EZEKIEL

Thuhmaihruai

Ezekiel cu 586 BC kum ih Jerusalem siat hlan le siat hnuah Babilon ah a ummi profet a si. A simmi thuthang cu Jerusalem ih a ummi, a taangsun pawl, le Babilon ih a ummi Judah mipawl hrangah a si. Ezekiel sungah thutlangpi paruk a um: (1) Pathian in a profet si dingah Ezekiel a kawhnak; (2) A miphun pawl hrem an tuarnak ding le an hrangah ralrin a ṭulnak thu le Jerusalem siatsuah a sinak ding thu; (3) A minung pawl an hrem ruangah le an hruaisual ruangah Bawipa in miphun hmuahhmuah parah hremnak le thuṭhennak a thlenternak ding thu. (4) Jerusalem a siat hnuah Israel hnangamternak le hnemnak, hmailam hrang ruahsannak a um thu. (5) Gog hrangah riahsiatnak le siatralnak a um dingmi simsungnak thu. (6) Israel miphun le an Biakinn din sal ding a si, timi thu an si.

Ezekiel cu zumnak hngetzet nei mi le thuruahnak a phunphun neitu a si. A thutheih fiangmi tampi cu langnak a hmuhnak in a ra ih a simmi thu tampi cu tican neizet hminsinnak pawl thawn a phuang. Thinlung le ruahnak tharter a ṭulzia le zozo khal mah le sualnak cio parah ṭuanvo kan nei ti kha a langter. A miphun pawl an nun tharter sal dingah ruahsannak a neihnak thu khal a phuang. Profet lawng si loin puithiam tla a si bangtuk in Biakinn le thianhlimnak lamih a tha a tho ngaingai mi a si.

Thutlangpi
Ezekiel kawhnak (1:1-3:27)
Jerusalem siatnak ding thu (4:1-24:27)
Pathian in miphun dang thu a ṭhen (25:1-32:32)
Pathian in a miphun pawl thu a tiamkam (33:1-37:28)
Gog parih a thleng dingmi thu simcianak (38:1-39:29)
Hmailam Biakinn le leiram hrang hmuhcianak (40:1-48:35)

Ezekiel 1

Pathian Tokham

1Kum sawmthum kum, thlali thla, ni nga ni ah, keimah puithiam Ezekiel, Buzi ih fapa cu Babilon ram Khebar Tivapi kiangah sal ih kaihmi Judah mipawl thawn kan um. Van a ong aw ih Pathian langnak ka hmu. 2Cuih kum cu siangpahrang Jehoiakhin sal ih an kaihnak kum nganak kum a si. 3Cuih Babilon ram Khebar Tivapi kiangah cun ka hnenah Bawipa ih ṭongmi ka thei ih a huham cahzia khal ka thei.

4Ka hun zoh ih saklam ihsin thlipi huuk a run kha ka hmu. Khawdur sahzet sungin nimthla a kau zohzo ih a kiangkap cu a vaang zukzo. Nimthla a kaunak zawn ah cun dar bangin a tleumi ka hmu. 5Thlipi laifangah a nungmi ramsa bangtuk milai hmuihmel kengmi pali ka hmu; 6a sinain hmai pali le thla pali an nei fingfing. 7An ke pawl cu an ding zerzer ih an tin pawl cu cawcang tin bangtuk an si; tleuzet ih hnawtmi dar vek an si. 8Hmai pali le thla pali an nei fingfing ih tlunah an thla pakhat hnuai ah milai kut pakhat an nei fingfing; cutin pakhat in kut pali ciar an nei. 9Cuih ramsa nung pakhat in an thla pahnih ciar an pharh ih kil li nei, tung le vang can-aw in an um ih an thlazim cu an dai aw ṭheh. An ṭhawn tikah an taksa her aw lotein a burpi in an ṭhawn.

10Ramsa nung pakhat in hmai phun dangdang pali fingfing a nei. Hmailamah milai hmai a nei; vorhlam ah kiosa hmai a nei; kehlam ahcun cawcang hmai a nei ih dunglamah muvanlai hmai a nei. 11Ramsa nung pakhat in an thla pahnih fingfing an pharh ih cuticun ramsa dangih thlazim kha an dai fingfing. An thla pahnih cu pharh loin an taksa parah an khup fingfing. 12Ramsa nung pakhat in kap li fingfing an hoi ih cuticun an taksa her ṭul loin an duhnakah a burpi in an feh thei a si.

13Cuih ramsa nung pawl lakah cun meisa vaampi vekih a tleu zohzo mi a um ih amah cu catbaang loin a ṭhawn aw rero. Cuih meisa vaampi sung ihsin nimthlakau vekih a tleu zohzo mi a suak. 14Cuih ramsa pawl cu nimthlakau tlukih cak in dung le hmaiah an pet rero.

15Cuih ramsa pali cu ka zoh rero laiah ramsa pakhat kiangah leengke pakhat fingfing, leengke pali leilung dai in ka hmu. 16Cuih leengke pali cu an bangrep; lungmankhung bangin an tleu fingfing; cuih leengke sungah leengke dang pakhat dingzet in a tan zawng in a vunglutmi a um fingfing; 17cuticun leengke cu an duhnakah an her-aw thei. 18Leengke pawlih tlangkap cu an saangzet ih an makzet; mit hlir in an khat. 19Ramsa nung pawl an ṭhawn tikah leengke pawl khal an ṭhawn ve; leilung ihsin tlunlam ih an kaiso tik khalah leengke pawl khal an so ve a si. 20Ramsa nung pawl cu an duhnak kipah an feh; cuvek cekci in leengke pawl khal an feh ve; ziangahtile ramsa pawl in an uk a si. 21Curuangah ramsa nung pawl an feh ah siseh, an din ah siseh, a si lole thli lakih an kai ah siseh, leengke pawl khal cun an tuah ṭheh ve a si.

22Cule ramsa pawlih lu tlunah cun mangbangza in a vaarmi tlunkhuh-kuum a um. 23Cumi hnuai ahcun ramsa nung pawl cu an ding. An thla pahnih cu an rualpi ramsa lamah an pharh ih a dang thla pahnih in an taksa an khuh fingfing. 24An thla khawn thawng ka thei ih tipi huuk thawm bangtuk a si. Ralkap siarcawklo ih thawmvang bangtuk a si; Cungnungbik Pathian aw bangtuk a si. An zam lo tikah cun an thla an khup. 25Asinain a lu tlunih a ummi tlunkhuh-kuum ihsin thawmvang cu a ra thang thotho.

26Cuih tlunkhuh-kuum tlunah cun lungmankhung tleu ih tuahmi siangpahrang tokham bangtuk a um. Cuih tokham parih totu cu minung pianhmang a keng. 27Cuih pianhmang cu meisa sungih a tleumi dar vaam bangtuk a si. A kiangkap hmuahhmuah cu vaangzet in a tleu. 28Vaangro bangtuk in pianzia phunkim a nei. Hi tleunak cu Bawipa ih umnak langtertu a si.

⇑

[Remove Footnotes]