ISAIAH

Thuhmaihruai

Isaiah ca-uk hi BC 700 hrawng, Jerusalem ih rak um profet maksak pakhat Isaiah an timi pa ih hmin laak in an bun mi ca-uk a si. Hi ca-uk hi ṭhen thum ih ṭhen a theih: (1) A tumpi 1-39: Himi sung thu hi thlanglam ram Judah kha a ram kiang um Assiria in do dingih a hro lai ih a cang mi thu a si. Judah pawl an nunnak ahhin ṭih ding ngaingai mi cu Assiria ih donak siloin an miphun pi ih sualnak le Pathian thu an ngai lonak le Pathian an rinsan lonak sawn a si deuh ti hi Isaiah ih hmuh daan a si. Curuangah Isaiah in mipi le hruaitu pawl thudik le fel in an umnak dingah le Pathian thu an thlun lo a si le siatnak an tonnak ding thu ṭongfang le thuṭhim cawnnak in a hmuh sak. Cui tlunah leitlun ih ral daihnak a um theinak ding thu le David tefa sin sung ihsin siangpahrang ṭha a suahnak ding thu khal a sim a si. (2) A tumpi 40-55: Hi caan hi Judah pawl mi tampi Babilon sal ah an taang ih thinpit le ruahsannak nei nawn loih an um laifang caan a si. Pathian in a minung pawl nunnak thar thok sal dingin le an umnak Jerusalem ah a hruaikir ding a si ti thu profet in a phuang. Himi sungih hminsin tlak mi cu: Pathian cu san thuanthu ih Bawipa a si ih a minung pawl hrangih a tumtah mi sungah mi phunzakip hnenah hnaṭuan ding le Israel pawl ruangah thlawsuah ngah dingnak thu tla a tel. “Bawipa Riantu,” timi thu a simnak zawn (Isa 52-53) hi Thukam Hlun sungah cun theih tambikmi a si. (3) A tuumpi 56-66: sungih thu cu Jerusalem ih a ra thleng kir zo mi pawl hnen ah Pathian in a thutiam mi a kim ter ding a si ti thu an zum ngah thluhnak dingah forh le thapeknak a si. Felnak thu, Sabbath ulhnak thu, raithawinak thu le thlacamnak thu zirhnak tla kan hmu. Ciinken ding tlak mi thu cu 61:1-2 sungih um mi Jesuh in hnaṭuan hram a thawh tikih a hman mi ṭongfang hi a si.

Thutlangpi
Ralrin peknak le tiamkamnak (1:1-12:6)
Hnam tinkim a hremnak (13:1-23:18)
Leitlun thu a ṭhennak (24:1-27:13)
Ralrin peknak le thutiam salnak (28:1-35:10)
Judah siangpahrang Hezekiah le Assiria pawl (36:1-39:8)
Thutiamnak le ruahsannak thuthang (40:1-55:13)
Ralrin peknak le thutiamkamnak pawl (56:1-66:24)

Isaiah 1

1Amoz fapa Isaiah in, Judah siangpahrang Uzziah, Jotham, Ahaz le Hezekiah pawl san ah, Judah le Jerusalem hrangih Pathian ṭongkam a theih mi cu hiti in a si.

Pathian In A Minung Pawl Nun A Sim

2 Bawipa in, “Maw lei le van, ka ṭongmi hi thei uh. Ka cawm mi ka faate pawlin in dodal a si. 3Caw in a neitu an thei; laak khalin an bawipa ih rawl peknak kuang an thei. Asinain ka minung Israel cun cutluk hman an thei lo. Zianghman an thei bembem lo a si,” a ti.

4Maw Israel, nannih misual, mimawh, thilṭha lo lawnglawng a tuah ih nawhthuh a ei mi minung pawl, nan cemthla a si. Nan sualnak in a lo dirhthlak a si. Bawipa, Israel ih Pathian thianghlim cu nan dungtun a si. 5Ziangruangah ral nan tho ringring? Nasa sinsin ih hrem nan duh maw si? Maw Israel, na lu cu hma in a khatih na thin le na lung cu natnak a tuar. 6Na kezim ihsin na luthlung tiang a dam mi khui hmanah a um lo. A pem mi le a dup mi le a bauh mi hlir in a khat a si. Na hma pawl cu kholhfai mi a si lo, tuam mi khal a si lo. Sii hnih mi khal a si lo.

7Nan ram cu siatsuah ṭheh a si ih a ṭhing reprep; nan khua pawl cu meisa in a kaangṭheh zo. Nan mithmuh rori ah miphundang pawlin nan ram cu an lakih an siatsuah ṭheh a si. 8Jerusalem khua lawnglawng a taang ih anih khal cu ral ih kulh ṭheh mi khawpi a si; sabit hmuan ih hmuan kiltu deu le fanghma hmuan ih sak mi thlam vekin bawmtu le ṭantu neilo khawpi a si. 9Cungnungbik Bawipa in mi hrekkhat pawl zuah hlah sehla, Sodom le Gomorrah khua vekin a hloral ta mi khawpi a si zo ding.

10Maw Jerusalem, na minung le na uktu pawl cu Sodom le Gomorrah minung le uktu bangtuk an si. Na hnenih Bawipa ṭongkam hi ngai ṭha hnik. Kan Pathian ih a lo zirh mi hi ruat ṭha hnik. 11 Bawipa in, “In pek ringring mi thawinak pawl hi ka duhzet ah maw nan ruat? Thawinak ih nan ur mi tuu pawl le nan ṭilva thau zetzet pawl hi ka khop zo. Nan caw, nan tuu le nan me thisen pawl hi ka ningtuk zo! 12In biak tikah hipawl rak keng dingah zoso a lo fial? Ka Biakinn sung ra hnaihnok tu dingah zoso a lo sawm? 13Nan thil pek mi pawl hi zianghman ah a ṭhahnem lo. Rimhmui nan pek mi pawl hi ka fih a si. Nan Thla Thar Puai pawl, nan Sabbath pawl le nan pumkhawmnak pawl hi ka tuar thei nawn lo. Nan sualnak in a siatsuah ṭheh zo a si. 14Nan Thla Thar Puai le nan ulh mi nan puai pawl hi ka hua. Ka hrangah thilrit an si ih ka tuar thei nawn lo a si!

15Baan pharh in thla nan cam hman ah ka lo zoh lo ding. Ziangtluk tam ih nan cam khal le ka lo ngaisak lo ding; ziangah tile nan kut cu thisen in a khat a si. 16Thiangfai in kholh aw uh; ka mithmuh ih nan tuah rero mi thilsual pawl hi tuah nawn hlah uh. A si, thilṭha lo tuah cu baang thlang uh; 17Thilṭha tuah zir uh. A dikmi hawl uhla, hremnak a tuartu pawl bawm uh. Nu le pa neilo ngakṭah pawl bawm uhla nuhmei pawl ṭan uh!

18 Bawipa in, “Ra uhla kan ruat tlang hnik pei. Nan sualnak cu sen-eu bangin sen hmansehla, vur bangin ka lo thiangfai ter ding; sendup bangin dup hmansehla tuuhmul bangin ka lo vaar ter ding. 19Ka thu nan ngai a si ahcun hi ram ih a suah mi thilṭha nan ei ding. 20Asinain ka thu nan eel ih in dodal a si ahcun nan thi rori ding. Bawipa keimah in ka ṭong zo a si,” a ti.

Khawpi Sual

21Rintlakzet a si mi khawpi cu hlawhhlang ah a cang. Khuahlan ahcun miding pawl umnak khawpi a si; atu ahcun mithat pawl lawnglawng an um. 22Maw Jerusalem, khuahlan ahcun ngun bangtuk na rak si; atu ahcun man neilo na si. Khuahlan ahcun sabit zu thawzet bangtuk na rak si; atu ahcun tidai lawng na si. 23Na hotu pawl cu ralthotu le rukru pawlih rualpi hlir an si. Thu an rel tikah nu le pa neilo farah pawl an ṭan dah lo ih nuhmei pawlih thu cu an ngaisak dah lo.

24Curuangah, cungnungbik Bawipa, Israel ih Pathian, a maksak mi ih a sim mi hi ngaiṭha aw; Bawipa in, “Ka ral ih a cang zo mi na parah hin phu ka la ding; cuticun hnaihnawhnak in pe nawn lo ding. 25Na parah ka thinhengnak a thleng sal ding. Thir an ser vekin somei ah ka lo ser dingih na balhnak hmuahhmuah cu ka hlon thluh ding. 26Khuahlan ih hotu le remruattu pawl vekin hotu le remruattu a thar in ka lo pe ding. Cuticun Jerusalem cu a dingmi le rinsantlak khawpi ti ih kawh a si ding,” a ti.

27 Bawipa cu a ding mi a si ruangah Jerusalem cu a hum dingih sual a sirtu hmuahhmuah a run ding a si. 28Asinain a sualtu le amah a dotu hmuahhmuah cu dip ṭheh in a rial dingih amah a hnongtu pawl cu a that ding a si.

29Thingkung nan biak ruangah le hmuan thianghlim sungih milem * nan biakmi ruangah ningzak in nan um ding. 30A thi mi sasua kung vekin nan vuai dingih zohman ih tidai toih lo hmuan vek nan si ding. 31Hramro cu meici fate in a kang thei vekin micak le mi nasa pawl khal anmah ih thilsual tuahnak in a siatsuah dingih cuih siatsuahnak cu zohman in an mit thei nawn lo ding.

⇑

[Remove Footnotes]