ROM

Khuami Hnenih Paul Cakuat

Thuhmaihruai

Paul in Rom pawlpi hnenih a kuatmi ca hi Paul amah rori Rom khua Kawhhran hnenah tlawn a duh ruangah a lamzin sial cia dingih a cahnak ca a si. A tumtahnak ahcun cutawkih um Khristian pawl hnenah malte lai hnaṭuanta in anmah ih bomnak thawn Spain ih feh lan ding a si. Khristian zumnak thu le a cuih zumnak thu ruangah Khristian pawl ziangtinso nitin sullam nei in kan nung ding ti kha amah ih theihnak vekin simfiang dingah a nganmi a si. Himi cauk sungah Paul in a sim mi thu a thupi pawl hmuahhmuah famkim tein a um.

Rom khuaih Kawhhran pawl kha cibai a buk hnu le an hrangih thla a camsak thu a sim hnuah Paul in a cakuatmi ih tumtah bikmi, “Pathian in ziang bangtuk in amah le minung karlakah remnak a tuah ti kha a langter. Cumi cu a hramthok ihsin a netnak tiang zumnak thawngin a si,” timi kha a sim. (1.17)

Cule Paul in a thu sirhsan kha tlamtling tein a langter. Judah mi siseh Zentail mi siseh milai hmuahhmuah Pathian thawn rem awk kan ṭul. Ziangah tile kan zatein sualnak hnuai ah kan um. Minung cu Jesuh Khrih zumnak thawngin Pathian thawn rem awkter mi kan si. Cumi hnuah Pathian thawn kan peh awknak thar ihsin a ra suakmi Khrih thawn nuntlaangnak nunnak thar thu kha a sim. Zumtu cu Pathian thawn remnak an nei ih sualnak le thihnak hnuai ihsin Pathian Thlarau in a luatter zo.

Rom bung 5 ihsin bung 8 sungah Paul in zumtu nunnak sungih Pathian Daan le Pathian Thlarau ih huham tumtahnak thu kha a rel. Cumi ṭheh ah Pathian in milai hrangih a tum ciami sungah Zentail le Judah miphun ziangtin an luttlaang thei ding ti thu a sim. Judah pawl in Jesuh Khrih an hnonnak khal hi miphun zakip hrang Pathian ih tumtahnak cu pakhat a si vekin Judah pawl khal hin an hnong lan thei hrimhrim lo ding a si ti thu a sim.

A neta bikah Paul in Khristian nunnak hi ziangtin kan nung pei ti thu a rel ih, a hleice in, midang thawn kan pehzom awknak ah ziangtin kan nung pei ti thu a ngan. Himi pawl hi Pathian hnaṭuan a si tiin a thok ih Khristian pawl in uktu Acozah parah ṭuanvo kan neih zia, pakhat le pakhat karlakih ṭuanvo kan neih zia le sia ṭha ṭhen thiamnak thu thawn pehpar ih thusuhnak tla hi ca nganmi in a let. Pathian thangṭhatnak le pumpak thusimnak thawn a cakuat a cemter.

Thutlangpi
Thu hramthoknak le thu sirhsan (1.1-17)
Milai ih rundamnak kan ṭul zia (1.18-3.20)
Pathian ih mi a rundam zia (3.21-4.25)
Khrih sungih nunnak thar (5.1-8.39)
Pathian thu tumtahnak sungah Israel (9.1-11.36)
Khristian pawlih ziaza (12.1-15.13)
Thunetnak le pumpak cibai buknak (15.14-16.27)

Rom 1

1Khrih Jesuh ih siahhlawh le a tirhthlahmi, Pathian in a Thuthang ṭha phuangtu dingah a hriil ih a kawhmi keimah Paul in ca ka lo kuat.

2Ca Thianghlim sungih ngan vekin cuih Thuthang ṭha cu Pathian in a profet pawl hnenih a tiam ciami a si. 3Cuih Thuthang ṭha cu Amah ih Fapa, kan Bawipa Jesuh Khrih thuhla a si: minung a sinak lamah cun amah cu David tesinfa sung ihsin suakmi a si. 4Pathian a sinak le a thianhlimnak lamah cun, thihnak ihsin thawhter a si ruangah Pathian Fapa a sinak cu a nasa zetmi huham thawn langter a si zo. 5Khrih hrangah le Amah thawngin mi hmuahhmuah in an zum ih an thlun theinak dingah Pathian in a tirhthlahmi sinak cu covo ah i pek. 6Cu mi hmuahhmuah sungah cun nannih Rom khuaih a ummi khal Jesuh Khrih ta si dingah Pathian ih kawhmi ah nan tel ve a si.

7Curuangah Rom khuaih a um, Pathian ih a duhdawtmi le a minung si dingih a kawhmi nan zate hnenah hi cakuat hi ka ngan. Kan Pathian le Bawipa Jesuh Khrih ih zaangfahnak le daihnak nan hnenah um hram seh.

Lungawinak Thlacam

8Leitlun pumpi ah nan zumnak thu a than ruangah nan zapi hrangah Jesuh Khrih thawngin ka lungawinak thu Pathian hnenah ka sim hmaisa a si. 9Amah Fapa ih Thuthang ṭha cu ka thinlung hmuahhmuah in ka sim ih a hna ka ṭuanmi Pathian in cuih ka simmi thu cu a dik a si ti i theihpi. Ka thlacam tinte in ka lo hngilh dah lo ti cu Amah Pathian in a thei. 10Pathian remruat a sile voikhat khat tal cu ra lo tlawng thei dingin Amah hnenah ka dil ringring. 11Ziangah tile nanmah caktertu dingah Pathian thlarau lam laksawng lo ṭawm dingah ka duhzet a si. 12Cuti ka ti tikah ka zumnak in nanmah ih zumnak thazaang a cakter ih nan zumnak khal in ka thazaang a cakter ve ding ka tinak a si.

13U le nau tla, himi hi ciing ringring uh: voi tampi nanmah tlawng dingah ka tum zo; a sinain ra tlawng suak thei lo dingin i khawkhartu ziangsimaw a um ringring. A dang Zentail mi lakah lungthlengmi ka neihter thei bangin nanmah lak khalah lungthlengmi um thei ding cu ka duhzet a si. 14Ziangah tile mi hmuahhmuah hnenah ṭuanvo leiba ka nei: mifim le mi-aa hnenah siseh, cathiam le zianghman thiam lomi hnenah siseh, leiba ka nei. 15Curuangah Rom khuaih a ummi nannih hnen khalah Thuthang ṭha phuan cu ka hiar ngaingai a si.

Thuthang Ṭha Ih Hmual

16Thuthang ṭha hi ka zahpi hrimhrim lo: ziangah tile a zumtu hmuahhmuah rundamnak an ngahnak dingah Pathian ih huham a si. A hmaisa ah Judah mi hrangah a si ih Zentail mi hrang khalah a si ve. 17Ziangtiin a si tile, Pathian in Amah le minung karlakah remnak ziang bangtuk in a tuah, ti kha a langter: cumi cu a hramthok ihsin a netnak tiang zumnak thawngin a si. Ca Thianghlim khalin, “Zumnak thawngih thiamcotermi cu an nung ding,” a ti.

Minung Sualnak

18Pathian ih thinhengnak cu minung sualmawhnak le ṭhat lonak hmuahhmuah parah vancung ihsin a rung lang; cuih minung ṭhat lonak cu thudik theih thei lonak dingih dawntu an si. 19Curuangah Pathian ih hremnak an tong; ziangah tile Pathian Amah in a fianter zo bangin minung ih Pathian theih theinak cu fiang zetin a lang a si. 20Pathian in hi leilung a sersiam thok ihsin hmuh theih lomi a nunzia siseh, kumkhua ih a neihmi huham le Pathian a sizia siseh, fiangtein hmuh theimi an si. Pathian ih thil tuahmi pawl parah hmuh theih an si. Curuangah zokhal in puhmawh ding an nei lo. 21Pathian cu an thei ko; sikhalsehla upat hmaizah tlak a sinain upat hmaizahnak an pe lo; a parah lungawi thu khal an sim lo. An ruahnak sawn kha thulolak ah a cang ṭheh ih an thinlung kawlawngpi cu thimnak in a khat. 22Kan fim an ti aw nain an aa a si. 23Kumkhawnung Pathian bia sawn loin a thi theimi minung le vate le ramsa le a bokih a vakmi ramsa pawl vekih tuahmi zuk sawn kha an biak.

24Curuangah cubangtuk minung pawl cu an thinlung ih an hiarmi thil ningsinza hurnak pawl tuah dingah Pathian in kham duh loin a thlahthlam. Cule pakhat le pakhat parah ningzakza thil an tuah aw. 25Pathian ih thudik thuhla cu thuphan in an thleng; Siamtu Pathian bia loin le rian loin siammi thilri sawn an rian ih an biak. Siamtu sawn kha kumkhua in thangṭhat ding a si. Amen.

26Hi thil an tuah ruangah Pathian in minung cu ningzakza a si mi an taksa hiarnak thlun lawlaw dingin a hnonta hai. Nunau hmanin nunau an sinak thil a daan vekih hmang loin cin le daan nei loin nu le nu an sualpi aw. 27Cuvek thotho in mipa khal in nunau thawn pawl awk daan an tlansan ih an taksa hiarnak ruangah mipa le mipa an sualpi aw. Mipa in pakhat le pakhat cubangtuk ningzakza thilsual an tuah ruangah an thilsual tuah ruangih an hlawhman cu an parah a thleng.

28Hi minung pawl in Pathian theihnak ngaingai cu an thinlung sungah caamter an duh lo ruangah thinlung borhhlawhnak thlun lawlaw dingin Pathian in a hnonta hai. Curuangah tuah lo ding thil pawl kha an tuah. 29Annih cu siatnak le ṭhat lonak a phunphun, hamṭamnak le sualralnak a phunphun in an khat; nahsiiknak, mithahnak, sualawknak, mi bumnak le depdet hrokhrawlnak tla in an khat. An kaa a tam ih, 30pakhat le pakhat an relsia aw. Pathian mitkem zawng in an nung, an hngal, an puarthau, anmah le anmah an porh aw, ṭhat lonak tuah dingah lamzin a phunphun an hawl, an nu le an pa thu an ngai lo; 31a ṭha le a sia thleidan thiamnak thinlung an nei lo, an thukam mi an thlun dah lo ih midang hrang zaangfahnak le zawnruahnak zianghman an nei lo. 32Hi bangtuk ih a nungmi pawl cu thi tlak hrimhrim an si, tiih Pathian daan pekmi a um ti tla an thei ko. Cuih tlunah hibangtuk thil ṭha lo anmah in an tuah lawng si loin midang in an tuah tik khalah an lungkimpi a si.

⇑

[Remove Footnotes]