in ruahsannak a lo pek ti cu nanmah in nan thei. Curuangah rinnak le duhdawtnak cu vancungah nan hrangah himte in a lo retsakmi nan ruahsannak parah hram an bun a si. 6Pathian zaangfahnak nan rak theih hmaisa bik ni ihsin thokin atu tiang a si bangtuk in, Thuthang ṭha in thlawsuahnak cu nan hnenah a thlenpi ih leitlun khuazakipah a karh zaiter a si. 7Pathian zaangfahnak cu Epafras hnen ihsin nan theihmi a si. Amah cu kan duhdawtmi kan hnaṭuanpi, kan ai-ah * rinsan tlak zetin Khrih riantu khal a si. 8Amah in Thlarau ih a lo pekmi duhdawtnak nan neihmi thu tla in sim.

9Hi bangtuk in nan thuhla kan theih vete in nan hrangah thla kan cam ringring. Pathian in amah ih duhnak theih theinak le Thlarau ih pekmi fimnak le theihthiamnak in lo khatter dingah Pathian kan dil a si. 10Cuticun Bawipa ih duhnak vekin nan nung thei ding ih amah lungtong zawng kha nan tuah ringring thei ding. Cule nan nunnak in rah ṭha a phunphun a rah ding ih Pathian nan theihnak ah cun nan ṭhang vivo ding. 11Ziang hmuahhmuah kha thinsaunak thawn nan tuartheinak dingah Pathian sunlawinak ihsin a ra suakmi a thazaang in lo cakter hramseh. 12Tleunak ram sungah Pathian in a mi thianghlim pawl hrangih a retmi kha a cotu si ve dingin a lo sersiamtu Pa Pathian cu lungawi in thangṭhat uh. 13Amah in kannih in uktu thimnak huham sung ihsin in runsuak ih a Fahniang uknak sungah in luhpi zo; 14a Fapa thawngin sual ngaidamnak kan ngah ih miluat kan si zo.

Minung A Sinak Le A Hnaṭuan

15Khrih cu hmuh theih lomi Pathian ih hmuihmel langnak a si. Amah cu Fapa tir a si ih siammi thil hmuahhmuah hnakin a cungnung a si. 16Ziangah tile Pathian in Khrih sung ihsin ziangzongza vancung le leilung tlunah siseh, hmuh theimi le hmuh thei lomi siseh, thlarau lam cahnak huham neitu le bawi le uktu pawl le thuneitu pawl siseh a tuah. Pathian in van le leilung ziang hmuahhmuah Khrih sungin a tuah ih Khrih hrangah finkhawm ṭheh dingin a tuah a si. 17Khrih cu ziang hmuahhmuah hlanah a rak um zo ih amah thawn an pehzom awknak thawngin ziangzongza cu umnak hmun an nei cio. 18Kawhhran cu Khrih ruangpum a si ih Khrih cu a lu a si. A pumsa ruangpi nunnak hram cu amah Khrih a si. Amah cu Fapa tir a si ih ziang hmuahhmuah lakah cungnung bik a si ringringnak dingah thihnak ihsin thawhter sal a si zo. 19Fapa in amah ih sungah Pathian sinak famkimih a neihnak cu amah Pathian ih lairelnak in a si. 20Cuticun a Fapa sung ihsin lei le van pumpuluk cu Pathian in a hnenah kirter sal a duh. Pathian in a Fapa thinglamtah parih a thihnak ruangin lei le vanih ummi thil hmuahhmuah thawn remnak a tuah ih cutiin a hnenah a hruaikir sal a si.

21Hlanah cun thil ṭha lo nan tuah ruangah le nan ruah ruangah Pathian thawn nan rak hlaat aw ih a ral nan rak si. 22Sikhalsehla atu-ah cun a Fapa taksa ruangpum rori in thihnak a tuarnak ruangah Pathian in a rualpi-ah a lo tuah zo. Cutiih remnak a tuahnak cu mi thianghlim, mawhnak nei lo le soiselnak um loin a hmaika ih thlenter a lo duh ruangah a si. 23Cuti a si ruangah nan hramṭoh-nak a hngetmi parah khan fekzetin zumnak thawn ding ringring uh. Thuthang ṭha nan theihnak ihsin nan co ngahmi ruahsannak thawn zohman in lo ṭhen hlah hai seh. Hi Thuthang ṭha hrangah keimah Paul hi hnaṭuantu ka si ih, leilung tlun khuazakip mi hmuahhmuah hnenih simmi Thuthang ṭha a si.

Kawhhran Hrang Paul Hnaṭuannak

24Nan hrangah harsatnak ka tuarmi pawl ruangah hin lungawinak ka nei; ziangah tile ka taksa-ih ka tonmi tuarnak ruangah Khrih in a ruangpum a si mi Kawhhran ai ah tuarnak a tonmi kha ka kimter ve a si. 25Kei cu Pathian in Kawhhran hnaṭuantu ah i tuah zo. Hi hnaṭuan i pekmi cu nanmah ih ṭhathnemnak dingah a si. Cumi cu Pathian thuthang famkim zetih phuan kha a si ih, 26cuih thuthang cu san tampi sung zo miphun hnen hmanah phuang loin thuhmi a rak si ih atu lawngah a minung hnenah phuanmi Thuthang ṭha a si. 27Pathian tumtahmi cu mi hmuahhmuah hrangah a rak ruah ciami a sunglawi le mangbangza a si mi thuthup cu atu-ah a minung pawl hnenih langter ding kha a si. Cule cuih thuthup cu nan sungih a ummi Khrih hi a ti duhmi a si ruangah Pathian sunlawinak kha nan ṭawm ve ding, tinak a si. 28Curuangah zozo hnen khalah Khrih cu kan phuang a si. Mikip hnenah fimnak kan neihmi hmuahhmuah hmangin ralrinnak thu kan sim ih kan zirh. Cuti kan tuahnak cu zozo khal Khrih thawn an pehzom awknak sungin Khristian pitling si in Pathian hmaiih thlenpi kan duh ruangah a si. 29Himi tuahsuak dingah amah Khrih in i pekmi, ka sungih nasa zetin hna a ṭuantu, cahnak hmangin ka ṭuan ciamco a si.

⇑

[Remove Footnotes]