MATTHAI

Nganmi Thuthang Ṭha

Thuhmaihruai

Matthai Thuthang ṭha sungah Jesuh cu Thukam Hlun cabu sungih rak kam ciami Runtu Bawipa a si, ti langternak ih nganmi a si. Pathian in Jesuh sungin a minung pawl hnenih a thukamnak a kimter ti tla a lang. Jesuh cu Judah mi sungin a suak ih a nung, a sinan a Thuthang ṭha cu Judah mi hrang lawngah a si lo, leilung pumpuluk hrangah a si.

Matthai cabu hi ralringte in a sangsang ih nganmi a si. Jesuh suahnak in a thok ih cuih hnu ah baptistma a laknak, sualforh a tuarnak le a thusimnak, a thuzirhnak le Galilee ih mi a damternak thu pawl an si. Hi thu pawl a ngan hnuah Jesuh cu Galilee in Jerusalem lamih khual a tlawnnak le a nun sungih zarh neta bik thuhla a si ih thinglamtah parah an khennak le a thawhsalnak thuhla pawl an si.

Matthai Thuthang ṭha hin Jesuh cu zirhtu thiam zet a si ti a langter ih Pathian pekmi Daan tla a simfiang theitu a si ih Pathian Uknak thu tla zirhtu a si, ti a langter fawn. A thuzirhmi hmuahhmuah hi ṭhen nga ah ṭhen a theih.

(1) Tlangpar thuzirhmi sungah vancung Uknak sungih sungtel a si mi pawl ih ziaza, ṭuanvo, covo le tumtah dingmi pawl a sim (Bung 5-7)

(2) Dungthluntu hleihnih pawlih theih ṭulmi pawl (Bung 10)

(3) Vancung Uknak thu tahṭhimnak pawl (Bung 13)

(4) Dungthluntu si hi a tican ziang an si ti zirhnak le (Bung 18)

(5) Hi sancemnak le a ra lai dingmi vancung Uknak thu pawl (Bung 24-25)

Thutlangpi
Jesuh ih pupa pawl le a suahnak (1.1-2.23)
Baptisma petu Johan ih hnaṭuannak (3.1-12)
Jesuh baptisma laknak le sualforhnak (3.13-4.11)
Galilee ramih Jesuh hnaṭuannak (4.12-18.35)
Galilee ihsin Jerusalem tiang (19.1-20.34)
Jerusalem khuasung le kiangkap ah (21.1-27.66)
Jesuh thawhsalnak le langnak (28.1-20)

Matthai 1

Jesuh Khrih Suahkehnak

1Jesuh Khrih suahkehnak cu hi bangtuk in a si. Amah cu Abraham ih cithlah David ih tesinfa a si.

2Abraham ih fapa cu Isaak a si. Isaak ih fapa cu Jakob a si. Jakob ih fapa cu Judah le a unau pawl an si. 3Judah ih fapa cu Perez le Zerah an si (an nu cu Tamar a si), Perez ih fapa cu Hezron a si, Hezron ih fapa cu Ram a si, 4Ram ih fapa cu Amminadab a si, Amminadab ih fapa cu Nahshon a si, Nahshon ih fapa cu Salmon a si, 5Salmon ih fapa cu Boaz a si (a nu cu Rahab a si), Boaz ih fapa cu Obed a si (a nu cu Ruth a si), Obed ih fapa cu Jesse a si. Jesse ih fapa cu siangpahrang David a si.

6David san ihsin Israel mi pawl Babilon ram sal an taan tiang an pupa pawl cu a tanglam vekin an si. David ih fapa cu Solomon a si (a nu cu Uriah nupi a rak si.) 7Solomon ih fapa cu Rehoboam a si, Rehoboam ih fapa cu Abijah a si, Abijah ih fapa cu Asa a si. 8Asa ih fapa cu Jehoshafat a si, Jehoshafat ih fapa cu Joram a si. Joram ih fapa cu Uzziah a si. 9Uzziah ih fapa cu Jotham a si, Jotham ih fapa cu Ahaz a si, Ahaz ih fapa cu Hezekiah a si, 10Hezekiah ih fapa cu Manasseh a si, Manasseh ih fapa cu Amon a si, Amon ih fapa cu Josiah a si. 11Josiah ih fapa cu Jehoiakhin le a unau pawl an si.

12Babilon saltaannak ihsin Bawi Jesuh suah tiang a tanglam vek an si. Jehoiakhin ih fapa cu Shealtiel a si, Shealtiel ih fapa cu Zerub-babel a si, 13Zerub-babel ih fapa cu Abiud a si, Abiud ih fapa cu Eliakim a si, Eliakim ih fapa cu Azor a si, 14Azor ih fapa cu Zadok a si, Zadok ih fa pa cu Akhim a si, Akhim ih fapa cu Eliud a si, 15Eliud ih fapa cu Eleazar a si, Eleazar ih fapa cu Matthan a si, Matthan ih fapa cu Jakob a si, 16Jakob ih fapa cu Josef a si, Josef cu Mari ih pasal a si, Mari in Messiah timi Jesuh a hring.

17Curuangah Abraham ihsin David tiang san hleili, David ihsin Babilon i sal an taan tiang san hleili, sal an taan ihsin Messiah a suah tiang san hleili a si.

Jesuh Khrih Suahnak

(Luk 3.23-38)

18Jesuh Khrih suahnak cu hiti in a si. A nu Mari cu Josef thawn an ham aw ih an ṭhit-awk hlanah Thlarau Thianghlim ih fa ka nei ding ti a thei. 19A hamtu Josef cu mi ṭha a si ruangah Mari kha mi hmaiah ningzak ih umter a duh lo ih an hamawknak cu a thupte ih phelh saal a tum. 20Cumi thu a ruah rero laiah a mang ah Bawipa ih vancungmi pakhat a hnenah a lang ih, “David tefa sin Josef, Mari hi na nupi ih ṭhit dingah ṭih hlah. Ziangah tile fa a vunnak hi Thlarau Thianghlim thawngin a si. 21Amah in fapa a hring ding ih a hmin ah Jesuh tiah na sak pei, ziangah tile a minung pawl kha an sualnak ihsin a run suak ding a si,” tiah a ti.

22Bawipa in profet hnen in, 23“Fala him pakhat in fa a vun ding ih fapa a hring ding, a hmin ah Immanuel tiah an ko ding,” tiih a rak sim ciami a kimnak dingah hi bangtuk in thil a hungcang a si. (Immanuel ti mi cu, “Pathian kan hnenah a um,” tinak a si.)

24Josef cu a hung ṭhang ih, Bawipa ih vancungmi ih a fial vekin Mari cu a ṭhit. 25Asinain fapa a hrin hlantiang a ihpi lo. Fapa a hring ih a hmin ah Jesuh tiah a sak.

⇑

[Remove Footnotes]