MARKA

Nganmi Thuthang Ṭha

Thuhmaihruai

Marka nganmi Thuthang ṭha hi “Pathian Fapa Jesuh Khrih ih Thuthang ṭha,” tiih hramthokmi a si. Hi cabu sungah hin Jesuh Khrih cu cat loih hna a ṭuantu le thuneizet mipa tiin a lang. A thuneihnak cu mi a zirhnak, khuavang a dawi theinak le misual a ngaidam theinak parih hmuh theimi a si. Jesuh amah in, “Kei cu Milai Fapa ka si ih misual pawl sualnak ihsin luatnak dingah ka ra a si,” a ti.

Marka in Jesuh thu a ngan tikah tluang zetin a ngan. A ṭongmi le a zirhmi hnakin a tuahmi kha thupi sawn in a la ih a ngan. Baptisma petu Johan thu malte a sim hnuah Jesuh ih baptistma a laknak le sualforh a tuarnak thu a ngan ih cuih hnu ah Jesuh ih thuzirhnak le mi a damternak thu a ngan. Malte a hung rei deuh tikah a thluntu pawl in a thinlung an hmu thei deuh. Asinain a duh lotu pawl in an hua sinsin ve. A neta bikah Jesuh thinglamtah parih an khen-behnak le a thawhsalnak thu a sim.

Marka Thuthang ṭha hin “Netnak,” pahnih a nei. A pahnih hin kulhte (parenthesis) sungih nganmi an si. Ziangah tile Marka ih a nganmi si loin midang ih ngan beetmi a si, tiah zumnak a um.

Thutlangpi
Thuthang ṭha thoknak (1.1-13)
Galilee ih Jesuh hnaṭuannak (1.149.50)
Galilee ihsin Jerusalem ah (10.1-52)
Jerusalem khawsung le kiangkapah zarh khat sung (11.115.47)
Jesuh ih thawhsalnak (16.1-8)
Jesuh ih langnak le vancung kainak (16.9-20)

Marka 1

Baptisma Petu Johan Thusimnak

(Mat 3.1-12; Luk 3.1-18; Joh 1.19-28)

1Pathian Fapa Jesuh Khrih ih Thuthang ṭha cu hiti in a si. 2A thokah profet Isaiah in:

3Mi pakhat cu ramṭhingah a au ih,

4Curuangah Johan cu ramṭhing ihsih a ra ih baptisma a pek hai ih thu tla a sim phah vivo. Mipi pawl kha, “Nan sualnak sir uhla baptisma lak uh. Cuticun Pathian in nan sualnak a lo ngaithiam ding,” tiah a ti. 5Judea peng le Jerusalem khawpi ihsin mi tampi Johan ih thusimmi ngai dingah an ra. Ah sualnak ah phuang ih Jordan tiva ah baptisma a pek hai.

6Johan cu kalauk hmulih tahmi hnipuan a hruk ih a taai ah savun taaikhap a khap. A rawl eimi cu kharbok le hramlak khuaitizu an si. 7Mipi hnenah, “Ka dungih a ra dingmi pa cu keimah hnakin a nasa sawn a si. Kun tahrat in a kedam hri phoih saktu ding hmanah kei cu ka tlak lo. 8Kei cun tidai in baptisma ka lo pek. Asinain anih cun Thlarau Thianghlim in baptisma a lo pek hai ding,” tiah a ti.

Jesuh Baptisma Le Hniksaknak

(Mat 3.13–4.11; Luk 3.21-22; 4.1-13)

9Cuih hnu rei loteah Galilee peng Nazareth khua ihsin Jesuh cu a ra ih Jordan tiva ah Johan in baptisma a rak pek. 10Jesuh cu ti sung ihsin a hung suah vete in van a ong aw ih Thlarau cu thuro bangin a parih a rung fut kha a hmu. 11Van ihsin aw pakhat a rung thang ih, “Nangmah cu ka duhdawtmi ka Fapa na si. Na parah ka lung a kim ngaingai,” tiah a run ti.

12Hmakhatteah Jesuh cu ramṭhing ah Thlarau in a fehter ih 13cutawkah ni sawmli a um ih Satan in a hniksak. Ramsa pawl thawn an um. Asinain vancungmi pawl in an rung tuamhlawm.

Jesuh In Nga Kaitu Pali A Ko

(Mat 4.12-22; Luk 4.14-15; 5.1-11)

14Johan kha thawngih an thlak hnuah Jesuh cu Galilee ah a feh ih Pathian ih Thuthang ṭha a sim. 15“Tikcu a kim zo ih Pathian Uknak a nai zo. Nan sualnak pawl sir uhla Thuthang ṭha cu zum uh,” tiah a ti.

16Jesuh cu Galilee Tili kapih a feh laiah ngakaitu pahnih Simon le a nau Andru kha sur in nga an kaih rero laifang a hmu. 17Jesuh in an hnenah, “I thlun uhla milai kaitu ah ka lo tuah ding,” a ti. 18Hmakhatteah an sur an taan ih amah cu an thlun.

19Hla deuh a va feh ih Zebedi ih fapa Jeim le Johan te unau hnih a hmu. Anmah cu an long sungah an um ih an sur an tholh rero. 20Jesuh in a hmuh vete in an pahnih in a ko. Cuticun an pa Zebedi le an hlawhfa pawl cu long sungah cun an taan ih Jesuh cu an thlun.

Khawsia Polhmi

(Luk 4.31-37)

21Jesuh le a dungthluntu pawl cu Kapernaum khua ah an ra ih a thaisun Sabbath ni ah Jesuh cu pumkhawmnak inn Sinakok ah a feh ih thu a zirh. 22A thuzirh daan a theitu pawl cu an mang a bang ngaingai, ziangah tile Daanthiam pawl vek a si lo, anih cun thunei zetin a zirh a si.

23Cuih caanah khawsia in a polhmi mipa pakhat cu Sinakok ah cun a ra ih, 24“Nazareth mi Jesuh, ziangso kannih in hai? Kanmah siatsuah dingah maw na rat? Zo na si ti ka lo thei: Pathian ih thlahmi Mi Thianghlim na si,” tiah a au ciamco.

25Jesuh in khawsia cu, “Daite in um aw! Kha pa sung in suak aw!” tiah thu a pek.

26Khawsia in cupa cu nasa zetin a thin ih ring zetin a auter hnuah a suak. 27Mipi cu an mang a bang ngaingai ih pakhat le pakhat, “Ziangvek thu so a si? Zirhnak thar phun khat maw a si? Hi pa hi khawsia parah thu a nei ih ‘Suak uh!’ a tile an suak fawn,” tiah an ti aw.

28Cuticun Jesuh thuhla cu Galilee peng khuazakip ah zamrang zetin a thang.

Jesuh In Mi Tampi A Damter

(Mat 8.14-17; Luk 4.38-41)

29Jesuh le a dungthlun pawl cu Jeim le Johan tel in, sinakok ihsin an feh ih Simon le Andru inn lam pan in an feh. 30Simon ih pizon kha khurhnat in a na ih a tho thei lo; Jesuh a thlen vete in a nat thuhla cu an sim. 31Mina hnenah cun a feh ih a kut a kai ih a thawhter. A khurhnat cu a reh lohli ih anmah a tuamhlawm thei.

32Ni a tlak ih zanlam a si tikah mipi in mina hmuahhmuah le khawsia ih polhmi pawl kha Jesuh hnenah an rat pi. 33Cuih khuaih mi hmuahhmuah cu cuih inn hmai ah cun an ra tong khawm aw ṭheh. 34Jesuh in an natnak phunphun kha a damter ih an sungih khawsia pawl tla a dawisuak ṭheh. Khawsia pawl cu kam khatte hman a ṭongter lo; ziangah tile zo a si ti kha an thei.

Galilee Ah Jesuh Thu A Sim

(Luk 4.42-44)

35A thaizing, zingthlapit ni suah hlanah, Jesuh cu a tho ih inn ihsin a suak. Hnarpawn ah a suak ih mi um lonak ah thla a cam. 36Asinain Simon le a rualpi pawl cu amah hawl ah an feh ih, 37an va hmuh tikah a hnenah, “Mi hmuahhmuah in an lo hawl,” tiah an sim.

38Asinain Jesuh in, “Hi kiangkap khua pawl khalah kan feh vivo ding, ah hnenah thu ka sim ve ding, ziangah tile cucu ka rat hnawhsanmi a si,” tiah a ti.

39Curuangah Galilee peng pumpuluk tlawng in sinakok ah thu a sim vivo ih khawsia pawl a dawi suak vivo a si.

Jesuh In Mi Pakhat A Damter

(Mat 8.1-4; Luk 5.12-16)

40Phaarnat in a na mipa pakhat cu Jesuh hnenah a ra ih a khuk bilh in, “Na duh a si ahcun i thiangter thei ko,” * tiah bomnak a dil.

41Jesuh cun a zaangfah ngaingai ih a kut in a hei dawh hnuah a tham ih, “Ka lo thiangter duh zet a si, thiang thlang aw,” tiah a ti.

42Hmakhatteah a phaarnat cu a dam ih a thiang. 43Cule Jesuh in cupa cu a fehter ih, fektein thu a tiam, 44“Ngai aw! Hi thu hi zohman na sim lo pei. Puithiam hnenah va feh vurvo awla rak lo zohseh; cule mi hmuahhmuah in a dam a si ti an lo theihnak dingah Moses thupekmi vekih thawinak va pe aw,” tiah fektein thu a tiam.

45Asinain cupa cu a feh ih a damnak thu cu hmunkip ah a than vivo. Cuih thu a rel tamtuk ruangah Jesuh cu khawsungah mi hmuhhngan in a feh thei nawn lo. Hnarpawn fianhrial sawnah amah lawng a um ih cutawkah hmunkip ihsin mi in an ra pan.

⇑

[Remove Footnotes]