JEIM

Hnen Ihsin Cakuat

Thuhmaihruai

Jeim cakuat hi, “Leitlun khuazakipih a ṭeekdarh awmi Pathian ih minung pawl,” hnenah a kuatmi a si. Khristian nuncan umtu ziaza zirhnak pawl finkhawmmi a si. Cangantu hin a sim duhmi fianternakah thuṭhimnak tampi hmangin lennak le farahnak, sualforhnak, mi thleidannak, zumnak le ṭuannak, ṭong thulhna thiamnak, tawh awknak, tluangkhawnnak le tangdornak, midang soiselnak, uar awknak, thinsaunak le thlacamnak thu pawl tla fiangtein a langter.

Hi cakuat hin Khristian biaknak ah hin zumnak thluntu tuahnak le ṭuannak ih a thupit zia a langter a si.

Thutlangpi
Thu hramthoknak (1.1)
Zumnak le fimnak (1.2-8)
Farahnak le lennak (1.9-11)
Hniksaknak le sualforhnak (1.12-18)
Hna lawngih theihnak le tuahnak (1.19-27)
Mi thleidannak le ralrin peknak (2.1-13)
Zumnak le ṭuannak (2.14-26)
Khristian le a ṭongdaan (3.1-18)
Khristian le khawvel (4.1-5.6)
Thuzirhnak a phunphun (5.7-10)

Jeim 1

1Pathian le Bawipa Jesuh Khrih ih siahhlawh a si mi keimah Jeim in leilung tlun khuazakipah a ṭeekdarhmi Pathian minung phun hleihnih * nan hnenah cakuat in cibai ka lo buk.

Zumnak le Fimnak

2U le nau pawl, nan hnenah hniksak harsatnak a phunphun a thlen tikah mi vannei kan si tiah ruat aw uh; 3ziangah tile nan zumnak in cubangtuk hniksak harsatnak nan neh tikah tuar theinak a ra, ti nan thei. 4Tlaksamnak zianghman um loin a famkim le pitlingmi nan si theinak dingah a net tiang a tuar theitu si dingah zuam uh. 5Nanmah lakah fimnak a tlasammi nan um ahcun Pathian hnenah dil sehla Pathian in a pe ding. Ziangah tile zo hnen khalah Pathian cun siangzet le zaangfahnak thawn a pe a si. 6Sikhalsehla cutiin a dil tikah thinlung ṭhukṭhunnak um lo tein a dil pei ih ka ngah rori ding tiin a zum pei. Thinlung ṭhukṭhunnak a neitu cu thli in hmun kipih a semmi tifinriat tisuar bangtuk a si. 7-8Cubangtuk minung cu a thinlung a hmun lo ih a ṭhencat awk thei lo ruangah Bawipa ih hnen in zianghman ngah ding ring hlahseh.

Farah Le Lennak

9A farahmi Khristian unau pakhat khat Pathian ih bomnak in neinungih a um tikah a lung awi koseh. 10Cule a lianmi Khristian unau kha mi farahih a can a sile a lung awi thotho seh. Ziangah tile milian pawl cu hramlak pangpar bangin an ziam ding. 11Ni a suak ih pangpar kung cu niling in a em; pangpar cu a vuai ih a mawinak a ziam. Cubangtuk in milian pawl cu hnaihnok zetih an hna an ṭuan laifangah an hloral ding.

Hniksaknak Le Sualforhnak

12Hniksak harsatnak a tuar ih hngette ih a ding theitu cu mi thlawsuak a si. Ziangah tile cubangtuk hniksaknak a neh thei ruangah Pathian in amah a duhdawtu pawl hrangih a tiam ciami nunnak sui lukhuh a ngah ding. 13Cubangtuk hniksaknak cu mi in an ton tikah, “Pathian in i hniksak a si,” tiah zohman in ti hlahseh. Ziangah tile Pathian cu sualnak in a hniksak thei lo ih amah khal in zohman a hniksak hai lo a si. 14Sikhalsehla minung cu sualforhnak a ton tikah amah ih taksa hiarnak in a thlem ih thang vekin a awh ṭheu. 15Taksa hiarnak in fa bangih a vunmi le a hrinmi cu sualnak a si; cule sualnak cu a ṭhang ih rah a rah tikah thihnak a suahter.

16Ka duhdawtmi u le nau, ruat sual pang hlah uh. 17A ṭhami le a famkimmi laksawng hmuahhmuah cu vancung ihsin a rami an si. Vancung tleunak a tuahtu Pathian hnen ihsin a rami an si. A siammi thil pawl cu an thleng aw nain Pathian cu a thleng aw dah lo; tikcu a her awk khal le Pathian hnen ahcun khawthim ti a um dah lo. 18Amah ih lungkimnak in sersiammi kan si ih kanmah sersiamnak ah thutak ṭongkam a hmang. Hiti a si ruangah a siammi thil hmuahhmuah lakah kannih cu rah hmaisa bik kan si.

Theihnak Le Tuahnak

19Ka duhdawtmi u le nau pawl, hi thu hi cing ringring uh: zokhal thu theih duhnak lam ahcun a zamrangmi si uhla ṭong ding le thinhennak lam ahcun khulfungmi si uh. 20Milai ih thinhennak in Pathian ih tumtahnak a dingmi cu a hlensuah thei lo. 21Curuangah fihnung le a balmi ziaza ṭha lo hmuahhmuah cu hlon ṭheh uh. Pathian hnenah hlan aw uhla nan thinlung sungih khum ciami nan thlarau runsuak theitu thu kha fektein pom uh.

22A thu kan theih taakah a tawk ko ti meenin nanmah le nanmah bum aw hlah uh. Nan theihmi kha a tuahsuak tum uh. 23A theih lawng a thei ih a tuahsuak lotu cu thlalang ah a hmel a zoh awtu bangtuk a si. Amah cu thlalang ah a hmel a zoh aw ih a si vek cekci-in a hmu aw. 24Felzet in a zoh-awk hnuah a feh ih hmakhatte-ah a hmel ziangvek a si ti a thei nawn lo. 25Sikhalsehla mi a luattertu, a famkimmi daan kha felzetih a zoh ringringtu cu a thei mentu le a hngilhtu si loin a tuahsuaktu a si; cutiin a tuahsuak ruangah Pathian ih thlawsuahmi a si ding.

26Biaknak lamah ka taima a si a titu nan um maw? Nan hmurka nan uk thei lo ahcun nan zumnak parih nan taimaknak cu santlai lo a si ih nanmah le nanmah a bum awtu nan si. 27Pathian kan Pa in a taktak le a thiangmi biaknak ih a ruahmi cu: farah zonzai le nuhmei an harsatnak le an tuarnak ah ṭhatein kilkhawi le khawvel sualnak sungih buahcihter aw lo dingin mah le mah fingkhawi awk kha a si.

⇑

[Remove Footnotes]