2 SANSIARNAK

(2 Chronicles)

Thuhmaihruai

Sansiarnak a pahnihnak hi a pakhatnak ih peh a si. A simmi cu Solomon uknak thu, Solomon ih fapa Rehoboam siangpahrang a ṭuan laiah Saklam ram (Israel ram) Jeroboam hruainak in ral an tho ih an ṭhen awknak thu le Thlanglam ram (Judah) uknak an din ih kum 586 BC ih Jerusalem siatsuah a sinak tiang a sim.

Thutlangpi
Solomon uknak (1:1-9:31)
   (a) A thawhtir lam (1:1-17)
   (b) Biakinn an sak (2:1-7:10)
   (c) A netnak lam (7:11-9:31)
Saklam pawlih ral thawhnak (10:1-19)
Judah siangpahrang pawl (11:1-36:12)
Jerusalem siatnak (36:13-23)

2 Sansiarnak 1

Solomon In Fimnak A Dil

(1 Sian. 3.1-15)

1David ih fapa Solomon in Israel ram a uknak cu a hnget deuhdeuh; Bawipa a Pathian in a thlawsuah ih mi maksak ngaingai ah a tuah.

2Solomon in a ralbawi ralkap thawngkhat hotu le zakhat hotu pawl hmuahhmuah, innsang ih hotu pawl, acozah bawi upa pawl le a ra khawmmi miseenpi pawl cu, 3Gibeon ih Pathian biaknak hmun feh dingah thu a pek. Pathian siahhlawh Moses in hramlak ramṭhing an feh laiih a rak sakmi Bawipa ih Puanthlam umnak Gibeon ahcun an zatein an feh. 4Thukam Kuang cu David in Kiriath Jearim ihsin Jerusalem ah a lak zo ruangah Jerusalem khuaih Puanthlam a sakmi sungah a um. 5Hur fapa Uri ih fapa Bezalel ih tuahmi dar biakṭheng khal Gibeon ah Bawipa Puanthlam hmaiah a um. Cutawkah Solomon le miseenpi cun Pathian an biak. 6Puanthlam hmaiih ummi dar biakṭheng parah thawinak pe in Solomon cun Bawipa a biak; rannung thawngkhat a that ih biakṭheng parah cun mei-ur thawinak ah a pek.

7Cuih zanah Pathian cu Solomon hnenah a lang ih, “Ziang so ka lo pek ding? Na duhmi i dil aw,” tiah a ti.

8Cutikah Solomon in, “Ka pa David parah duhdawtnak tumpi na rak nei ringring ih atu-ah a ai-ah siangpahrang i ṭuanter. 9Maw Bawipa Pathian, ka pa ih hnenih na thukammi hmuahhmuah cu kimter aw; ziangahtile siarcawk lo minung tlunah siangpahrang ah i tuah zo. 10Minung hizat ka uk theinak dingah ka ṭul bikmi fimnak le theihnak i pe hram aw. Culo cun na minung hitluk tam hi ziangtinso ka uk thei ding?” tiah a ti.

11Cule Bawipa in Solomon hnenah, “A dikmi na hriil a si. Lennak le sumsaw, a si lole hminthannak maw, na ral pawl thihnak maw, a si lole nangmah ih hrangah nun khawsaunak maw, dil loin ka minung pawl uktu siangpahrang ah ka lo tuah ih anmah uk theinak ah fimnak le theihnak i dil ruangah, 12i dil vekin fimnak le theihnak ka lo pe ding. Cuih hlei ah zovek siangpahrang hmanih an rak neih dah lomi le an neih dah lo dingmi lennak, sumsaw le hminthannak ka lo pe ding,” a ti.

Solomon Ih Maksaknak Le Lennak

(1 Sian. 10.26-29)

13Cule Solomon cu Pathian biaknak hmun, Puanthlam thianghlim umnak Gibeon ihsin Jerusalem ah a kir ih Israel ram cu a uk. 14Rang le rangleng tampi neih a tum ih rangleng thawngkhat le zali, le rang ralkap hrangah rang thawng hleihnih a nei. A hrekkhat cu Jerusalem khawsungah a ret ih a hrekkhat cu khawpi dangdang ah a ret. 15Israel ram a uk sungah sui le ngun cu Jerusalem khawsungah lungto zat in a tam ih sidar thingkung cu theipi kung zat in a tam. 16Siangpahrang hrang thilri leitu pawl in Izipt le Kue ihsin rang pawl cu an lei ih, 17rangleng khal Izipt in an lei. Rangleeng pakhat cu ngun tangka zaruk in an lei ih, rang pakhat cu ngun tangka za le sawmnga an lei. Rang le rangleng an leimi pawl cu Hit siangpahrang le Siria siangpahrang hrang hnen khalah an zorh hai ṭheu.

⇑

[Remove Footnotes]