FILEMON

Hnenih Paul Cakuat

Thuhmaihruai

Filemon hi rinsantlak Khristian pakhat a si ih Kolose Kawhhran sungtel a si. Onesimas timi sal a rak neitu khal a si. Onesimas cu a neitu a pu Filemon hnen ihsin a tlan ih ziangti in maw Paul thawn an rak tong aw. Culai ah Paul cu thawngtla a si. Paul ih ruangah Onesimas cu Khristian ah a cang.

Hi cakuat hi Filemon hnenah Paul in a kuat kirmi a salpa thawn rem aw sal dingah a dil ih ngaithiammi salpa dinhmun ih cohlan ding lawng si loin Khristian unau pakhat dinhmun ah cohlang dingin a dil saknak ca a si.

Thutlangpi
Thu hramthoknak (1-3)
Filemon a lomnak (4-7)
Onesimas hrang a dilnak (8-22)
A netnak cibai buknak (23-25)

Filemon 1

1Khrih Jesuh ruangah thawng a tlami keimah Paul le kan unau Timote in kan rualpi le kan hnaṭuanpi Filemon na hnenah le, 2na innih a khawmmi Khristian unau pawl, kan farnu Apfia le kan ralkappi Arkhippas hnenah ca kan lo kuat.

3Kan Pa Pathian le kan Bawipa Jesuh Khrih in zaangfahnak le daihnak lo pe hramseh.

Filemon Ih Duhdawtnak Le Zumnak

4Ka unau Filemon, thla ka cam tinte ka lo thei ih ka Pathian hnenah lungawi thu ka sim ringring. 5Ziangah tile Pathian minung pawl na duhdawtnak le Bawipa Jesuh na zumnak thu ka thei. 6Na rinnak thu cu midang na sim ve theinak dingah thla ka lo cah sak; cuticun Khrih ih kan neihmi thilṭha hmuahhmuah hi famkim zetin na theithiam ngah ding. 7Duhdawtmi unau pa, duhdawtnak na neihmi in lungawinak le thazaang tampi i pe ih Pathian minung pawl an zatein an thinlung na nuamter ṭheh a si.

Onesimas Hrang Dilnak

8Cutiin Pathian minung pawl parih duhdawtnak na neih ruangah le Khrih sungih na unau ka si ruangah na tuah dingmi a si ti ih ka ruahmi cu ralṭha zetin thu lo pe ding ka si nain cuticun ka lo ti lo ding. 9Ziangah tile duhdawtnak na parih ka neih ruangah a dil lam sawn in ka lo dil. Khrih Jesuh ih palai, * atu laifangah thawngih a tlami keimah Paul in, 10Onesimas ai-awh in ka lo dil. Amah cu Khrih sungah ka fapa ngaingai a si; ziangtin tile thawng sungah thlarau lamin a pa ah ka cang a si. 11Tuih hlanah cun na hrangah santlaihnak zianghman a nei lo. Sikhalsehla atu cu nangmah le keimah ih hrangah santlai * zet a si thlang.

12Atu-ah amah cu ka duhdawtnak thawn na hnenah ka rak kuat. 13Thuthang ṭha ruangih thawng sungih ka um laiah hin, nangmah ai-ih i bawmtu dingah amah hi ka hnenih umter hrih ka duh. 14Sikhalsehla ka umter lo ding; ziangah tile na duh lo cingih i bawm seh ticun ka ti lo ding. Na thinlung thote in le nangmah ih palung in na tuahmi kha ka duhmi a si. Curuangah na lungkimnak a um lomi zianghman ka tuah lo ding.

15Onesimas thawn caan tawite sung nan ṭhen awk hi ṭhen aw nawn loin kumkhua nan umtlang theinak dingah a si meen ding. 16Atu-ah cun sal ti meen ding a si nawn lo; sal hnakin a uak deuh ngaingai zo: Khrih sungah duhdawtmi unau a si zo. Ka duhzetmi a si. Nang khal in sal a si lawng si loin Bawipa ih sungih unau a si zo ruangah na duh sinsin ding.

17Curuangah keimah hi na hnaṭuanpi ah i ruat a si ahcun keimah i cohlan vekin amah khal na rak cohlang ve dingah ka duh. 18Thil a ti sualmi le a lo baakmi a um ahcun keimah ih sam dingin ret aw. 19Hitawk ah keimah ih kut rori in, Keimah Paul in ka kuan ding tiah ka ngan a si. (Tuih na nunnak khal hi keimah ih ruangah a si ti cu lo sim ṭul in ka ruat lo.) 20Curuangah ka naupa, kan Bawipa ih ruangah hi ka lo dilmi hi i rak tuahsak hram aw; Khrih sungih unau suak khat kan si bangin ka thin i nuamter hram aw.

21Hi ca ka ngan phah ahhin ka lo fialmi cu na tuah ding tiah ka zum ih ka lo fialmi hnakin tam sawn na tuah ding ti ka thei. 22Cuih tlunah innkhaan pakhat a ciain i rak ret sak aw. Ziangah tile Pathian in nan zate ih thlacamnak cu a thei ding ih nan hnenah i thlengter ko ding tiin ruahsannak ka nei.

A Netnak Cibaibuknak

23Khrih Jesuh ruangah ka thawngtlakpi Epafras in cibai a lo buk. 24Cule ka hnaṭuanpi Marka le Aristarkas le Demas le Luka tla in cibai an lo buk ve.

25Kan Bawipa Jesuh Khrih zaangfahnak cu nan zate hnenah um hramseh.

⇑

[Remove Footnotes]