2 SAMUEL

Thuhmaihruai

2 Samuel cu Samuel pakhatnak ih pehzom a si ih siangpahrang David ukmi ram thlanglam ah Judah (2 Sam 4-5), cuih hnuah saklam Israel tel in a ram pumhlum huap ih thuanthu a si (2 Sam 5-24). David in a uknak ram a kauh theinak dingah le a hnget theinak dingah ramsung ramleng ral kha a do a ṭul. David cu Pathian hnenah rinsan tlak ngaingaimi le pum a pe-aw ngaingaimi a si. A miphun pawl khal in an rinsan. Asinain a caancaanah amah ih tisa hiarnak le tumtahnak hlawhtlin theinak dingah a duhduh in a um ih sualnak ṭha lo zetzet a tuah thu khal a lang ve. Sikhalsehla profet Nathan in a sualnak a phuan tikah Pathian ih pekmi harsatnak pawl cu a lungkim in a tuar a si.

David ih nunnak le a hnaṭuannak hin Israel pawlih thinlung a neh ngaingai ruangah siangpahrang dingih mi dang an hawl tik khalah amah bangtu ding kha amah ih cithlah sungmi thotho “David ih fapa,” si dingah an duh.

Thutlangpi
David ih Judah ram a uknak (1:1-4:12)
David ih Israel ram hmuahhmuah a uknak (5:1-24:25)
   (a) A uknak thawhtir lam (5:1-10:19)
   (b) David le Bathsheba (11:1-12:25)
   (c) Harsatnak le buainak (12:26-20:26)
   (d) A netnak lam caan (21:1-24:25)

2 Samuel 1

David In Saul Ih Thih A Thei

1Saul a thih hnuah David cu Amalek ral a nehnak ihsin a ra kir ih Ziklag khuaah ni hnih a um. 2A thaisun ah Saul thihnak hmun ihsin tlangval pakhat a ra thleng. A riahsiat ruangah a hnipuan a thlek ih a lu ah leivut a phulh aw. David hnenah a feh ih leilung dai in upatnak pekin a lu a kun. 3Cutikah David in, “Khuitawk inso na rat?” tiah a sut.

Anih in, “Israel ralkap pawl lakin ka ra tlan,” a ti.

4“Ziang an cang, i sim hnik,” tiah David in a ti.
Cutikah tlangvalpa cun, “Israel ralkap pawl cu an tlan thluh ih tampi an thi fawn. Saul le a fapa Jonathan khal an thi,” tiah a ti.

5“Saul le Jonathan an thi, tiah ziangtinso na theih?” tiah David in a sut sal.

6Tlangvalpa in, “Gilboa tlang parah ka rak um ve ih an ral pawl rangleng le rang ralkap pawl in an hun naih vivo ih culaiah Saul cu a feipi pawk in a din kha ka hmu. 7A her-aw ih keimah i hmu ih i ko. “Bawipa, ziangso?” tiah ka ti. 8“Zoso na si?” tiah i sut ih, “Amalek mi ka si,” tiah ka ti. 9Cutikah, “Besiazet in in tuahmawh zo ih ka thi cing ding. Ra awla i ra that aw,” tiah i ti. 10Curuangah a umnak ah ka hung so ih ka that, ziangah tile a tlu ding ih a tluk vete cun a thi thotho ding, ti ka thei. Cun a lu parih a siangpahrang lukhuh le ralnam khamnak baanhrolh cu ka lak ih atu na hnenah ka rak keng a si, bawipa,” tiah a ti.

11David cu riahsia le ninghang in a hnipuan a thlek thluh ih a milai pawl hmuahhmuah khal in an thlek thluh ve. 12An ṭaang cuum aw in an ṭap ih, Bawipa ih minung Israel mi tampi ralih an thih ruangah le Saul le Jonathan tla an hlohral ruangah zan tiang rawl ul in an um.

13Cule David in hi thu a ra simtu tlangvalpa cu, “Khuilam mi so na si?” tiah a sut.

“Amalek mi ka si nain na ram sungah hin ka um,” tiah a sawn.

14David in, “Ziangtin so Bawipa in siangpahrang ih a hriil mi cu na thah ngam?” tiah a ti ih, 15a ralkap pakhat ko tahratin, “Hi pa hi that aw,” tiah thu a pek. Curuangah ralkap pa cun Amalek tlangvalpa cu a sah thluk ih a that. 16Cutikah David in, “Na thisen cu na lu parah tlaseh. Bawipa Pathian in siangpahrang ih a hriilmi ka that a si, tiah na hmurka rori ih na phuan ruangah nangmah le nangmah na nunnak na cemter-aw a sihi,” tiah Amalek pa cu a ti.

David In Saul Le Jonathan A Ṭah

17David in Saul le a fapa Jonathan cu hla in a ṭah ih, 18a cuih hla cu Judah mi pawlih zir dingin thu a pek. (Hi thihhla cu Jashar Cabu sungah an ngan.)

19“Maw mi vanduai Israel 20Gath khua ah va sim hlah uh, 21Maw Gilboa tlang, 22Jonathan ih li le thal cu 23Maw Saul le Jonathan, 24Maw Israel nunau pawl, 25Ral ṭha hleice ralkap pawl 26Maw Jonathan, ka unau duh, 27Kan mi ṭha pawl an ral zo,
⇑

[Remove Footnotes]