SEEMTIRNAK

(Genesis)

Thuhmaihruai

Seemtirnak (Genesis) timi cu, “Thawhkehnak,” asilole “Hramthawhnak” tican a si. Hi cabu hin lei le van seemsuah thu, milai thawhkehnak, leitlunah sualnak le tuarnak hramthawhnak le Pathian le milai ziangtin an pehzom-aw timi thu tla a sim. Seemtirnak hi ṭ hen hnih ih ṭ hen a theih.

1) Bung 1-11 sungah hin leilung seemsuahnak thu le Pathian ih seemsuah hmaisa milai pawlih thu a um. Adam le Evi thu, Kain le Abel ih thu, Noah le Tilik thu le Babel lungdawl thu tla an um.

2) Bung 12-50 sungah Israel miphun pupa suahkehnak thu a um. A hmaisa bikah a zumnak le Pathian thu a ngainak ruangih hminsintlak a si mi Abraham ih thu a um. Cumi hnu a fapa Isaak ih thu, a fasuan Jakob ih thu (Israel ti khalih kawhmi), Israel hrin hleihnih thlahtu Jakob ih fapa hleihnih pawlih thu in a thlun. Cumi pawl lakah Josef ih thuhla kha tam deuh in a um. Jakob le a fapa dang le an innsungsaang pawl Ezipt ramih an fehnak thuhla kha a rel tam cuang.

Hi cabu hin minung thu a sim; asinain a tumtah bikmi cu Pathian ih thiltinak thu a si. Pathian in ziang hmuahhmuah a seemsuah a si tiin a thok ih Pathian in a miphun pawl zawn a ruahnak a langter lai hrih ding tiih thutiamnak thawn a cem. Hi cabu a thawhnak ihsin a cem tiang thuanthu neitu cu Pathian a si. Cule ṭhatlonak a tuahtu pawl thu ṭhennak le hremnak an tong ih a minung pawl bawm le hruai in an thuanthu hmuihmel rak neihtertu cu Pathian hi a si, ti a langter. Himi hlanlai cabu hi miphun pakhat ih zumnak le a cuih zumnak a nun theinak ding bawmtu dingah ngan ih hminsinnak thuanthu a si.

Thutlangpi
Lei le van le milai seemsuahnak (1:1-2:25)
Sualnak le tuarnak hramthawhnak (3:1-24)
Adam ihsin Noah tiang (4:1-5:32)
Noah le Tilik (6:1-10:32)
Babel lungdawl (11:1-9)
Shem ihsin Abraham tiang (11:10-32)
Cithlahtu pawl - Abraham, Isaak, Jakob (12:1-35:29)
Esau ih tesinfa pawl (36:1-43)
Josef le a unau pawl (37:1-45:28)
Israel pawl Ezipt ah (46:1-50:26)

Seemtirnak 1

Seemsuahnak Thu

1A hmaisa bikah Pathian in lei le van tla a seemsuah. 2Lei cu pianhmang nei lo thlahawmpi lawng a rak si. Thimnak in ti thukpi cu a khuh ih, Pathian ih Thlarau cu tipi parah a leng. 3Cun Pathian in, “Tleunak um seh,” ti ah a ti ih tleunak cu a um. 4Pathian in a zoh tikah a ṭha a ti. Cun Pathian in tleunak cu thimnak ihsin a ṭhen. 5Tleunak cu “Sun,” ti ah a ko ih thimnak cu “Zan,” ti ah a ko. Zanlam a liam ih zinglam a suak, ni khatnak a si.

6Cun Pathian in, “Tidai ṭhentu ah vankuumpi um seh, hmun dangdang ah tidai cu um haiseh,” ti ah a ti. A ti bangtuk in a um. 7Vankuumpi cu Pathian in a tuah ih a hnuai tidai le a tlun tidai cu a ṭhen. 8Pathian in vankuumpi cu, “Van,” ti ah a ko. Zanlam a liam ih zinglam a suak, ni hnihnak a si.

9Cun Pathian in, “Leicar a langnak dingah van hnuai ih tidai tla cu hmunkhat ah khawm-aw haiseh,” ti ah a ti. A ti bangtuk in a cang. 10Pathian in leicaar cu, “Leilung,” ti ah a ko ih hmunkhatih a kom-awmi tidai cu, “Tifinriat,” ti ah a ko. Pathian in a tuah ciami a zoh tikah a ṭha a ti. 11Cun Pathian in, “Leilung in thingkung hramkung a phunphun, ci a neimi le rah a neimi, suahseh,” ti ah a ti. A ti bangtuk in an cang. 12Curuangah ci a neimi le rah a neimi thingkung hramkung phunkim leilung in a suahter. Cun Pathian in a tuah ciami a zoh tikah a ṭha a ti. 13Zanlam a liam ih zinglam a suak, ni thumnak a si.

14Cun Pathian in, “Sun le zan ṭhentu dingah, ni le thla le kum ṭhentu dingah, le nithla relnak ah van ah khin tleunak tla um haiseh; 15Van ah an vaang ding ih leilung ah tleunak an pe ding,” ti ah a ti. A ti vekin an um. 16Cuticun Pathian in tleunak tumpi pahnih a tuah: sun caan reltu-ah ni a tuah ih zan caan reltu-ah thlapi a tuah. Arsi pawl khal a tuah. 17Leilung tleutertu dingah hi tleunak pawl tla cu Pathian in van ah a ret. 18Sun le zan uktu dingah le tleunak le thimnak ṭhentu dingah an si. Pathian in a tuah ciami a zoh tikah a ṭha, ti ah a ti. 19Zanlam a liam ih zinglam a suak, ni linak a si.

20Cun Pathian in, “Ti sungih a nungmi sahring a phunphun tidai in suahseh, leitlun thli lak khalah vate tla zam haiseh,” ti ah a ti. A ti vekin an cang. 21Curuangah ti sungih ṭihnungza sahring tumpipi Pathian in a seemter, ti sungih a um a nungmi sahring a phunphun tla a seemter; cun vate a phunphun khal a seemter. Pathian in a tuah ciami a zoh tikah a ṭha, ti ah a ti. 22Cun Pathian in, “Ti sungih a nungmi sahring pawl cu pungzai uhla tipithuanthum khat ṭheh uh, vate pawl khal pungzai uhla leitlunah khat ṭheh uh,” ti ah thlawsuah a pek. 23Zanlam a liam ih zinglam a suak, ni nganak a si.

24Cun Pathian in, “Innzuat sumhnam a phunphun le hramlakih ramsa a tum siseh, a fate siseh, a bokvakmi phunzakip leilung in suahseh,” ti ah a ti. A ti bangtuk in an cang. 25Cuticun Pathian in innzuat sumhnam a phunphun le hramlak ramsa a tum siseh, a fate siseh, bokvak ih a caang theimi hmuahhmuah tla a tuah. Pathian in a tuah ciami a zoh tikah a ṭha, a ti.

26Cun Pathian in, “Milai tuah thlang uhsi; kanmah ih hmuihmel kengin kanmah bangin kan tuah pei. Ti sung um nga le vanih a zammi vate tlunah siseh, innzuat sumhnam le hramlak ramsa a tum a seen parah siseh, bokvak ih a caang theimi tlun khalah siseh, thu an nei pei,” ti ah a ti. 27Cuticun Pathian in milai * cu a seemsuah; Pathian in amah ih hmuihmel vekin a seemsuah. Pathian in mipa le nunau a seemsuah a si. 28Cun Pathian in an hnenah thlawsuah a pek ih, “Fa tampi nei in pungzai uhla leilung hi nan luahkhat pei ih nan thuthu in nan umter pei. Ti sungih nga siseh, lei parih a vakmi ramsa tinkim a tum a seen le vanih vate hmuahhmuah tlun khalah siseh, thuneihnak ka lo pe,” ti ah a ti. 29Cuih tlunah Pathian in, “Leilung tlunah thlaici a phunphun le thingtheirah a phunphun nan ei dingah ka lo pe a si; 30vate phunzakip le ramsa tum le te phunzakip, a bokvak theimi ih an rawl dingah hramhring le thingrah ka pe a si,” ti ah a ti. A ti bangtuk in an si. 31Cun Pathian in a tuah ciami hmuahhmuah a zoh tikah a ṭha ngaingai ti ah a ti. Zanlam a liam ih zinglam a suak, ni ruknak a si.

⇑

[Remove Footnotes]