DANIEL

Thuhmaihruai

Daniel cabu cu Judah mi pawl zumlotu siangpahrang kut tangah harsatnak le hremnak an tuar laiih nganmi a si. Cangantu hin thuanthu le langnak tla hmangin a miphun pawl hnenah anmah hremtu pawl kha Pathian in a neh ding ih, Pathian minung pawl cu luatnak an ngah sal ding timi ruahsannak thawn tha a pek.

Hi cabu hi ṭhen hnih ah ṭhen a theih: (1) Daniel le a saltaanpi pawlih thuhla. Himi pawl hin Pathian an zum, a thu an ngai ruangah ral an neh. Himi thuhla pawl cu Babilon le Persia uk caan sungah a si. (2) Daniel ih langnak a sangsang in a hmuhmi tla cu hminsinnak lawnglawng in a si ih Babilon siangpahrang ihsin thokin uknak tampi an ṭhansonak le an tlaksiatnak thu kha a si. Pathian miphun pawl in an neh ding ih, Pathian thei lomi hremtu uktu pa kha a siatral ding ti thu a sim cia.

Thutlangpi
Daniel le a rualpi (1.1-6.28)
Daniel ih langnak a hmuhmi (7.1-11.45)
   (a) Ramsa hrang pali (7.1-28)
   (b) Mecang le tuucang (8.1-9.27)
   (c) Vancung ihsin palai (10.1-11.45)
Caan netnak (12.1-13)

Daniel 1

Daniel Le A Rualpi Pawlih Thu (1.1–6.28)

Nebuchadnezzar Inn Ih Um Tlangval Pawl

1Jehoiakim in Judah siangpahrang a ṭuan kum thumnak ah Babilon siangpahrang Nebuchadnezzar in Jerusalem khawpi cu a do ih a kulh ṭheh. 2 Bawipa in siangpahrang Jehoiakim cu a kaihter ih Biakinn thilri le hlawnthil hrekkhat pawl a lakter. A kaihmi pawl cu Babilon ah a fehpi ih Biakinn thilri a lakmi pawl cu a khawzing pawlih biakinn thilri retnak khaan ah a ret.

3Siangpahrang Nebuchadnezzar in a kuthnuai ih bawi tum bik pakhat Ashpenaz kha ralkaihmi le thawngthlakmi Israel mi pawl sungin siangpahrang hrin le bawi phun, mino deuh pawl hriil dingah thu a pek. 4Mi piangzet, mifim, ziangkim ah zirnak a nei ciami, fimvarmi le kutke himmi an si pei ih siangpahrang inn ah hnaṭuan theitu an si pei, tiah a ti. Babilon ṭong an siar thiam le an ngan thiamnak dingah Ashpenaz cu anmah zirhtu a si pei. 5Nitinte an ei an inmi cu siangpahrang inn ih ei le inmi rawl le zu a si ve pei. Cutiih kum thum zirnak an neih hnuah siangpahrang hmaiah an suak pei, tiah thu a pek. 6Cutiih hriilmi lakah cun Daniel, Hananiah, Mishael le Azariah an tel ve. An pali in Judah hrin ihsin an si. 7An bawi upabik cun annih cu hmin thar a sak hai ih an hminthar cu Belteshazzar, Shadrak, Meshak le Abednego ti an si.

8Daniel cun siangpahrang inn ih rawl ei tahrat in le zu in tahrat in raithiang lomi si lo ding ah a thinlung a ṭhencat aw; curuangah Ashpenaz cu amah bawm dingin zaangfah a dil. 9Ashpenaz khal cu Pathian in Daniel parah zaangfahnak thinlung a neihter; 10sikhalsehla Aspenaz in siangpahrang a ṭih ruangah Daniel hnenah cun, “Nan ei ding le nan in dingmi hi siangpahrang amah rori ih relcat ciami a si. Curuangah tlangval dang vekin nan cakvak lo a si pang ahcun keimah lehlam in that men ding,” a ti.

11Cutikah Daniel cu amah le a rualpi pathum zohtu dingah Ashpenaz in mikiltu ah a retmi pa hnenah a feh ih, 12“Ni hra sung in hniksak aw. Ei dingah hanghnah hangrah le in dingah tidai in pe hnik aw. 13Cule tlangval dang siangpahrang inn ih ti le rawl a ei a intu pawl thawn in ṭhim hnik awla cuih par ihsin thu cu ṭhencat sal leh aw,” tiah a ti.

14Anmah kiltupa cu nihra sung hniksak dingah a lung a kim. 15Nihra cu a hung kim ih an zoh tikah siangpahrang inn ih ti le rawl a eitu pawl hnakin harhdam sawn le cak sawn in an lang. 16Curuangah cuih ni thokin anmah kiltupa cun siangpahrang ih pekmi rawl si loin hanghnah hangrah cu a eiter lanta.

17Pathian in hi tlangval pali cu fimnak, calai lam thiamnak le theihthiamnak a pek. Cuih tlunah Pathian in Daniel cu mang leh theinak le langnak pawl simfiang theinak a pek.

18Siangpahrang in tikcu a khiahmi kum thum a kim tikah Ashpenaz in tlangval pawl cu Nebuchadnezzar hnenah a fehpi. 19Siangpahrang thawn thu an ruah aw ih midang hmuahhmuah hnakin Daniel, Hananiah, Mishael le Azariah pawl in a lung an tong bik. Curuangah siangpahrang inn ih hnaṭuantu ah an cang. 20Siangpahrang in ziangvek thu a suh ih, ziangvek thuharsa a suahter hmanah hi tlangval pali cun a ram ukmi sungih kut ial zohthiam le mitkher thiam pawl hnakin a lethra in an thei thei deuh. 21Persia siangpahrang Sairas in Babilon a neh tiang Daniel cu siangpahrang hnaṭuantu ah a um lanta.

⇑

[Remove Footnotes]