GALATI

Kawhhran Hnenih Paul Cakuat

Thuhmaihruai

Jesuh Thuthang ṭha cu Judah miphun a si lomi Zentail mi pawl hnenah sim an thok ih a zumtu khal an tam vivo tikah Khristian taktak si thei dingah Moses Daan pawl an thlun ve a ṭul maw, timi thusuhnak hi a suak. Paul cun a ṭul lo, a ti. Thungaite in kan sim a si ahcun Khrih sungih kan nunnak ah hin zumnak lawng hi a thupi a si, tiah a ti. Cuih zumnak cun kanmah le Pathian karlakah rualremnak a umter a si, a ti. Asinain Galati peng sungih Kawhhran hrekkhat lakah Paul a dodaltu pawl an ra ih Pathian thawn rem awk nan duh a si ahcun Moses Thukham nan thlun ding a si, tiah an ra ti. Galati peng hi Rom Acozah ukmi Asia Minor sungih a ummi a si.

Paul in Galati cakuat a nganmi hi zirh sualnak ih hruai sualmi pawl zumnak dik le tuahnak dik ih hruaikir sal thei dingah a nganmi a si. Paul in kei cu Jesuh Khrih ih tirhthlah diktak ka si tiah a ṭang. Milai thuneihnak thawn tirhthlah si dingah kawhmi ka si lo, Pathian ih kawhmi ka si ih ka hnaṭuannak khal Judah mi a si lomi pawl hnenah a si bik, tiah a ti. Pathian le milai kan pehzom awk theinak cu zumnak pakhat lawng in a si, ti kha a thupi bikih a nganmi a si. Cuih tlunah Khristian nuncan ziaza timi hi Khrih kan zumnak ihsin a ra suakmi duhdawtnak ih rah a si, ti thu Paul in a neta bikah a sim.

Thutlangpi
Thuhmaihruai (1.1-10)
Paul ih tirhthlah a sinak (1.11-2.21)
Pathian zaangfahnak Thuthang ṭha (3.1-4.31)
Khristian pawlih luatnak le ṭuanvo (5.1-6.10)
Thunetnak (6.11-18)

Galati 1

1Galati Kawhhran pawl hnenah tirhthlah Paul in ca ka lo kuat. Thuthang ṭha phuang dingih tirhthlah si dingah hin milai ih hriilmi le thlahmi ka si lo; Jesuh Khrih thihnak ihsin a thotertu Pa Pathian le amah Jesuh Khrih ih hriilmi le thlahmi ka si. 2Hitawkih a ummi unau pawl tla thawn Galati ih Kawhhran pawl cibai kan lo buk a si.

3Kan Pa Pathian le Bawipa Jesuh Khrih in zaangfahnak le daihnak cu lo pe hramseh.

4Tuihsan sansia sung ihsin kannih luatter dingah Khrih cun Pa Pathian duhnak thlun in kan sualnak ruangah a nunnak a pe zo. 5Pa Pathian hnenah sunlawinak cu a kumkhua in um camcin hramseh! Amen.

Thuthang Ṭha Pakhat

6Ziang kar lote sungah Khrih zaangfahnak thawn a lo kotu cu nan dungtun ih Thuthang ṭha dang nan pan lohli ka hmuh tikah ka mang a bang ngaingai. 7‘Thuthang ṭha dang,’ a um ngaingai ruangih ka timi a si lo; nan thinlung a lo hnaihnoktu le Khrih Thuthang ṭha thleng a tum rerotu minung an um ruangih ka timi a si. 8Kanmah siseh, vancungmi khal siseh, nan hnenih kan phuan ciami Thuthang ṭha si loin thuthangṭha dang simtu an um a si ahcun camsiat si koseh! 9Kan lo sim zo nain atu-ah ka sim sal ko pei: nan pom ciami Thuthang ṭha siarlo thuthangṭha dang simtu cu camsiat si koseh.

10Hitiih ka ti tikah milai lungkimnak hawl rero ka bang maw? Ka tummi cu milai ih lungkimpinak a si lo; Pathian ih lungkimpinak a si sawn. Milai ih thangṭhatnak ka hawl maw? Mi hmaiih hminṭhatnak ka hawl a si ahcun Khrih ih hnaṭuantu ka si lo ding.

Khrih Ih Tirhthlah Cannak

11Ka u le ka nau tla, Thuthang ṭha ka phuanmi hi minung ih thokmi a si lo, tihi nan hnenah ka langter duhmi a si. 12Minung hnen ihsin ka ngahmi a si lo; milai zohmanih in zirhmi khal a si fawn lo. Jesuh Khrih amah in ka hnenih a phuanmi a si.

13Ka rak nuncan ṭheu daan cu nan thei thluh ko. Judah biaknak ka thlun laiah cun Pathian ih Kawhhran pawl ka hremsiat ih cihmit dingah ka rak zuam ciamco. 14Judah biaknak thlun lamah cun ka khukṭhi lakah a fel bikmi ka si. Kan pupa daan thlun lamah cun a hleice in rinsan tlak taktak ka si.

15Sikhalsehla Pathian cun a zaangfahnak thawngin ka suah hlan hmanin i hriil ih amah ih hnaṭuantu si dingah i ko. 16A Thuthang ṭha Zentail mi hnenih phuang dingah, a Fapa ka hnenih a run langter tikah milai zohman thuron dingah ka pan lo. 17Jerusalem ih a ummi ka hlanih tirhthlah a rak si zomi pawl khal ka pan lo. Zamrang in Arabia sawn ah ka feh ih Damaskas ah ka ra kir sal. 18Kum thum hnu lawngah Piter tong dingin Jerusalem ah ka feh ih a hnenah zarh hnih ka caam. 19Kan Bawipa ih naupa Jeim siarlo, tirhthlah dang zohman ka tong lo. 20Hitiih ka nganmi hi thudik a si; thuphan a si lo ti cu Pathian Amah in a thei.

21Cuih hnuah Siria le Silisia ramah ka feh. 22Culai ahcun Judea ram Khristian pawl cun pumpak in in thei hrih lo. 23“In rak hrem rerotu in atu-ah cun siatsuah a rak tummi kan zumnak thuhla cu a phuang ciamco a si,” tiin mi ih an simmi an thei ih, 24cutiin keimah ruangah Pathian an thangṭhat.

⇑

[Remove Footnotes]