ESTHER

Thuhmaihruai

Esther cabu sungih a ummi thuhla pawl cu thlatang caan ih Persia siangpahrang a um ṭheunak inn ihsin a rak suakmi thuanthu pawl an si. A simsan bikmi cu nunau ral ṭha Esther an timi ih thu a si. Hi nu hin a ralṭhatnak le a pumpek awknak ruangah a miphun pawl kha ral pawlih kutsung ihsin a runsuak,tithu a rel tam bik. Himi cabu hin Purim timi Judah puai ih hramthawhnak le sullam le thuhla a simfiang. Pathian hmin voikhat hman a saal lo. Milai hnaṭuan daan: an phiar awknak le an ralṭhatnak pawl a sim.

Thutlangpi
Esther siangpahrang bawinu ah a cang (1:1-2:23)
Haman ih phiarnak (3:1-5:14)
Haman an that (6:1-7:10
Judah pawl in an ral an neh (8:1-10:3)

Esther 1

Vashti In Siangpahrang Zerxes Thu A El

1-2Zerxes * cu siangpahrang a si ih Persia ram khawpi Susa ih a siangpahrang tokham ihsin India in Ethiopia * tiang ramṭhen za le kul hluansarih a uk.

3Siangpahrang a ṭuan kum thumnak ah a kuthnuai bawi pawl le a ramṭhen uktu bawi pawl hrangah rawl ei puai tumpi pakhat a tuah. Cuih puai ahcun Persia le Media ralkap pawl le ramṭhen uktu bawi le phun upa tampi an tel. 4A thilri neihzia le a lenzia cu mi ih zoh dingah thlaruk sung rori a hmuh.

5Cuih hnuah cun siangpahrang bawipa in Susa khawpi sungih a ummi mipa hmuahhmuah, milian siseh, mi farah siseh, an zate hrangah rawl ei puai a tuah. Siangpahrang inn tualah zarh khat sung puai cu a tuah. 6Tual cu pat puanzaar a rang le mepian pawl in an ceimawi ih cuih puan pawl cu pat phangfem in lungrang ṭhuam parih ngunkual ah an khih. Tual cu lungrang, lungsen, lungvar, lung mepian le lunghring pawl in an phah ih cuih parah cun sui le ngun in tuahmi tokham tampi an hung. 7Sabitti cu sui khuat a phunphun in an pek. Siangpahrang a si bangtuk in Sabitti cu tirhsiang zetin a pek a si. 8An Sabitti in ding cu a zat leiteek an tuah lo. An duhzat ciar in in haiseh, tiah Siangpahrang in a hnaṭuantu pawl cu thu a pek.

9Culai ahcun Siangpahrang inn ah Siangpahrang bawinu Vashti in nunau hrangah rawl ei puai a rak tuah ve.

10Rawl ei puai a tuahnak ni sarih ni ah siangpahrang bawipa cu a Sabitti in mi in a thinlung a puamter. Curuangah tilper mi amah riantu pasarih Mehuman, Biztha, Harbona, Bigtha, Abagtha, Zethar le Karkas a ko ih, 11Siangpahrang bawinu Vashti cu a sui lukhuh khum tahrat in a hnenih ratpi dingah thu a pek. Siangpahrang bawinu cu mi mawi ngaingai a si ih a sawmmi le a kuthnuai bawi pawlih hmaiah a nupi mawizia cu uarawknak thawn a hmuh hai. 12Asinain siangpahrang bawinu an va sim tikah siangpahrang bawipa ih thu cu a el ih a ra duh lo. Cutikah Siangpahrang bawipa cu a thin a heng ngaingai; a thinhengzia cu a so in a so.

13Cun thil thupi le thu harsa a um tikah siangpahrang bawipa in ruahnak petu pawlih ruahnak cu a sut hmaisa ṭheu. Curuangah amah ruahnak petu pawl, ziangtuah le a ṭha ding ti a theitu pawl a sut. 14An ruahnak a suh bik ṭheumi pawl cu: Karshena, Shethar, Admatha, Tarshish, Meres, Marsena le Memukan an si. Hi bawi pasarih cu Persia le Media ramah bawi upa bik pawl an si ih Siangpahrang ton theinak neitu an si. 15Siangpahrang bawipa cun an hnenah, “Keimah siangpahrang Zerxes in ka hnen-um pawl ka thlah ih siangpahrang bawinu raseh, tiah thu ka pek. Asinain a ra duh lo. Curuangah a daan vekin ziangso ka tuah ding?” a ti.

16Cutikah Memukan in Siangpahrang bawipa le a kuthnuai bawi pawl hnenah cun, “Siangpahrang bawinu Vashti in Siangpahrang bawipa a hmuhsuam a si; Siangpahrang bawipa a hmuhsuam lawng si loin a kuthnuai ih a ummi bawi pawl le a ram sungih a ummi hmuahhmuah khal in hmuhsuam ṭheh ve a si. 17Siangpahrang bawinu ih nuncan hi an theih tikah na uknak sungih a ummi nunau hmuahhmuah in an pasal cu zianghman ah an siar nawn lo ding. Nunau hmuahhmuah in, ‘Siangpahrang bawipa Zerxes in siangpahrang bawinu Vashti a ko nain a feh duh lo,’ an ti thlang ding. 18Persia ram le Media ram sungih a ummi fala hmuahhmuah in siangpahrang bawinu ih nuncan cu tuihsun ni a tlak hlanah na kuthnuai bawi pawl hnenah an sim thluh ding. Cuticun na thu ngaih lonak le hnahnawhnak cu ziangtik hmanah a reh thei nawn lo ding a si. 19Curuangah Siangpahrang bawipa na lung a kim ahcun, ‘Siangpahrang bawipa cu ziangtik hmanah Vashti in a tong thei nawn lo ding,’ tiah Persia ram le Media ramsung daan cabu sungah nganter aw. Cule a ai-awhtu ah aṭha deuhmi siangpahrang bawinu dang hawl aw. 20Hi tluk a tum le a kaumi na uknak ram sungah hin na thupekmi a than ṭheh tikah cun nunau hmuahhmuah in an pasal cu, milian an si khal le, mifarah an si khal le, an upat ciar ding a si,” tiah a ti.

21Cuih thu cu siangpahrang bawipa le a kuthnuai bawi pawl in an theih tikah an lung a kim ṭheh ih Memukan simmi vek cun siangpahrang bawipa in a tuah. 22A ram sungah cun ca a kuat ṭheh ih innsang pakhat sungah an pasal cu thuneitu bik a si ding, tiah an peng le an ram ciarah an ṭong ciar in thu a than ṭheh.

⇑

[Remove Footnotes]