1 SAMUEL

Thuhmaihruai

Samuel pakhatnak sungah hin Thuṭhentu pawlih san ihsin siangpahrang an neih caan tiang Israel mi pawl an thleng awknak thu a um. Israel phunhnam sungih hi bangtuk thleng awknak ahhin thuanthu neitu deuh minung pathum an um ih cupawl cu – thuṭhentu maksak sung ihsin a neta bik Samuel le Israel pawlih siangpahrang hmaisa bik a si mi Saul le Israel siangpahrang lakih a tum bik David tla an si. David siangpahrang a cannak thu an sim tikah Samuel le Saul thuanthu an sim cih ringring ṭheu.

Hi cabu ih tumtah bik deuhmi cu–Pathian parah rinsantlakte ih kan um a si ah cun hlawhtlinnak a um ih Pathian thu kan ngai lo tikah hlohralnak a si, ti thu a si. Cumi thu cu Eli ih simmi I Sam 2:30 sungah fiangtein kan hmu thei: “I sunloihtu cu ka sunloih ve ding ih i hmuhsuam tu cu ka hmuhsuam ve ding,” tiin a um.

Hi cabu sungah siangpahrang uknak um ruangah thinlung ṭhencat-aw thei lo ih a um thu a ngan. Ziangah tile Bawipa amah hrimhrim kha Israel pawlih siangpahrang ih ruahmi a si; a sinain a milai pawlih dilnak thlun in Bawipa in siangpahrang pakhat a hrilsak. A thupimi cu–an siangpahrang le Israel pawl in Pathian ih uknak hnuai ah ṭhatein an um a si, (2:·-10) timi thu a si. Pathian ih daan hnuai ah milian farah zatein an bangrep thluh.

Thutlangpi
Israel uktu Samuel (1:1–7:17)
Saul siangpahrang a cang (8:1–10:27)
Saul ih uknak hmaisa bik kum (11:1–15:35)
David le Saul (16:1–30:31)
Saul le a fapa pawl thihnak (31:1-13)

1 Samuel 1

Shiloh Khua Ih Elkanah Le A Innsang

1Efraim an timi tlangpar ramah Ramah timi khua a um ih cutawk khua ah Efraim miphun sung ihsin Elkanah an ti mi mipa pakhat a rak um. Amah cu Zuf miphun Tohu ih cithlah a si mi Elihu ih fa Jeroham ih fapa a si. 2Elkanah cu nupi pahnih a nei ih Hannah le Peninnah an si. Peninnah cun fa a nei, a sinain Hannah cun fa pakhat hman a nei lo. 3Cule Elkanah cu a khua ihsin Shiloh khua ah kumtinte Ziangkimtithei Bawipa biak dingah le thawinak pek dingah a feh ṭheu. Shiloh khua ah Bawipa ih puithiam cu Eli ih fapa pahnih Hofni le Finehas an si. 4Cun Elkanah in Bawipa hnenih thawinak a pek tikah a nupi Peninnah le a faale pawl hnenah an covo ciar a pek hai. 5Sikhalsehla a nupi Hannah cu a duhdawtzet ko nain a covo pakhat lawng a pek, ziangah tile Bawipa in faate a pek lo ruangah a si. 6Cutiih fa neilo a si ruangah a huatu Peninnah cun Hannah cu a tisiat ih a ning a zakter ṭheu. 7Cuticun kum khat hnu kum khat a si vivo. Bawipa ih inn ih an feh tikah Peninnah in Hannah cu a riah a siatter ṭheu ih Hannah cu rawl hman ei loin a ṭap ṭheu. 8Cutikah a pasal Elkanah cun, “Hannah, ziangah so na ṭah ih rawl tla na ei lo? Ziangah so riahsia ih na um ringring? Na hrangah keimah hi fapa pahra hnakin ka sunglawi sawn lo maw?” a ti.

Hannah Le Eli

9-10Voikhat cu Shiloh khua ah rawl an ei ṭheh tikah Hannah cu a tho ih a thinlung a hartuk ruangah Bawipa ih hnenah ṭap phah in thla a cam. Puithiam hna a ṭuantu Eli cu Bawipa ih biakinn ih sangka kiangah a tokham parah a to. 11Cutikah Hannah cu thla a cam ih, “Maw Bawipa, Cungnungbik Pathian, kei na salnu hi i run hmu hram aw. Ka zonzaihnak hi i theihsak in kei hi i ciing hram aw. I hngilh hram hlah aw. Fapate i zaangfah a si ahcun a nunsung hmuahhmuah na hrangah ka lo pe ding ih a sam khal meh a si dah lo ding, tiah ka lo kam a si,” tiah a ti.

12Hannah cu Bawipa hnenah reizet thla a cam ih Hannah ih hmur cu Eli in a zoh ringring. 13Daite ih thla a cam hrangah a hmur cu a caang rero nain a aw a suak lo. Cutiih a um cu zu a ri a si tiah Eli in a ruah hrangah, 14Hannah hnenah, “Zu ri tahratin mualpho in um nawn hlah. Feh awla va fimharh ta aw,” tiah a ti.

15Cutikah Hannah in, “Asilo, bawipa, zu ka ri lo. Zu hrimhrim ka in lo, Sabitti khal ka in lo. Ka thin a hartuk ruangah Bawipa ih hnenah ka vansaannak ka thlet thluh a si. 16Nunau hlolak a si tiah i ruat hram hlah aw. Ka thin a pit ih ka van a san tuk ruangah hiti ih thla ka camnak a si,” tiah a ti.

17Cutikah Eli in, “Hnangamtein va feh awla Israel ih Pathian in a hnenih na dilmi cu lo pe hramseh,” tiah a ti.

18Cule Hannah in, “Ka parah zaangfahnak thinlung nei ringring aw,” tiah a ti ih a feh. Cuih hnuah rawl malte a ei ih a riah khal a sia nawn lo.

Samuel Suahnak Le Apnak

19A thaizing ah Elkanah le a innsang pawl cu an tho ih Bawipa Pathian cu an biak. Cuih hnuah Ramah khua an inn ah an kir. Cule Elkanah le a nupi Hannah cu an pawl-aw ih Hannah ih thlacamnak cu Bawipa in a theihsak. 20Cutiin Hannah cu fa a vun ih fapa a hring. A fapa cu Samuel tiah hmin a sak, ziangah tile “Bawipa hnenih ka dilmi a si,” tiah a ti.

21Cule Elkanah le a innsang pawl cu kumtinte an pek ṭheumi thawinak le a thukam cia bangtuk in a hleice ih thawinak Bawipa hnenih pek dingah Shiloh khua ah an feh lala. 22Asinain Hannah cu a feh lo. A pasal hnenah, “Ka fapa cu hnawi a thlah vete in Bawipa inn ah ka fehpi pei ih cutawkah a nunsung hmuahhmuah a um ding,” tiah a ti.

23Cutikah Elkanah in, “A ṭha bik na timi cu tuah awla naute hnawi a thlah hlan cu inn ah um ko aw. Cun Bawipa in na thukammi cu kimter hramseh,” tiah a ti. Cutiin Hannah cu inn ah a um ih a fapa cu ṭhatein a zoh.

24Hnawi a thlah tikah a nu in Samuel cu Shiloh ah a fehpi ih kum thum a timi cawcang pakhat, sangphut han khat le Sabit thawl khat tla an keng. Nauhakte a sinain Samuel cu a nu in Shiloh khua Bawipa ih inn ahcun a fehpi. 25Cawcang cu an that ih Samuel cu Eli hnenah an fehpi. 26Cutikah Hannah in, “Bawipa, i hngilh zo maw si? Hitawk ah dingin Bawipa hnenah thla a cammi nunau kha keimah ka si. 27 Bawipa hnenah fapa te ka dil ih atu-ah ka dilmi cu i pek zo. 28Curuangah amah cu Bawipa hnenah ka pek. A nunsung hmuahhmuah amah cu Bawipa ih ta a si ding,” tiah a ti.

Cule Bawipa cu cutawkah an biak.

⇑

[Remove Footnotes]