HABAKKUK

Thuhmaihruai

Profet Habakkuk in hi thu hi 600 BC cemnak lamih a simmi a si ih Babilon pawl an cah laifang caan a si. Babilon an nuncan an ziaza a ṭha lo tuk lawmmam ih cumi cun a thinlung a natter tuk ih Bawipa ih hnenah, “Anmah hnakih fel sawnsawn milai an siatsuah rero ih ziangtinso nang daitein na um?” tiah thu a sut (1:13). Cutikah Pathian in, “Amah a tikcu a thlen tikah ka ti leh ding. A ding le a fel pawl cu Pathian an rinsannak thawngin an nung ding,” (2:4) tiah a ti.

A ding lomi harsat an tuarnak ding simsungnak le Pathian ih ropitnak thu le hi cabu ngantu in Pathian a rinsannak thu pawl cu hih cabu a netnak lamah kan hmu thei.

Thutlangpi
Habakkuk ih phunzainak le Bawipa ih lehnak (1:1-2:14)
Thudik lo pawlih siatnak ding (2:5-20)
Habakkuk ih thlacamnak (3:1-19)

Habakkuk 1

1Profet Habakkuk hnenah Bawipa ih thu a ra thlengmi cu hiti in a si.

Habakkuk A Phunzai

2Maw Bawipa, bomnak dil in ka aunak hi ziangtikah so i theihsak ding? Tisiatnak sungin in runsuak hlanah hin voi ziangzatso ka lo kawh ding? 3Ziangah so hi bangtuk harsatnak cu i tonter? Ziangtin so hitluk thil ṭha lo an tuahmi hi na zoh thei cuahco lai? Siatsuahnak le tisualnak hlir ka kiangkap ah an khat ih thawi awknak le tawh awknak lawnglawng khuazakip ah a um. 4Daan timi hi hmual a nei lo ih ṭhathnemnak khal a nei lo. Thildik timi cu tuahsuak a si dah lo. Mi ṭha lo pawl in mi ṭha pawlih lu parah an kai; cuticun thufel timi cu anmah ih duhduh in an her thei a si.

5Cule Bawipa in a minung pawlih hnenah, “Nan kiangkap ih miphun pawl hi zoh ṭha uh; nan hmuh tikah cun nan mang a bangzet ding. Thil pakhat ka tuah ding ih nan theih tikah nan zum lo ding. 6Mi puar le mi tokhrok pawl Babilon mi pawl kha thuneitu ah ka tuah ding. Anmah cu ram dang neh dingin leilung pumpi ah an feh. 7Khawzakip ah thinphannak le tuksumnak hlir an khahter. An hngal tukah anmah ih thu lawng daan ah an neih a si.

8“An rang pawl cu tlavang hnakin an zamrang sawn; riilrawng cinghnia cang hnakin ṭih an nung sawn. An rangralkap pawl cu an rang to in ram hlapi ihsin an ra. An rang cu leilung an huat phahphah. Khaupi in an sadehmi an zon bangin ral cu an zon a si.

9“An ralkap pawl in ram an nor vivo; a kham theitu zohman an um lo. An thlen ding thawmvang an theih cun zozo khal ṭihnak in an khat. Ral an kaihmi cu vunnel zat in an tam. 10Siangpahrang pawl an nautat ih bawi upa pawl an hnihsan. Ziangvek ralhruang hman in a kham thei lo. A leng ihsin lei an dawl ih an lak thei thotho. 11Cule thli bangin an hrang ih an hlota. An cahnak kha khawzing tlukah an ruat!” tiah a ti.

Habakkuk A Phunzai Sal

12Maw Bawipa, a hramthok ihsin nang cu Pathian na si. Nang cu ka Pathian na si, a thianghlimmi le kumkhua in a hmunmi na si. Maw Bawipa, ka Pathian le ka Lungpi, nangmah in Babilon mi pawl cu na hriil zo ih kanmah hrem theitu tiangin na cakter. 13Sikhalsehla ziangtinso hitluk mi ṭha lo le mi huaisen pawl hi na zawi thei? Thil ṭha lo zoh-nakah na mit cu an thianghlim tuk ih sualnak a tuahtu pawl cu na hmu thei ṭheu lo a si. Ziangah so anmah hnakih miding pawl an siatsuah rero nain daiziar ih na um san men? 14Ziangtin so minung cu uktu le hotu nei lo nga vek le cucik kharbok vek tlukah na tuah? 15Babilon mi pawl in midang cu nga vekin sio in an sio. Sur in an awk, an dirhsuak ih an kaihmi ruangah lungawi in an au ciamco. 16An sur in thil ṭha bik an ngah thei ruangah an sur hnenah raithawinak an pek ih an biak a si.

17Kumkhua in maw an ralnam hmang tahratin miphun pawl cu zaangfahnak nei loin an siatsuah rero ko ding?

⇑

[Remove Footnotes]