TITAS

Hnenih Paul Cakuat

Thuhmaihruai

Titas cu Zentail mi a si ih Khristian a can hnu-ah Paul ih hnaṭuanpi le bawmtu ah a cangmi a si. Titas hnenih Paul cakuat hi Krete tikulh ah Titas a um laiih a kuatmi a si; cutawkah Kawhhran hotu dingah Paul in a taan. Hi cakuat hin thil pathum a langter:

(1) Kawhhran hruaitu upa pawlih neih ṭulmi nuncan ziaza kha Titas hnenah a sim. Theihter sal a ṭulnak cu Krete mi pawl hi ṭhatlonak lamah hminthangmi an si ruangah a si.

(2) Kawhhran sungih a ummi pa upa, nu upa (hi nu upa pawl cu mino nunau pawl zirh lehtu dingah timi an si), mino pawl le sal pawl tla ziangti ih zirh ding a si, ti thu ruahnak a pek.

(3) A netnak ah Paul in Titas kha Khristian nuncan thu a zirh. A thupi bikah mi thawn rualremte ih pawl thei ding a ṭulnak, huat awknak hrial ding, thu-el awknak le Kawhhran sungih ṭhenṭhek awknak thu pawl hi hrial dingah ruahnak a peknak a si.

Thutlangpi
Thuhram thawhnak (1.1-4)
Kawhhran hruaitu upa (1.5-16)
Kawhhran sungih ṭuanvo a sangsang (2.1-15)
Lomnak le ralrin peknak (3.1-11)
Thunetnak le cibai buknak (3.12-15)

Titas 1

1Pathian hnaṭuantu le Jesuh Khrih ih tirhthlah keimah Paul in ca ka lo kuat.

Pathian ih a hriilmi a minung pawl an zumnak fekter dingah le kan biaknak thutak sungih hruai dingah Pathian in i hriil ih i thlah. 2Cuih kan biaknak cu kumkhua nunnak ruahsannak sungah hram a bunmi a si. Thuphan a per dah lomi Pathian in hi nunnak cu leilung seem hlan ihsin in tiamkam zomi a si ih, 3a tikcu a kim tikah cumicu a Thuthang sungin a hun langter. Cumi cu ka hnenah i pek ih in Runtu kan Pathian ih thupeknak bangtuk in ka phuang.

4Zumnak bangrep kan neihmi sungah ka fa ngaingai a si mi Titas na hnenah hi ca hi ka ngan.

Kan Pa Pathian le in Runtu Khrih Jesuh in zaangfahnak le daihnak lo pe hramseh.

Krete Tikulh-ih Titas Hnaṭuannak

5Krete ah ṭuan ṭulmi pawl ṭuansuak dingah le khawkip ih Kawhhran upa ret dingah Krete tikulh-ih ka lo taantanak cu a si. Ka thuzirhmi kha ciing ringring aw. 6Kawhhran upa cu mawhthluknak nei lomi siseh; nupi pakhat lawng a nei mi siseh, * a faale pawl cu zumtu si haisehla puarthaunak le thu ngailonak lamih thangsia lomi si haiseh. 7Kawhhran hruaitu cu Pathian hnaṭuan ah ṭuanvo neitu a si ruangah mawhthluknak um lomi a si pei. Mi puarthau le mi thintawi, zurit hmangmi, mi helhlong le paisa duhham mi a si lo pei. 8Mikhual le mileng zohthiamtu a si pei ih thilṭha a ngaina pei. A uk-aw theitu a si pei; miding, mithiang le ziaza ṭhami a si pei ih suup theinak neimi a si pei. 9Kan zumnak hram thawn a mil-awmi le rintlak a si mi kan Thuthang kha hnget zetin a pomtu a si pei. Cuticun midang pawl kan zirh awkmi thudik thawn thazaang a pe thei ding ih cuih thudik a eltu pawlih palhnak khal a langter thei ding.

10Uk theih lomi tamzet an um ih cumi pawl cu Judah biaknak ihsin Khristian biaknak ih a ra lutmi sungin an tam cuang. Cupawl cu ṭong tam pawl an si ih thuphan thu in mi tampi an bum. 11Cupawl cu kham an ṭul; ziangah tile zirh lo dingmi an zirh ruangah innsaang tampi an buaiter ih cutiih an zirhnak cu ningzakza a si mi paisa duhnak meen ruangah a si. 12Anmah Krete mi lala profet a si vemi in, “Krete mi cu thuphan per an si, ramsa bangtuk miṭha lo, zaangzel le mihrong an si,” a rak ti ih, 13cuti a timi cu a dikmi a si. Curuangah annih cu napi in kawk awla cuticun zumnak dik an nei ding. 14Culawng in Judah mi pawlih neihmi thuanthu meenmeen le thudik a hnongtu pawlih an rak kenmi milai ih thukham pawl kha zianghman ah an siar nawn lo ding. 15Mithiang pawl hrangah cun ziang hmuahhmuah hi a thiang ṭheh; sikhalsehla miborhhlawh le a zum lotu pawl hrangah cun, an thinlung a borhhlawh ruangah zianghman a thiangmi a um lo. 16Anmah cun Pathian theitu kan si an ti aw; sikhalsehla an ṭuan mi le an tuahmi in a zulhpeh lo. Mitkemza in an um, zianghman thu an ngai lo ih ziangvek thil ṭha tuahtu ding hmanah an tlak lo a si.

⇑

[Remove Footnotes]