HOSEA

Thuhmaihruai

Profet Hosea ih thusimnak hmun cu Saklam Israel ramah a si ih profet Amos hlan, Samaria a siat hlan deuh 721 BC, harsat le buaizet caan laifangte ah a si. A sim bikmi thu cu Israel pawlih milem an biaknak thu le Pathian hmaiah rinsantlak loih an umnak kha a si. Cu bangtuk ih an um kha Hosea amah in zumtlak lomi nupi ih a neihmi thawn a bangaw a si a ti. A nupi Gomer in a pasal Hosea parih zumtlak loin a um bangin Israel pawl in an Pathian an tlansan zo a si. Himi thu ruangah Israel pawl parah harsat tuarnak ding thuṭhennak a thleng zo. Asinain a neta bikah a hngetkhohmi Pathian ih duhdawtnak in mi a neh pei ih Israel pawl kha amah ih lamah a hruai thei sal ding. An pehtlaih awknak khal a hmaisa bangtuk thotho in a si sal ding a ti. Himi a duhdawtnak thu cu 11:8-9 ah a lang.

Thutlangpi
Hosea ih nupi ṭhitnak le a innsang (1:1-3:5)
Israel ralsan ih a thusimnak (4:1-13:16)
Sualsirnak le thutiamnak a simmi (14:1-9)

Hosea 1

1Judah siangpahrang Uzziah, Jotham, Ahaz le Hezekiah pawl siangpahrang an ṭuan san le Israel siangpahrang, Joash fapa Jeroboam in siangpahrang a ṭuan laiah Bawipa ih thu cu Beeri fapa Hosea hnenah a ra.

Hosea Ih Nupi Le Faate Pawl

2 Bawipa in Israel miphun hnenih a ṭong tikah hmaisa bik ah Hosea hnenah, “Feh awla nupi va ṭhi aw; na nupi cu hlawhhlang a si ding ih na faale pawl khal an nu vek an si ding. Ka miphun in in tlansan zo ih hlawhhlang phun ah an cang zo,” tiah a ti.

3Curuangah Hosea cun Gomer a ṭhit. Gomer cu Diblaim fanu a si. Fa a vun ih fapa a hring. 4Cutikah Bawipa in Hosea hnenah, “A hminah ‘Jezreel,’ sak aw; ziangahtile Israel siangpahrang ih pu Jehu in Jezreel khua ih mi a rak thah ruangah a rei hlanah Israel siangpahrang ka hrem ding a si. Jehu tesinfa pawl ih uknak san cu ka cemter ding. 5Cule Jezreel phairawn ah Israel ralkap pawlih cahnak cu ka siatsuah ṭheh ding a si,” tiah a ti.

6Gomer in fa pahnihnak a hun nei ih fanu a si. Cule Bawipa in Hosea hnenah, “A hmin ah ‘Lo-ruhamah,’ * sak aw; ziangahtile Israel mi pawl cu ka lainat nawn lo ding ih ka ngaidam nawn lo ding. 7Asinain Judah mi pawl cu ka lainat ding. Bawipa an Pathian keimah in ka run ding; a sinain cutiih ka run tikah raldonak ralnam, li le thal, rang le rangralkap thawn ka run lo ding,” tiah a ti.

8Gomer in a fanu cu pawhte fawp a baanter hnuah fa a vun sal ih fapa a hring. 9Cutikah Bawipa in Hosea hnenah, “A hmin ah ‘Lo-ammi,’ * sak aw; ziangahtile nannih Israel mi cu ka minung nan si lo ih kei khal nan Pathian ka si lo,” tiah a ti.

Israel Cu Dinter Sal A Si Ding

10Israel miphun cu tifinriat ih vunnel zat an si leh ding; tah cawk lo le siar cawk lo an si ding. Atu-ah Pathian in, “Israel cu ka minung a si lo,” a ti. Asinain “Nannih cu a nungmi Pathian ih faate nan si,” a ti ni a ra thleng leh ding. 11Judah mi le Israel mi cu an kom-aw sal ding. Anmah hrangah hruaitu pakhat an hriil ding ih a hlanlai vekin an ram sungah an karhzai ding ih an ṭhangso ding. Asi, Jezreel * san cu san maksak a si ding.

⇑

[Remove Footnotes]