FILIPI

Kawhhran Hnenih Paul Cakuat

Thuhmaihruai

Filipi pawl hnenih Paul cakuat hi Europe ramah a din hmaisa bikmi Filipi Kawhhran ah a kuatmi a si. Filipi cu Masidonia pengah a um ih Rom Acozah ih ukmi a si. Paul in Filipi Kawhhran ca a kuat tikah hin amah hi thawng sungah a um. A cuih thawng sungih a um laiah cun Khristian hnaṭuantu dang pawl in an dodal ih tlunah Filipi Kawhhran sungah zirhtu dik lo pawl an um. Cumi ruangah Paul cu a thinlung a har ngaingai. Asinain a cakuatmi hi lungawinak le hnangamnak in a khat ih acuih lungawinak le hnangamnak pawl tla cu Jesuh Khrih a zumnak ruangih a ngahmi a si ti kha a langter.

Paul cu thawng a tla ih harsa zetih a um laifangah Filipi Kawhhran pawl in bomnak an kuat. Cumi lungawi thu simsaal dingah hi cakuat hi a ngan. Filipi Kawhhran khal siseh Paul khal siseh thinhar ih um veve cu an si ko nain Paul in himi tikcu hi caan ṭha ah a ruat ih Filipi pawl thapeknak le hnemnak ah a hmang. Porh awknak le hamṭamnak ih ukmi si loin Jesuh Khrih bangtuk ih tangdornak lungput neih dingah zaangfah a dil. Khrih thawn thinlung hmun khatih an um theinak kha Judah daan an thlun thei ruangah si loin zumnak ruangah Pathian zaangfahnak laksawng a si sawn ti kha a theihter sal. Jesuh Khrih thawn thinlung hmun khatte ih a umtu pawl hnenah Pathian in lungawinak le hnangamnak a pek a si ti thu khal a ngan.

Hi cabu sungah hin lungawinak, hnangamnak, thinlung hmun khatnak le Khristian nunnak le zumnak sungih tuartheinak tla hi thuuk deuh le hminsin tlak deuh in a langter. Filipi Kawhhran a duhdawtnak thu khal a langter.

Thutlangpi
Thuhmaihruai (1.1-11)
Paul umnak ih thil a cangmi pawl (1.12-26)
Khrih sungih nunnak (1.27-2.18)
Timote le Apafroditas hrang khawkhannak (2.19-30)
Ṭihnungza le ral pawl thu ralrinnak (3.1-4.9)
Paul le Filipi mi a rualpi pawl (4.10-20)
Thunetnak (4.21-23)

Filipi 1

1Khrih Jesuh ih sal a si mi Paul le Timote in, Khrih Jesuh thawn a pehzom awmi Filipi khuaih Pathian minung a ummi hnenah le nan Kawhhran sungih hruaitu le upa pawl hnenah ca kan lo kuat.

2Kan Pa Pathian le Bawipa Jesuh Khrih in zaangfahnak le daihnak lo pe hramseh.

Paul In An Hrangah Thla A Cam

3Nanmah ka lo ruah tinte in ka Pathian parah ka lung a awi. 4Nan zate hrang thla ka cam tinte in lungawinak thawn thla ka cam, 5ziangah tile Thuthang ṭha hnaṭuannak ah hin a thokpekte ihsin tuihsun tiang nanmah cu i bawm ringringtu nan si. 6Curuangah nanmah sungih hnaṭuan ṭha a thoktu Pathian in Khrih Jesuh ih Ni a ra thlen tikah cumicu a ṭuansuak ding tiah ka thei fiang. 7Nanmah cu ka thinlung sungah nan caam ringring. Nan parih hi bangtuk thinlung ka neihmi hi nei ding mawi ka si. Ziangah tile atu thawng sungih ka um laiah siseh, luatzetin Thuthang ṭha ka ṭanpi ih cuih Thuthang ṭha hngetkhoh sinsin dingih ka ṭuannak ah siseh, Pathian zaangfahnak ruangih ka comi ṭuanvo ahhin nan zatein nan tel ringring ve a si. 8Khrih Jesuh ih zaangfah thinpemnak sungah ziangtlukin ka lo ngai hai, timi thudik ka simmi i theihpitu cu Pathian a si.

9Pakhat le pakhat nan duh awknak cu theihnak dik le thu thleidan thiamnak thawn a ṭhanso vivonak dingah thla ka cam a si. 10Cuti in nan ṭhang a sile a ṭha bikmi kha hriil nan thiam ding. Cule Khrih Ni ahcun borhhlawhnak le mawhthluknak hmuahhmuah ihsin nan thiangfai ding. 11Jesuh Khrih lawngih pek theihmi ziaza ṭha taktak cu nan nunnak ah a khat ding ih cumicu Pathian thangṭhatnak le sunlawinak ah a si ding.

Khrih Hrangah Nung Ding

12Ka u le ka nau pawl, ka parih a ra thlengmi thil pawl hi Thuthang ṭha karhzaitertu riangri ah an cang, tihi nan theih dingah ka duh a si. 13Hi thil ruangah hin, siangpahrang inn kilvengtu hmuahhmuah le hitawk ih midang pawl khal in Khrih sal ka si ruangah thawngah in thlak kha an thei ṭheh a si. 14Cule thawng ka tlaknak hin kan unau tam sawn cu Bawipa an rinsannak a hngetkhohter ih an ral a ṭha sinsin ih ngamzetin thu an sim.

15Mi ṭhenkhat cun in iksiik ruangah le thu-el duh pawl an si ruangah Khrih thu cu an sim ngai; sikhalsehla a hrek cu thinlung tluangtlammi an sinak in Pathian thu an sim. 16Cupawl cu duhdawtnak an neih ruangah an sim, ziangah tile Thuthang ṭha a ṭantu dingah Pathian in ṭuanvo i zem hi an hmu. 17Mi hrekkhat pawl cu thinlung tluang zetin Khrih thu sim loin anmah hamṭam zawnruahnak thinlung thawn an sim. Thawng ih a um laiah hin harsatnak betcih vivo uhsi tiin an ruat.

18Zianghman a poi lo. Ka lung a awizet ko; thinlung ṭha lo thawn an simah siseh, thinlung tluangih an sim khalah siseh, Khrih thu an sim poh ahcun ka lung a awi thotho ko ding. 19Ziangah tile nanmah ih thlacamnak le Jesuh Khrih ih Thlarau hnen ihsin a rami bomnak thawngin luatter ka si ding, ti ka thei. 20Ka duh bikmi le ka hngakhlap zetmi cu ṭuanvo ka neihmi hi tuahsuak hram ningla, cule ziangtik caan khalah le a hleice in atu fang hrimhrim ahhin, ralṭhatnak thawn khat tahratin ka nunah siseh, ka thihah siseh, ka thinlung ka taksa zate thawn Khrih hi upat hmaihngalnak pe thei ningla, tihi a si. 21Nun timi hi ziangso a si? Kei ka hrangah cun nun cu Khrih a si. Curuangah thih khal le a hlawk sinsin. 22Sikhalsehla nungin thil man nei deuh ka tuah thei a si ahcun khuimi sawn ka hriil ding ka thei lo. 23Ka thinlung kaa hnih ah a feh. Hi nunnak hi tlansan ih Khrih thawn um cu ka duhzet; cumicu a ṭha deuh ngaingai. 24Sikhalsehla ka nun hrih ding cu nan hrangah a rak ṭulzet fawn. 25Cumi cu fiangtein ka theih ruangah ka nung hrih ko ding. Zumnak sungah nan ṭhansonak le nan lungawinak kha a lo betbawmtu si dingah nan hnenah ka nung rei hrih ding a si. 26Cuticun nan hnenih ka ra thlen sal tikah, Khrih Jesuh thawn nan nunnak cu a pehzom awk ruangah, keimah parah hmaihngalnak tampi nan nei ding.

27Atu laiah a thupimi cu Khrih Thuthang ṭha ih duh daan vekin nan nuncan cu si thei sehla, cuticun ka ra lo ton thei ah siseh, ton thei lo khalah siseh, tumtahmi pakhat nei in fektein nan ding ih Thuthang ṭha hrangah hmun khatah thinlung rualtein ral nan dotlang ti kha ka thei ding a si. 28Nan ral pawl kha ṭih hlah uh. Ralṭha zetin um uh. Cumi cun annih an sung ding ih nannih nehtu nan si ding ti kha a langter ding; ziangah tile nehnak a lo petu cu Pathian a si. 29Khrih nan zumnak lawngah si loin amah ih hrang nan tuarnak khalah covo zemmi nan si hi mi vannei nan si. 30Curuangah atu cun raldonak sungah ka hnenah nan tel thei ve ding. Cumi ral cu kan dung khalah ka rak do zo ti nan hmu ih, atu khalah nan theih vekin ka do rero lai a si.

⇑

[Remove Footnotes]