THUPHUAN

Johan Hnenih Langtermi Thuphuan

Thuhmaihruai

Hi Thuphuan hi Khristian pawl hremnak an tuar caanih nganmi a si. Cuti hremnak an tuarnak cu Jesuh Khrih an zum ruangah a si. Cangantu ih a tumtah bikmi cu a ca siartu pawl ruahsannak le tha-thawhnak pek a duhmi a si ih harsatnak le hremnak an tuar lai caanah Khrih an zumnak tlansan lotein an hnget theinak dingah a forh.

Hi cabu sungah a tam sawn cu Johan hnenih phuanmi le Johan in hmuhnak a neihmi pawlih thu a si. Hi phuanmi le hmuhmi pawl cu a thluathlam lawngih phuanmi a si ruangah a rak siartu Khristian pawl cun a tican an thei ding nain mi dang hrangah cun tican nei lo, thuthup bangtuk a si. Asinain theih theinak dingah fiangtertu tamzet a um ko. Pathian thangṭhatnak hla kan sak tikah a thusirhsan cu nolhsal vivo a si ṭheu vekin hi Thuphuan cabu sung khalah hin a thusirhsanmi cu hmuhnak le phuannak a phunphun in a nolhsal vivo ve a si.

Hi Thuphuan cabu sungih a ummi thu hi, a thuterek tete-ah cun el awknak le hriilhfiahnak phun dangdang um hmansehla a thutlangpi ahcun ruahnak le hriilhfiahnak a bangrep sawh ko. Cuih a thutlangpi cu: Pathian in Bawi Jesuh Khrih sungin a ral pawl hmuahhmuah le Satan khal a neh fai thluh ding ih cutin nehnak famkim tikcu caan a thlen tikah Amah a zumtu pawl le rinsan tlakmi pawl cu van thar le lei thar co theinak thlawsuah laksawng a pe ding, tihi a si.

Thutlangpi
Thu hramthoknak (1.1-8)
Hmuhnak hramthok le Kawhhran pasarih hnen cakuat (1.9-3.22)
Cazual le tacik pasarih (4.1-8.1)
Tawtawrawt pasarih (8.2-11.9)
Rulhreng le sahrang pahnih (12.1-13.18)
Hmuhmi a phunphun (14.1-15.8)
Pathian thinhengnak kheng pasarih (16.1-21)
Babilon siatsuahnak, sahrang le profet sual, le Satan nehnak (17.1-20.10)
Neta bik Thuṭhennak (20.11-15)
Van thar, lei thar le Jerusalem thar (21.1-22.5)
Thunetnak (22.6-21)

Thuphuan 1

Johan Hnenih Thuphuan

1Hi thu hi Jesuh Khrih ih a phuanmi a si. A ra thleng cing dingmi thil kha a siahhlawh pawl hnenih langter dingah Pathian in a hnenih a hmuhtermi a si. Cumi cu Khrih in a vancungmi pakhat thlah tahratin a siahhlawh Johan hnenih a theihtermi a si. 2Cule Johan in a hmuhmi hmuahhmuah cu a sim ṭheh. Pathian hnen ihsin a rami thuthang le Jesuh Khrih ih a langtermi thutak cu Johan in hi bangtuk in a sim. 3Hi cabu a siartu le profet thusimmi a theitu le hi cabu sungih a ummi a thluntu pawl cu mi lungawi an si. Ziangah tile hi thu pawl a kimnak tikcu a nai zo.

Kawhhran Pasarih Cibai Buknak

4Asia peng sungih a ummi Kawhhran pasarih hnenah keimah Johan in thu ka lo cah:

Atuih caanah a ummi le a rak um zomi le hmailam khalah a um lai dingmi Pathian le a bawi tokham hmaiih a ummi thlarau pasarih le, 5rintlak a si mi thutheitu, hrin hmaisa bik a si mi Fapa, thihnak ihsin thawhtersal a si mi leilung siangpahrang pawl uktu Jesuh Khrih in zaangfahnak le daihnak lo pe hramseh.

Kannih in duhdawt ih a thihnak thisen thawngin kan sualnak ihsin in luatter zo. 6Puithiam bangin a siangpahrang uknak sungah Pathian le a Pa riantu si dingah kannih cu in tuah zo. Curuangah sunlawinak le huham cu Jesuh Khrih hnenah kumkhua in um koseh. Amen.

7Zoh uh! Khrih cu mero thawn a ra ding ih mi hmuahhmuah in an hmu ding; amah a suntu pawl khal in an hmu ding. Leilung tlun minung hmuahhmuah an ṭap-ai ding. Cutiin a si hrimhrim ding. Amen.

8Bawipa Pathian in, “Keimah cu Alfa le Omega ka si,” a ti; Amah cu atuih a ummi le a rak um zomi le hmailam khalah a um lai dingmi Ziangkimtithei a si.

Johan In Khrih A Hmu

9Keimah cu nan unau Johan, Jesuh a thluntu ka si ih Khrih uknak sungih a telmi pawl parih a rathlengmi harsatnak nan tuarmi khal a tuar vemi ka si. Pathian thu le Jesuh ih phuanmi thutak ka sim ruangah Patmos tikulh ah in ret. 10Bawipa Ni ah Thlarau in i zeel ih ka dunglam ihsin tawtawrawt vekin a ring zetmi aw thawm ka thei. 11“Na hmuhmi hi ca sungah ngan awla Efesa, Smarna, Pergamum, Thiatira, Sardis, Filadelfia le Laodisia khua pasarih ih a ummi Kawhhran pasarih hnenah kuat aw,” tiah i ti.

12Cutiih i titu cu zoso a si tiah ka her ih ka zoh tikah sui meisa vannak tung pasarih ka hmu. 13Cuih meisa vannak tung pasarih lakah milai a bang zetmi pakhat a ding ih a kebeu tiang angki fual hrukin sui ṭaangkap a ṭaangah a kap ka hmu. 14A sam cu tuuhmul le vur bangtuk in a rang. A mit cu meiling bangin a vaam. 15A ke cu somei sungih an thianter hnuah an hnawtfaimi daar vekin a tle. A aw cu tipilian tlasuar thawm bangtuk a si. 16A vorhlam kut in arsi pasarih a keng ih a kaa sung ihsin kaphnih hriam ralnam pakhat a suak. A mithmai cu sun laitakih ni bangin a tleu. 17Cutiin ka hmuh tikah mithi bangin a kehram ah ka riil. A vorhlam kut in i run tham ih, “ṭih hlah aw! Keimah cu a hmaisa bik le a neta bik ka si. 18A nungmi khal ka si. Ka rak thi nain atu-ah kumkhua hrangin ka nung sal zo. Thihnak le mithi khua tlunah thuneitu ka si. * 19Curuangah na hmuhmi thil pawl, atuih a ummi le hmailamih a um lai dingmi thil pawl hi ngan aw. 20Ka vorhlam kutih na hmuhmi arsi pasarih le sui mei vannak tung pasarih ih tican thuthup cu hi bangtuk in a si. Arsi pasarih cu Kawhhran pasarih ih vancungmi an si ih mei vannak tung pasarih cu Kawhhran pasarih an si,” tiah a ti.

⇑

[Remove Footnotes]