SUAHLANNAK

(Exodus)

Thuhmaihruai

Suahlannak timi cu, “Tlansuaknak,” tican a si. Himi cabu sungah hin Israel pawlih thuanthu a thupitnak: Ezipt ramih sal an taannak, Ezipt ram ihsin an tlansuahnak thu a um. Himi cabu hi ṭhen li ih ṭhen a theih. 1. Hebru mi pawl Ezipt ramih sal an taannak ihsin an luatnak; 2. Ezipt ihsin Sinai tlang ih an fehnak. 3. Pathian in a milai pawl thawn Sinai Tlangah thukam a tuah. Cuih thukam sungah nuncan ziaza lam, uk awknak lam le biaknak lam daan tla a tel. 4. Israel pawl in an Pathian biaknak inn an sak ding thu le a sungih hman ding thil pawl, puithiam pawl thawn a pehparmi daan le Pathian biaknak ding daan pawl tla an si.

Cuih tlunah hi cabu hin Pathian in a minung pawl kha sal ihsin a suah ih miphun phun khatah a tuah hai ih hmailamah ruahsannak a neimi phunhnam ah a canter a si ti thu a simfiang.

Hi cabu sungih thuanthu neitu bik cu Ezipt ram ihsin a miphun pawl hruaitu dingah Pathian ih hrilmi Moses kha a si. Mi-ih an theih tam biknak zawn cu bung kul sungih um Thukham Pahra kha a si.

Thutlangpi
Israel pawl Ezipt ihsin an luatnak (1:1-15:21)
   (a) Ezipt ramah sal an si (1:1-22)
   (b) Moses suahnak le a senlai (2:1-4:31)
   (c) Moses le Aaron in Ezipt siangpahrang an tong (5:1-11:10)
   (d) Lantak Puai le Ezipt ihsin an pawhsuaknak thu (12:1-15:21)
Tipi Sen ihsin Sinai tlang ah (15:22-18:27)
Daan le Thukam (19:1-24:18)
Thukam Puanthlam le biak daan ding zirhnak (25:1-40:38)

Suahlannak 1

Israel Mi Ezipt Ram Ah Hremnak

1Jakob le anmah ih innsang ciar thawn Ezipt ramih a fehmi a fapa pawlih hmin cu: 2Reuben, Simeon, Levi, Judah, 3Issakhar, Zebulun, Benjamin, 4Dan, Naftali, Gad le Asher tla an si. 5Jakob ih sungsuak tefa pawl cu an zatein sawmsarih an si. Josef cu Ezipt ramah a rak um zo. 6Caan a hung rei deuh hnuah Josef le a unau pawl cu an thi ih an khukṭhi pawl khal an thi thluh. 7Sikhalsehla Israel mi pawl in faate tampi an nei ih Ezipt ram khat ko in an zai ih a cah khal an cak.

8Cuih caanah Josef ih thuhla thei dah lotu mi thar pakhat Ezipt ramah siangpahrang a cang. 9Anih cun a milai pawl hnenah, “Zohhnik uh, hi Israel mi pawl hi an tamzet ih tlunah an cakzet fawn ih kan hrangah phan ding a um a si. 10Curuangah i ngai uh, Israel mi pawl hi an tam sinsin lonak dingah fimkhur zetin an thu hi kan ruah a ṭul a si. Ral kan neih pang a sile kan ral pawl hnenah an ṭang pei ih kan ram sungin an suak pang ding,” tiah a ti. 11Curuangah an thinpit koin hnaṭuan khung ṭuantertu dingah an tlunah salkhawngtu pawl an ret. Cuticun Israel mi pawl in rawl khawlnak dingah Pithom le Rameses khawpi pawl cu Faro hrangah an sak. 12Asinain Ezipt mi pawlih an hrem deuhdeuh tikah Israel mi pawl cu an pungzai deuhdeuh. Ezipt mi in Israel mi pawl cu an huazet ih an ṭihzet fawn. 13Curuangah sal zonzai ah an tuah hai; 14tlakrawh ser le tlakrawh tuah hnaṭuan khung ṭuannak ah an nun cu a har sinsin. Hnaṭuan har tinkim cu zaangfahnak nei loin hranhram in an ṭuanter hai.

15Cun Hebru nunau a bawmtu nau dongtu sayama pawl hnenah Ezipt siangpahrang in thu a sim. Pakhat cu Shifrah a si ih a dang pakhat cu Puah a si. 16An hnenah, “Hebru nunau in fa an hrin ih nan tuamhlawm tikah naute cu mipa a sile nan that pei; nunau a si ahcun nan that lo pei,” tiah a ti. 17Sikhalsehla nau dongtu sayama pawl cun Pathian an ṭihzah ruangah siangpahrang ih thu cu an thlun lo. Mipa naute khal that loin an zuah ṭheh. 18Cutikah siangpahrang in nau dongtu sayama pawl cu a ko ih, “Zianghrangah hiti in nan tuah ih mipa naute tla nan zuah ṭheh?” tiah a sut.

19Cule annih in, “Hebru nunau pawl cu Ezipt nunau vek an si lo. An cakvak ih an fahrin a olzet; nau dongtu sayama kan va thlen hlanah naute cu a rak suak zo ṭheu,” tiah an ti. 20Pathian ih ṭhatnak cu nau dongtu sayama pawlih tlunah a thleng. Israel mi pawl cu an ṭhangso ih an cak sinsin. 21Nau dongtu sayama pawl in Pathian an ṭihzah ruangah annih khal in faate an nei ve. 22Cutikah Faro in a ramsung mi hnenah, “Hebru nunau-ih hrinmi fapa hmuahhmuah cu Nail tiva sungah nan hlon pei; a sinan fanu cu hlon loin nan zuah pei,” tiah thu a pek.

⇑

[Remove Footnotes]