JUDA CAKUAT

Thuhmaihruai

Hi Jude cakuat hi zirh sualtu pawl an um ih zumtu ṭhazet vekih an um ruangah ralrinnak thu a nganmi a si. Cakuat tawizet a si ih a sung ummi ah Piter cakuat pahnihnak thawn an bang awknak a tamzet. Pathian in a minung hnenah kumkhua daih in a pekmi an zumnak thuthang cu ṭan ringring dingin cangantu hin a cakuat siartu pawl a forhnak a si.

Thutlangpi
Thu hramthoknak (1-2)
Zirh sualtu ziaza, an zirhnak le an cemralnak ding thu (3-16)
An rinnak ṭan dingih forhnak (17-23)
Thlawsuah peknak (24-25)

Juda 1

1Jesuh Khrih ih siahhlawh le Jeim ih nau keimah Jude * in Pathian kawhmi, Pathian kan Pa ih duhdawtmi le Jesuh Khrih humhimnak sungih a ummi pawl nan hnenah hi ca ka lo kuat.

2Pathian zaangfahnak le daihnak le duhdawtnak cu famkim zetin nan ta si hramseh.

Zirh Sualtu Pawl

3Ka duhdawtmi unau tla, kan zatein kan pomtlaangmi rundamnak thu hi nan hnenah ca in ka thiam tawkin ka ngan; Pathian in a mithiang hnenah kumkhua daihin a pekmi zumnak thu ahhin taimak suah in ṭang uhla zuam uh tiah a hleice in ka lo forh duh a si. 4Ziangah tile kan lakah Pathian ziangih a siar lotu pawl kan theih loin an lut ih an ziaza ṭha lomi thuh awknak ah Pathian zaangfahnak thuthang kha a pingpeng in an sim ih kan hrangah Bawi le Lal a si mi Jesuh Khrih kha an hnong. Hi bangtuk minung pawl cu siatralnak an tong ding tiah Ca Thianghlim in hlanlai ihsin a rak sim cia zo.

5Bawipa in Israel mi pawl Izipt ram ihsin a suah ih neh hnuah a zum lotu pawl cu siatralnak ah a thlenter ti hi nan theih ṭheh ciami a si ko nain nan theih sal dingah ka duhmi a si. * 6An thuneih theinak sungah um duh loin an umnak hmun a tlansantu vancungmi pawl kha ciing ringring uh. Annih cu leilung thuai khawthim sungah kumkhua in thir cikcin in khih an si ih a maksakmi Ni ah Pathian in an thu a ṭhen leh hai ding. 7Cuih vancungmi vek thothoin Sodom le Gomorrah khua le a kiangkap khua pawl in nupa sualnak an tuah ih an tisa hiarnak an riamter ti kha hngilh hlah uh: annih pawlih kumkhua meisa ih hremnak an tuarmi kha mi hmuahhmuah hrangah ralrin peknak a si ti a fiang a si. *

8Cubangtuk ṭhiamṭhiam in tuihsan minung pawl khal an si: hmuhnak kan nei an ti ih an taksa an borhhlawhter; Pathian thuneihnak kha an nautat ih vanih a ummi mi sunglawi pawl an zawmtai. 9Vancungmi lakih a upa bik Mikhael hman in cubangtuk in a tuah lo. Moses ih ruak zo in a co ding tiah Satan thawn thu an el awk tikah nautatnak ṭongkam thawn Satan cu a camriam ngam lo; “Bawipa in a lo kawk!” tiah a ti meen a si. * 10Sikhalsehla hi minung pawl cun an theih thei lomi thu poh kha nautatnak thawn an relsiat. Cule ramsa bangtuk in an taksa duhnak in an theih theimi thil pawl cu anmah lala siatsuahtu ah an cang. 11An hmakhua a va pit so! An thlunmi cu Kain ih a rak thlunmi lamzin a si. Paisa duh ruangah Balaam ih a rak tuahmi sualnak ah an taksa pum an pe aw. Korah vekin ral an tho ih Korah bangtuk in siatralnak ah an thleng ve a si. * 12Pawlkomnak rawl nan eitlaang tikah ningzahnak malte hman nei loin an ei an in ruangah a lo hmelsia tertu an si. Anmah ih zawn lawng an ruat. Thli in a zuanpi rero nain ruahti a zawi lomi khawdur bangtuk an si. Fur hmanah rah a nei lomi thingkung bangtuk an si; a hramih phawi suak ih a thi ngahmi thingkung bangtuk an si. 13ṭihnungza tisumsuar bangtuk an si; ningzakza an ziaza ṭha lo cu tiphuul bangin an phuan burhbo; arsi zuang bangtuk an si ih a thuk bik khawthimnak hmunah kumkhua an umnak dingah Pathian in umnak a ngaihtuah sak zo.

14Adam ihsin sanruknak a si mi Enok in himi pawl thuhla hi a rak sim cia zo. “Pathian cu a vancungmi, mithiang thawng tampi thawn, * 15mi hmuahhmuah thuṭhen dingah le Pathian ṭihzahnak zianghman nei loin thil a tuahtu hmuahhmuah le Pathian upatnak zianghman nei lo misual pawl in tuksumza ṭongsiava thawn Amah a relsiattu pawl an thu ṭhen dingah a ra ding a si,” a ti. *

16Himi pawl cu an phunzai ringring ih cat loin midang an relsia, a ṭha lomi an tisa duhnak an thlun; anmah le anmah an khaisaang aw ih an thuthu in ziang hmuahhmuah a feh theinak dingah midang an porh ciamco.

Ralrinnak Le Zirhawknak

17Sikhalsehla ka duhdawtmi tla, kan Bawipa Jesuh Khrih ih tirhthlah pawl in an rak lo zirhnak kha ciing ringring uh. 18Nan hnenih an simmi cu, Ni netnak a thlen tikah nanmah a lo hnihsantu le Pathian ṭihzahnak nei loin anmah ih tisa duhnak a thluntu an suak ding,” tihi a si. * 19Himi pawl cu ṭhenṭheknak a suahtertu le tisa duhnak ih a ukmi le Thlarau a nei lotu an si.

20Asinain nannih ka duhdawtmi pawl cu a thianghlimmi nan zumnak parah ṭhangso vivo uh. Thlarau Thianghlim cahnak thawn thla cam uhla, 21kan Bawipa Jesuh Khrih in a zaangfahnak thawn kumkhua nunnak a lo pek ding ni nan hngah laiah hin Pathian ih duhdawtnak sungah hmun ringring uh.

22Rinhmainak a neimi parah zaangfahnak nei uh; 23midang pawl kha meisa sung ihsin suah uhla rundam suak uh; cule a dang pawl parah zaangfahnak le ṭihnak langter uh, sikhalsehla an tisa hiar sualnak in a hnawihnihmi an hnipuan pawl cu hua uh.

Thluasuah Peknak

24Tlu suak loin a lo kilkhawi ih sualmawhnak nei loin lungawinak thawn a sunglawimi a umnak ah a lo thlenter theitu, 25amah lawng kan Pathian le Runtu a si mi hnen ahcun, kan Bawipa Jesuh Khrih thawngin a cem ciami caan ah siseh, atu le hmailam caanah siseh, sunlawinak, thawmliannak, cahnak le thuneihnak cu kumkhua in kumkhua tiang um camcin hramseh. Amen.

⇑

[Remove Footnotes]