EFESA

Kawhhran Hnenih Paul Cakuat

Thuhmaihruai

Efesa Kawhhran hnenah Paul ih cakuat hi a hmaisa bikah, “Tikcu caan a kim tikah Pathian in famkim ih a tuah tummi cu: vanah siseh, leilungah siseh, siammi thil hmuahhmuah hi finkhawm ṭheh ih Khrih kha lu bikih ret khi a si,” ti thu hi a thupi bikah a ret (1.10). Cun leikhawvel milai hmuahhmuah Jesuh Khrih sungah pumkhat si theinak dingah hi Pathian ih tumtahnak bangtuk in Pathian ih minung pawl in tican nei ih nun dingah zaangfah a dil.

Hi cabu a hramthokah cangantu pa hin pumkhat sinak ding tumtahnak thu a sim. Himi thu-ah hin Pathian in a milai pawl ziangtin a hriil, Jesuh Khrih sungah ziangtin an sualnak a ngaithiam in a luatter, tile Pathian ih thutiamnak cu Thlarau Thianghlim in ziangtin aamahkhannak ah a canter ti thu a sim. A ṭhen hnihnak ah ca siartu pawl cu Bawi Khrih sungah pumkhat an sinak kha pakhat le pakhat an nun khuasaknak cio ah tican nei in an langternak dingah a forh.

Pathian ih milai pawl pumkhatte in Khrih ah an lung a khat aw a si ti langternak dingah sim duhmi a langtertu tahṭhimnak hmang in a sim. Kawhhran cu taksapum bangtuk a si ih Khrih cu lu bangtuk a si; Kawhhran cu inn bangtuk a si ih Khrih cu a kiil-ih innhramṭoh bangtuk hi a si; Kawhhran cu nupi bangtuk a si ih Khrih cu a pasal bangtuk a si, a ti. Khrih sungah a langmi Pathian zaangfahnak hin hi cangantu ih ruahnak cu saangzet ah a thlenter. A simmi hmuahhmuahah Khrih ih duhdawtnak, a pumpeknak, sual ngaithiamnak, zaangfahnak le a thianhlimnak thawn a sim a si.

Thutlangpi
Thuhmaihruai (1.1-2)
Khrih le Kawhhran (1.3-3.21)
Khrih sungih nunnak thar (4.1-6.20)
Thunetnak (6.21-24)

Efesa 1

1Pathian lungkimnak vekin Khrih Jesuh ih tirhthlah keimah Paul in Efesa khuaih a ummi Pathian mi pawl, Khrih Jesuh thawn nan pehzom awknak ah rintlak ih a nungmi, nan hnenah hi ca hi ka lo kuat.

2Kan Pa Pathian le kan Bawipa Jesuh Khrih in zaangfahnak le daihnak lo pe hramseh.

Khrih Hnen Ihsin Thlawsuahnak

3Kan Bawipa Jesuh Khrih ih Pa le a Pathian cu thangṭhat si koseh! Ziangah tile Khrih thawn kan pehzom awknak thawngin kan thlarau hrang van thlawsuahnak a phunphun kan hnenah in pe. 4Khrih thawn kan pehzom awknak thawngin Pathian in kannih cu Amah ih hmaiah mi thianghlim le mawh nei lo si dingin leilung a sersiam hlan hman in Amah ih ta-ah in rak hriil zo. In duhdawt ruangah, 5Pathian in Jesuh Khrih thawngin a faale ah in canter ding cu a lungawi zawng le a duh zawng in rem a rak ruat cia a si. 6A sunglawimi a zaangfahnak le a duhdawtmi a Fapa thawngin laksawng in pekmi ruangah Pathian cu thangṭhat si koseh! 7Ziangah tile Khrih a thihnak thawngin kan sualnak cu ngaidam a si zo ih a luatmi kan si zo. Pathian in a zaangfahnak cu kan hnenah tam zetin in pek ruangah, 8a zaangfahnak cu a va tum lawmmam so!

9Pathian cun a fimnak le a thuukmi a thutheihnak in a tumtah ciami cu a tuahsuak ih Khrih sungin kimter a duhmi a thuthup cu kan hnenah a langter zo. 10Tikcu caan a kim tikah Pathian in famkim tein a tumtah mi cu: vanah siseh, leilungah siseh siammi thil hmuahhmuah hi finkhawm ṭheh ih Khrih kha lu bikih ret ding khi a si.

11Ziang hmuahhmuah hi Pathian amah ih tumtahmi le ruahciami vekin a kim ṭheh. Khrih thawn kan pehzom awknak thawngin a minung si dingah Pathian in in hriil zo; cumicu amah ih tumtahmi a si ih a hramthok ihsin a rak khaukhih ciami a si. 12Curuangah Khrih sungin ruahsannak a nei hmaisa biktu kannih in Pathian hnenah sunlawinak pe uhsi.

13Nan hnenah rundamnak a thlentertu Thuthang ṭha a dikmi thuthang cu nan theih tikah nannih khal Pathian minung nan si ve. Khrih nan zum ih Pathian in amah ih ta nan sinak langternak ah hminsinnak cu nan parah a khen; cuih hminsinnak cu pe dingin a lo tiam ciami Thlarau Thianghlim kha a si. 14Pathian in a minung hnenah a kam ciami kan ngah tengteng ding ti langternak ah cuih Thlarau Thianghlim cu aamahkhan a si ih a minung hnenah cun luatnak tlamtling in a pe ding ti kan theih fiangnak tla a si fawn. A sunlawinak cu thangṭhat si ko seh.

Paul Thlacamnak

15Bawi Jesuh nan zumnak le Pathian minung parih duhdawtnak nan neih zia ka theih thok vete ihsin, 16nanmah ruangah Pathian hnenih lungawi thusim ka cawl dah lo. Ka thlacamnak in ka lo ciing ringring. 17Cule kan Bawipa Jesuh Khrih ih Pathian, a sunglawimi kan Pa in, nan hnenah Thlarau lo pe hram dingin ka dil. Cuih Thlarau cun a lo fimter ding ih Pathian nan hnenah a langter fawn ding; cuticun Pathian cu nan thei ding. 18Ziangbangtuk ruahsannak nei dingah so a lo kawh ih a minung pawl hrangah a tiamkam ciami cu ziangtluk mangbangza so a si. 19Amah a zumtu pawl sungah a hnaṭuan theinak huham cu ziangtlukin so a tum, ti tla khi hmu thei dingin le a tleunak tla nan hmuh theinak dingah nan thinlung run ongter hramseh, tiah a hnenah thla ka cam a si. Kan sungih a ummi cahnak cu, 20Khrih thihnak ihsin a thawhter hnuah vancung khua a vorhlam kapih a totertu Pathian ih cahnak huham thotho kha a si. 21Cutawkah Khrih cu uktu a si ih vancungih uktu dangdang siseh, thuneitu dangdang siseh, bawi dangdang a ummi pawl tla siseh, an tlunah Khrih cu uktu bawi a si. Hi leikhawvel tlunah siseh, a ra leh dingmi leilung tlunah siseh, thuneitu pawl hmuahhmuahih tlunah Bawi bik a si. 22Pathian in Khrih ke hnuai ah ziangzongza a ret thluh ih ziang hmuahhmuah ih tlunah Bawi a si tiin Kawhhran ih lu ah Khrih cu a ret. 23Kawhhran cu ziang hmuahhmuah a famkimtertu Khrih ih ruangpum a si.

⇑

[Remove Footnotes]