HAGGAI

Thuhmaihruai

Haggai cabu cu 520 BC laiih profet Haggai hnenah Bawipa ih simmi thu tawite ngannak a si. Judah pawl kha an saltaannak ihsin an kirsal ih tawkfang Jerusalem ah an um sal zo. Asinain Biakinn cu amah keel in a siat lai. Haggai hin Biakinn remsal dingah a forh ih Pathian in thlawsuahnak le daihnak a lo pe ding a si, tiah a ti.

Thutlangpi
Biakinn sak sal dingih thupeknak (1:1-15)
Hnemnak le ruahsannak thu a sim (2:1-23)

Haggai 1

Biakinn Sak Dingah Bawipa Ih Thupeknak

1Darias in Persia siangpahrang a ṭuannak kum hnihnak, thla ruk thla, ni khat ni ah Bawipa ih ṭong cu profet Haggai hnenah a rung thleng. A rung thlengmi thu cu Judah ram uktu bawi, Shealtiel ih fapa Zerubbabel hrangah le puithiam sang Jehozadak ih fapa Joshua hrangah a si.

2Cungnungbik Bawipa in Haggai hnenah, “Atu hi Biakinn sak salnak dingah cun tikcu remcaang a si lo tiah mipi in an ti ciamco,” a ti. 3Curuangah profet Haggai hmangin miseenpi hnenah Bawipa ih thu cu hiti in a si: 4“Maw ka minung pawl, ka Biakinn hnawmpen vekih a um laiah ziangah so nannih hmuah inn ṭhaṭha ah nan um? 5Nan parih thil a thlengmi hi nan hmu thiam lo maw si? 6Rawl ci tampi nan tuh, a sinain rawl malte lawng nan lak. Rawl ei ding nan nei, a sinain pum puar tlak nan nei lo. Sabit in ding nan nei, a sinain rit tlak hman nan nei lo. Hnipuan hruh ding nan nei, a sinain a lo hlumtertu hnipuan ṭha nan nei lo. Hnaṭuantu khal in pumcawmnak tlak nan hlawh lo. 7Ziangruangah hi bangtuk hin nan parah a cang ti nan thei lo maw si? 8Tlangpar ah va kai uh, thing va lak uhla Biakinn sak sal uh. Cutikah ka lung a awi dingih cutawkah ka sunlawinak ka langter ding.

9Rawl kan paṭha zet ding tin nan ruat, a sinain nan lakmi ngaingai cu a malte a si. Nan rawl cu inn ih nan run tlun tikah keimah in ka semhlo ṭheh. Ziangah so ka semhlo nan thei maw? Nan zatein nanmah inn ciar nan sak ih manhlap zetih nan um laiah kei ih inn cu balsiat ṭhehmi hnawmpen vekih nan umter ruangah a si. 10Curuangah sokhaw ruah tla a sur lo ih zianghman a khoh thei lo cu! 11Ruah sur loin leilung ka carter ṭheh: tlangpar le lo sung le Sabit hmuan pawl le olif hmuan pawl, leilung parih a khomi rawl kung parah le minung le ṭilva tlunah le milai in ciin an tummi thil hmuahhmuah parah ruah ka surter lo ih ka caarter a si,” tiah a ti.

Miseenpi In Bawipa Ih Thu An Thlun

12Cutikah Zerubbabel le Joshua le Babilon saltaannak ihsin a ra kirtu pawl hmuahhmuah in Bawipa an Pathian fialmi cu an tuah. An thin a phang ih Bawipa ih palai a si mi profet Haggai ih thu cu an ngai. 13Haggai cun Bawipai’ thu cu miseenpi hnenah a sim: “Nan hnenah ka um ding, tiah thu ka lo kam a si,” a ti. 14 Bawipa in mi hmuahhmuah cu Biakinn ṭuan dingah an lung a thoter: Judah ram uktu bawi Zerubbabel, puithiam sang Joshua, le saltaannak ihsin a ra kirtu pawl an tel ṭheh. Cungnungbik Bawipa, an Pathian ih biakinn cu sak sal an thok. 15Darias in Persia siangpahrang a ṭuannak kum hnih kum, thla ruk thla, ni kul hluan li ni ah an thok a si.

⇑

[Remove Footnotes]