2 SIANGPAHRANG

(2 Kings)

Thuhmaihruai

Siangpahrang cabu pahnihnak hin Israel siangpahrang uknak thu 1 Siangpahrang cabu netnak ihsin a pehzom. Hi cabu hi ṭhen hnih ih ṭhen a theih.

(1) Siangpahrang uknak ram hnih thuanthu, 850 BC ihsin Samaria siatnak le saklam ram a cemnak, 721 BC tiang.

(2) Israel siangpahrang uknak a siat ihsin, kum 586 BC Babilon siangpahrang Nebuchadnezzar kutih Jerusalem a siat tiang Judah siangpahrang uknak thuanthu. Siangpahrang pahnihnak hi Babilon in Gedaliah kha Judah ram Mangki ah a ret ih Judah siangpahrang Jehoiakhin kha Babilon ram sungih an thawngthlaknak ihsin an thlah thu tiangin a huap.

Hi bangtuk in an miphun parah siatralnak a thlen hi Israel mi le Judah mi pawl le an siangpahrang pawl Pathian hnenah rinsan tlak lo an si ruangah a si. Jerusalem khawpi a siatnak le sal an taannak thu hi Israel miphun thuanthu ah thupi ngaingai mi an si.

Siangpahrang pahnihnak cabu sungah hminthang profet cu Elijah sawngtu Elisha a si.

Thutlangpi
A ṭhen-awmi siangpahrang uknak ram (1:1-17:41)
   (a) Profet Elisha (1:1-8:15)
   (b) Judah le Israel siangpahrang pawl (8:16-17:4)
   (c) Samaria ram siatnak (17:5-41)
Judah siangpahrang uknak ram (18:1-25:30)
   (a) Hezekiah ihsin Josiah tiang (18:1-21:26)
   (b) Josiah ih uknak (22:1-23:30)
   (c) Judah siangpahrang netabik pawl (23:31-24:20)
Jerusalem siatnak (25:1-30)

2 Siangpahrang 1

Elijah Le Siangpahrang Ahaziah

1Israel siangpahrang Ahab a thih hnuah Israel do dingin Moab mi pawl ral an tho.

2Israel siangpahrang Ahaziah cu Samaria ih a siangpahrang inn diphun par zaute ihsin a tla ih besezet in a tuahmawh aw. Curuangah a nun ding le nun lo ding theih duh ah, Ekron khuaih an khawzing Baalzebub thuron dingah Filistin ram Ekron khua ahcun mi a thlah. 3Asinain Bawipa ih vancungmi pakhat in Tishbe khuaih profet Elijah cu siangpahrang Ahaziah ih mi thlahmi pawl tong dingah a fial ih an hnenah, “Ziangah so Ekron khuaih Baalzebub khawzing tong dingah nan feh? Israel ramah Pathian a um lo maw si? 4Nan siangpahrang hnenah, Bawipa in ‘Na nung lo ding. Na tuahmawh awknak in na thi ding,’ a lo ti, tiah va sim uh,” tiih sim dingah a fial.

Bawipa ih thupekmi vekin Elijah in a tuah ih, 5curuangah siangpahrang ih mi thlahmi pawl cu an kir. Siangpahrang in, “Ziangah nan kir?” tiah a rak sut.

6Annih in, “Mi pakhat kan tong ih a lo thlahtu siangpahrang hnenah va kir uhla a hnenah Bawipa in, ‘Zianghrangah Ekron ih Baalzebub khawzing tong dingin mi na thlah? Israel ramah Pathian a um lo maw si? Na nung lo ding na tuahmawh awknak in na thi ding,’ tiah va sim uh, in ti ruangah kan kir a si,” tiah an ti.

7Cutikah siangpahrang in, “Nan tonmi pa cu ziangvek milai so a si?” tiah a sut.

8Annih in, “Savun ih tuahmi korfualpi a hruk ih savun taaikhap a khap a si,” an ti.

Cutikah siangpahrang in, ‘Elijah a si cu!” tiah a hun ti.

9Cule siangpahrang in Elijah hruai dingah ralbawi pakhat le ralkap sawmnga a thlah. Elijah cu tlang parih a to laiah ralbawipa in a va hmu ih a hnenah, “Pathian ih milaipa, siangpahrang in rung seh a lo ti,” tiah a ti.

10Cutikah Elijah in, “Pathian ih milai ka si ahcun van ihsin meisa rung tla sehla nangmah le na milai pawl lo kang thluhseh!” tiah a ti. A ti vete in van ihsin meisa a rung tla ih ralbawipa le a ralkap pawl cu an kangthat thluh.

11Siangpahrang in a dang ralbawi pakhat le ralkap sawmnga a thlah sal ih Elijah hnenah an va feh. Ralbawipa in, “Pathian ih milaipa, siangpahrang in zamrangte in rungseh a lo ti,” a ti.

12Cutikah Elijah in, “Pathian ih milai ka si ahcun van ihsin meisa rung tla sehla nangmah le na ralkap pawl lo kang thluhseh!” a ti. A ti vete in van ihsin Pathian ih meisa a rung tla ih ralbawipa le a ralkap pawl cu an kangthat thluh.

13Siangpahrang in a dang ralbawi pakhat le ralkap sawmnga a thlah lala. Ralbawipa cu Elijah hnenah a hung feh ih Elijah hmaiah a khuk a bil ih, “Maw Pathian ih milaipa, keimah le ka milai pawl parah hin zaangfahnak nei hram awla kan nunnak cu in zuah hram aw. 14Ka hlanih ralbawi pahnih le an ralkap pawl cu vanih meisa in a kangthat thluh. Asinain kei cu i zaangfah hram aw,” tiah a dil.

15Cutikah Bawipa ih vancungmi in Elijah hnenah, “Amah thawn vung feh aw. Zianghman ṭih duh hlah,” tiah a ti. Curuangah Elijah cu ralbawipa thawn siangpahrang hnenah an feh ih, 16a hnenah, “Bawipa in ‘Israel ramih Pathian um lo bangin Ekron khua Baalzebub khawzing hnenih mi na thlah ruangah tuih na ihnak ihkhun khan na tho nawn lo ding. Na thi ding a si,’ a ti,” tiah a sim.

17Elijah hnen ih Bawipa ih ṭongkam vekin Ahaziah cu a thi. Ahaziah cu fapa a neih lo ruangah a unau Joram in, Judah siangpahrang Jehoshafat ih fapa Jehoram ih siangpahrang a ṭuan kum hnihnak ah, Israel siangpahrang a ṭuan.

18Siangpahrang Ahaziah ih hnaṭuanmi hmuahhmuah cu Israel Siangpahrang Pawlih Thuanthu Cabu sungah ngan ṭheh a si.

⇑

[Remove Footnotes]