DAAN PEKSALNAK

(Deuteronomy)

Thuhmaihruai

Daanpeksalnak (Deuteronomy) cabu sungah Israel pawl caan saupi ramṭhing ramcaar lakih an vahvaih hnu Kanaan ram an luh hlan deuh Moab ram sungih an um laiah Moses in a miphun pawl hnenih a simmi thu tla kha a sangsangin an ngan.

A thupi deuhdeuh ih an hminsinmi cu a tanglam bangtuk hin a si. (1) A cem ciami kum sawmli sungih thuhla pawl kha Moses in a sim sal. A milai pawl hnenah ramṭhing ramcaar lakih Pathian lamhruainak cingkeng ringring in le a thu ngai in rinsan tlak si dingin a forh. (2) Moses in Thukham Pahra kha a sim sal ih Thukham a pakhatnak kha thupi deuh in a sullam a sim. Cumi ṭheh ah ramtiam an thlen tikih Israel pawlih nunnak humtu ding daan a phunphun a sim sal. (3) Pathian le Israel pawl Thukamnak an tuahmi kha Moses in a tican a sim ih tuah dingih an thutiammi pawl a thar in a sim sal. (4) Joshua cu Pathian ih miphun pawl hruaitu dingah Moses sangtu-ih kawhmi a si. Jordan tiva ral Moab ram an thlen tikah Pathian cu rinsan tlak a sinak kha Moses in hla in a sak ih cuih hnuah Israel miphun pawl thlawsuah a pek hnuah Moses cu a thi.

Hi cabu-ih tumtah bikmi cu - Pathian in a duhdawt ih a hrilmi a miphun pawl kha a run ih thlawsuah a pek. Himi hi a miphun pawl in cingkeng ringring in nunnak le thlawsuah co an pehzom ringring theinak dingah a thu an ngai ih an duhdawt ve dingah a tumtah bikmi a si.

Hi cabu sungih tawhfung bangtuk ih a thupimi caang pawl cu 6:4-6 sung hi a si. Himi sungah Jesuh ih Thukham tumbik tiih a kawhmi, “Bawipa na Pathian cu na thinlung zate, na ruahnak zate le na thazaang zate in an duhdawt pei,” timi a um.

Thutlangpi
Moses ih a hmaisa bik thu sim (3 1:1-4:49)
Moses ih a voi hnihnak thusim (5:1-26:19)
   (a) Thukham Pahra (5:1-10:22)
   (b) Cin le daan le ralrin peknak (11:1-26:19)
Kanaan ram luhnak ding thuzirhnak (27:1-28:68)
Thukam tharter salnak (29:1-30:20)
Moses ih ṭong neta bik (31:1-33:29)
Moses ih thihnak (34:1-12)

Daan Peksalnak 1

Thu Hramthawhnak

1Hi thu hi Jordan tiva ihsin nisuahnak lam nelrawnih an um laiah Moses in Israel mi hnenih a simmi thu tla an si. Israel mi pawl cu Jordan phairawn Suf khua kiangah an um; Paran khua cu cutawk ihsin khatlam ah a um ih, Tofel, Laban, Hazeroth le Dizahab khua pawl cu khatlam ralden ah an um. 2Sinai tlang in Kadesh Barnea cu Edom tlangpar lamzin in ni hleikhat feh a si. 3Israel mi pawl Ezipt ram in an suah hnu kum sawmli kum, thla hleikhat thla, * ni khat ni ah Bawipa in sim dingih thu a pekmi hmuahhmuah cu Moses in miseenpi hnenah a sim. 4Cumi cu Heshbon khawsungih a ummi Amor siangpahrang Sihon, le Ashtaroth le Edrei khawpiih a ummi Bashan siangpahrang Og pawl a neh hnuah a simmi a si. 5Jordan in nisuahnak lam Moab ram sungih an um laiah Moses in Bawipa ih pekmi daan pawl le thuzirhmi pawl cu a simfiang.

6Moses in, “Sinai Tlangih kan rak um laiah khan, Bawipa kan Pathian in ka hnenah ‘Hi Tlangah reipi nan um zo a si. 7Pok uhla feh uh; Amor tlangpar ram le a kiangkapih ram hmuahhmuah ah - Jordan phairawn, tlangpar ram le hmunrawn ram, thlanglam ram le Maditerranean tifinriat tiangin feh uh. Cule Kanaan ram le Lebanon Tlang lan in Eufrates tivapi tiang feh uh. 8Zohhnik uh, hi ram pawl cu Bawipa Keimah in nan pupa Abraham, Isaak le Jakob hnenah le an tesinfa hnen tiangin pek dingah ka kam ciami a si,’ in ti,” tiah a ti.

Moses In Thuṭhentu Pawl A Ret

(Suah 18.13-27)

9Moses in, “Culai ah khan nan hnenah, ‘Nanmah miseenpi hruai hi ka hrangah thilrit tuk a si. Keimah pakhat lawng cun ka daih-aw cawk lo. 10 Bawipa nan Pathian in a lo zaiter hai ih atu ahcun vanih arsi zat nan si. 11Nan pupa pawlih Pathian Bawipa cun a lo tiam hai bangtuk in a let thawngkhat in lo pungzaiter in lo ṭhangsoter hram seh! 12Sikhalsehla ziangtinso keimah pakhat lawng cun nan tawh awknak le nan thubuai pawl cu ka phurh cawk ding? 13Curuangah nanmah nan hrin ciar sungin mifim, rinsantlak le thilti thei pawl hril uhla nanmah hotu-ah ka ret hai ding,’ tiah ka rak ti. 14Thil ṭha a si ngai, nan ti ih nan lung a kim. 15Curuangah nanmah nan hrin sung ciar ihsin nan hrilmi mifim le rinsantlak pawl cu nanmah hotu-ah ka ret hai a si. Mi hrekkhat cu thawngkhat hotu, mi hrekkhat cu zakhat hotu, a hrekkhat cu sawmnga hotu, a hrekkhat cu pahra hotu an si. Nan hrin sung ciarah hotu dangdang khal ka ret.

16“Culai ahcun an hnenah, ‘Nan minung pawl hnenin thubuai a rami cu ṭhatein ngaihsak uhla nan minung pawlih thu a si ah siseh, nan lakih a um miphun dang pawlih thu a si khal le diktein rel sak uh. 17Thu nan relcat tikah ṭanbul nei hlah uh. Zovek milai an si hmanah thleidannak nei loin an thu umdaan vekin rel uh. Zohman ṭih hlah uh. Ziangah tile nan thurelcatnak cu Pathian hnenin a rami a si. Thu pakhat khat cu nan hrangah relcat dingih a har tuk a si ahcun ka hnenah ratpi uhla keimah in ka relcat ding,’ tiah ka sim hai. 18Cuih tlunah nanmah pawl khal thil nan ti ding daan hmuahhmuah kimtein ka lo sim a si,” tiah a ti.

Kadesh Barnea Ah Thlingthlatu

(Mipum 13.1-33)

19Moses in, “Bawipa kan Pathian ih thupekmi cu kan tuah. Sinai tlang in kan suak ih kha tluk a kau-mi le ṭihnungza nelrawn lakin kan vak ih Amor tlangpar ram lamah kan feh. Kadesh Barnea kan thlen tikah, 20nan hnenah, ‘Bawipa kan Pathian ih in pek dingmi ram, Amor tlangpar ram cu nan thleng zo. 21Zohhnik uh, nan pupa pawlih Pathian Bawipa in a lo pekmi cu hi ram hi a si. Amah ih thupeknak bangtuk in feh uhla hi ram cu luah uh. Zohman ṭih hlah uh. Nan thin khal nau hlah uh,’ tiah ka rak lo ti.

22“Sikhalsehla ka hnenah nan ra ih, ‘Hi ram thlingthlatu dingah le fehnak lamzin zohtu dingah le ziangvek khawpi tla an um tiih zohtu dingah thlingthlatu kan thlah hmaisa pei,’ tiah nan ti.

23“Cumi cu ruahnak ṭha a si ngai lo maw, tiah ka ti ih nan hrin sung ciar in mi pakhat fingfing, an zate ah minung hleihnih ka hril ih, 24an feh ih tlangpar ram cu Eshkhol phairawn tiang an hung zoh a si. 25An zohmi ramih thingrah khal an lo ih in run sum. Bawipa kan Pathian ih in pek dingmi ram cu ramṭha ngaingai a si, tiah in rung sim.

26“Sikhalsehla Bawipa nan Pathian ih thupekmi cu nan el ih cuih ramih luh cu nan duh lo. 27Nanmah lakah nan phunzai, nan tlokciar ih, ‘Bawipa in in hua a si; hi Amor mi pawlih thah thluh dingah Pathian in Ezipt ram ihsin in suahpi ih an kutah in thlenter thluh a si. 28Curuangah ziangah so cuih ram ahcun kan feh ding? Kan ṭih a sisi! Kan thlah mi thlingthlatu pawl in le cutawkih a ummi pawl cu kannih hnakin an tum, an saang deuh ih an cak deuh fawn, tiah in rung sim zo. Khawpi sung hlir ah an um ih an khawpi kulhnak ralhruang pawl tla cu van a dai a si, in ti. Mikei tiatia milai an um in ti fawn,’ tiah nan ti.

29“Sihmansehla nan hnenah cun, ‘Himi pawl cu ṭih hlah uh. 30 Bawipa nan Pathian in a lo hruai ding ih Ezipt ram le, 31nelrawn ramcaar sungih thil a tuah zo vekin nanmah ih ai-ah nan ral cu a do ding a si. A pa in a fapa a cawi ṭheu bangin nan lamzin tluanah a lo cawi ih hitawk tiang a lo thlenpi zo a sisi,’ ka lo ti. 32Cutluk in ka lo sim zo nain nannih cun, 33nan hmaiah a rak fehtu le nan riah hmun tiangin a rak lo hawl sak ih nan lamzin hmuh dingah zan ah meitleu in, sun ah mero in, nan hmaiah a feh ringringtu Bawipa cu nan rinsan thotho lo.

Pathian In Israel Mi a Hrem

(Mipum 14.20-45)

34 “Bawipa in nan phunzai ringringmi a theih tikah a thin a heng ih, 35‘Hi san misual pawl nannih cu nan pupa hnenih ka tiam ciami ram ṭha ahcun zohman nan lut lo ding. 36Jefunneh ih fapa Kaleb lawng a lut ding. Kaleb cun keimah i rinsan ruangah a hung zohmi ram cu amah le a tesinfa hnenah ka pek ding,’ tiah siatcam in a ti. 37Nanmah ih ruangah Bawipa cu ka parah a thin a heng ih, ‘Moses, nangmah tiang hman in Kanaan ram na thleng lo ding. 38A lo bawmtu Nun ih fapa Joshua cu a thleng ding. Curuangah Joshua cu tha pe aw; Israel mi pawl cu amah in a hruai pei ih Kanaan ram cu an luah ding,’ i ti.

39“Cule Bawipa in ka hnenah, ‘A sia a ṭha a theithiam hrih lomi, ral pawl in an that thluh ding tiih nan timi nan faate pawl lawng an lut ding. An hnenah ram cu ka pe ding ih anmah in an luah ding. 40Asinain nannih pawl cu kir uhla Tipi Sen lam ihsin nelrawn ah feh uh,’ in ti,” a ti.

Israel Mi An Sung

(Mipum 14.39-45)

41“Cun nannih in ka hnenah, ‘Bawipa ih parah kan sual zo a si. Sikhalsehla atu cu Bawipa kan Pathian in thu in pek bangtuk in kan ral cu kan do ding,’ in ti. Cule nan zatein raldo dingah nan tim nan tuah. Tlangpar ram do cu a ol pam ding, tiah nan ruat. 42Sikhalsehla Bawipa in, ‘Doter hai hlah aw. Ziangahtile an hnenah ka um lo ding ih an ral pawl in an neh ding a si,’ tiah ralrinnak i pek. 43 Bawipa ih i simmi cu ka lo sim rero nain zohman in nan ngai duh lo. Bawipa ih thu cu nan el ih puarthau zetin tlangpar ramah cun nan hung feh. 44Cutikah tlang parih a rak ummi Amor mi pawl cu khuai vekin an suak ih an lo dawi ciamco. Cule Edom tlangpar ram Hormah khua tiang an lo that phah vivo. 45Curuangah nan ra kir sal tikah Bawipa ih hnenah nan ṭap. Asinain Bawipa cun a lo ngai duh lo ih zianghman ah a lo siar hai lo. 46Curuangah sokhaw Kadesh ah hitluk reipi nan um cu!

⇑

[Remove Footnotes]