1 SANSIARNAK

(1 Chronicles)

Thuhmaihruai

Sansiarnak pakhatnak le pahnihnak hi Samuel le Siangpahrang cabu sungih ummi tam deuh ih simnolh salnak a si. Asinain thlirdaan dangte a si ve. Sansiarnak sungah hin Israel pawl siangpahrang an neihnak thuanthu an ngan tikah tumtahmi pahnih a um:

(1) Israel siangpahrang uknak le Judah siangpahrang uknak hin siatnak an tong a si khalah Pathian in an hnenih thu a rak tiam ciami kha a hngetter thotho. A miphun pawl hnenih a thutiam a thlen theinak dingah Judah ramih um pawl hmangin hna a ṭuan thotho. Himi pawl hi a dik a si ti langternak dingah David le Solomon tla ih nehnak maksak, Jehoshafat, Hezekiah, Josiah le Pathian parih zumtlak a si mi pawlih remsalnak an tuahmi pawl kha sirhsan ah a hmang.

(2) Jerusalem Biakinn ah Pathian biak an thawh daan, cumi biaknak ah hnaṭuantu puithiam le Levi mi pawlih hnaṭuan zem-awk daan, Solomon cu Biakinn rak saktu a sinan a hramthoktu ngaingai cu David a si, ti thu a sim.

Thutlangpi
Cithlahtu pawl le an hmin cazin (1:1 - 9:44)
Saul ih thihnak (10:1–14)
David uknak (11:1-29:30)
   (a) Harsatnak le nehnak (11:1-22:1)
   (b) Biakinn sak ding timtuahnak (22:2-29:30)

1 Sansiarnak 1

Adam Ihsin Abraham San Tiang

(Seem. 5.1-32; 10.1-32; 11.10-26)

1Adam cu Seth ih pa a si, Seth cu Enosh ih pa a si, Enosh cu Kenan ih pa a si, 2Kenan cu Mahalalel ih pa a si, Mahalalel cu Jared ih pa a si. 3Jared cu Enok ih pa a si, Enok cu Methuselah ih pa a si, Methuselah cu Lamek ih pa a si, 4Lamek cu Noah ih pa a si. Noah in fapa pathum a nei ih Shem, Ham le Jafeth an si.

5Jafeth ih fapa pawl cu Gomer, Magog, Madai, Javan, Tubal, Meshek le Tiras an si ih an hrinmi miphun pawl in anmah hringtu ih hmin ciar an keng. 6Gomer ih tefa pawl cu Ashkenaz mi, Riphath mi le Togarmah mi an si. 7Javan ih hrin pawl cu Elishah mi, Tarshish mi, Saipras mi le Rodes mi pawl an si

8Ham ih fapa pawl cu Kush, Izipt, Libia, le Kanaan an si ih an hrinmi miphun pawl in anmah hringtu ih hmin ciar an keng. 9Kush ih tefa pawl cu Seba mi, Havilah mi, Sabtah mi, Raamah mi le Sabteka mi an si. Raamah tefa pawl cu Sheba le Dedan mi an si. 10(Kush in fapa Nimrod a nei ih Nimrod cu leilung tlunah mi nehtu hminthang hmaisa bik a si.) 11Izipt ih tefa pawl cu Lidia mi, Anam mi, Lehab mi, Naftuh mi, 12Pathrus mi, Kasluh mi le Krete mi an si. (Krete mi pawl cu Filistin mi pawl cithlahtu an si.) 13Kanaan ih fapa upabik cu Sidon a si ih, a sangtu ah Heth a si ih an hrinmi miphun pawl in anmah hringtu ih hmin ciar an keng. 14Kanaan ih cithlahmi cu Jebus mi, Amor mi, Girgash mi, 15Hiv mi, Arka mi, Sin mi, 16Arvad mi, Zemar mi le Hamath mi tla an si.

17Shem ih fapa pawl cu Elam, Asshur, Arpakshad, Lud, Aram, Uz, Hul, Gether le Meshek an si ih an hrinmi miphun pawl in anmah hringtu ih hmin ciar an keng. 18Arpakshad cu Shelah ih pa a si, Shelah cu Eber ih pa a si. 19Eber in fapa pahnih a nei, pakhat cu Peleg * a si, ziangah tile amah ih sanah leilungtlun milai pawl cu an ṭhen-aw thluh; pahnihnak cu Joktan a si. 20Joktan ih tefa pawl cu Almodad mi, Shelef mi, Hazarmaveth mi, Jerah mi, 21Hadoram mi, Uzal mi, Diklah mi, 22Ebal mi, Abimael mi, Sheba mi, 23Ofir mi, Havilah mi le Jobab mi an si.

24Shem ih cithlah pawl cu Shem, Arpakshad, Shelah, 25Eber, Peleg, Reu, 26Serug, Nahor, Terah le 27Abram an si. (Abram cu Abraham tiih run kawh a si.)

Ishmael Ih Tesinfa Pawl

(Seem. 25.12-16)

28Abraham in fapa pahnih Isaak le Ishmael a nei. 29Ishmael ih tefa pawl cu Nebaioth (Ishmael ih fapa upa bik), Kedar, Adbeel, Mibsam, 30Mishma, Dumah, Massa, Hadad, Tema, 31Jetur, Nafish le Kedemah an si. Hi pawl hi Ishmael ih fapa pawl an si.

32Abraham in nusun Keturah a nei ih fapa paruk a hrin: Zimran, Jokshan, Medan, Midian, Ishbak le Shuah an si. Jokshan in fapa pahnih Sheba le Dedan a nei. 33Midian in fapa panga a nei ih Efath, Efer, Hanok, Abida le Eldaah an si.

Esau Ih Tesinfa Pawl

(Seem. 36.1-19)

34Abraham ih fapa Isaak in fapa pahnih Esau le Jakob a nei. 35Esau ih fapa pawl cu Elifaz, Reuel, Jeush, Jalam le Korah an si. 36Elifaz cu Teman mi, Omar mi, Zefi mi, Gatam mi, Kenaz mi, Timna mi le Amalek mi pawlih cithlahtu a si. 37Cule Reuel cu Nahath mi, Zerah mi, Shammah mi, le Mizzah mi pawlih cithlahtu a si.

Edom Ram Ih A Rak Um Hmaisa Bik

(Seem. 36.20-30)

38-42Edom ramih a rak um hmaisatu pawl cu a thuailam Seir fapa pawlih cithlahmi an si:

Lotan cu Hori le Homam hrin pawlih cithlahtu a si. (Lotan in farnu pakhat Timna a nei.)

Shobal cu Alvan, Manahath, Ebal, Shefi le Onam hrin pawlih cithlahtu a si.

Zibeon in fapa pahnih Aiah le Anah a nei. Anah cu Dishon pa a si ih Dishon cu Hamran, Eshban, Ithran le Kheran hrin pawlih cithlahtu a si.

Ezer cu Bilhan, Zaavan le Jaakan hrin pawlih cithlahtu a si.

Dishan cu Uz le Aran hrin pawlih cithlahtu a si.

Edom Siangpahrang Pawl

(Seem. 36.31-43)

43-50Israel ramih siangpahrang an rak um hlanah a tanglam siangpahrang pawl in Edom ram cu a sangsangin an rak uk:

51Hadad a thih hnuah Edom ram cu a tanglam hrin ciar ah an ṭhen aw. Cuih hrin pawl cu Timna, Aliah, Jetheth, 52Oholibamah, Elah, Pinon, 53Kenaz, Teman, Mibzar, 54Magdiel le Iram an si.

⇑

[Remove Footnotes]