JOB

Thuhmaihruai

Job cabu hi miṭha pa pakhat harsatnak nasa zetih a tuarnak thu a si. A faate, a neihsiah a sumsaw pawl in an hlohsan thluh ih natnak fihnungza in a tlun. Cumi cu Job le a rualpi pawl in himi thil umdaan hi ziangtin an hmu ve ti kha himi cangantupa hin hla fiing thum (hla fiing burpipi in bur thum) in a sim. A neta bikah milai thawn pawlkom-awk a thupittertu Amah Pathian khal Job hnenah a lang.

Job ih rualpi pawl cun Job ih tuarnak kha an pupa biaknak zum daan in a sullam an sim. Anmah ih tidaan ahcun Pathian hin miṭha cu laksawng a pe ih miṭha lo cu a hrem ṭheu ruangah atu Job ih tuarnak hi a sual ruangah a si, an ti. Asinain Job hrangah cun hi bangtuk ruahnak cu a puan tuk. Zianghrangah tile Job cu miṭha ngaingai a rak si fawn ih an tidaan vek a si ah cun hremnak sawn si loin laksawng co ding a si sawn. Asinain a comi cu hremnak nasazet a si fawn. Amah bangtuk milai parah Pathian in ṭhat lonak hi bangtuk a thlenter mi hi a tican a thei thei hrimhrim lo. Curuangah ralṭha zetin Pathian a mawhthluk ve rero. Job cun a zumnak a hlohter hrimhrim lo. Asinain Pathian hmaiah thiam comi a sinak langter a duh ih miṭha sinak ruangih hminṭhatnak kha ngah sal a duh.

Pathian in Job ih thusuhnak kha a let lo. Asinain ziang hmuahhmuah tuah theitu a sinak le ziang hmuahhmuah thei thluhtu a sinak kha Job hnenah a theihter ih cumi cun Job ih hna a ngamter. Cutikah tangdornak thawn Job cun Pathian ih fimnak le maksaknak kha a hun mang ih a ṭongka hraang le a thinhengnak pawl a siir-aw sal.

Job cu a neta lamah a hlanih a dinhmun keelte ah a thleng kirsal ih a hlan hnak hman in a neihmi a tam sawn. Job ih tuarnak kha a rualpi pawl in a tican an theihthiam lo ruangah Pathian in a mawhthluk. An pupa biaknak ih rak langternak hnakin Pathian hi a maksak sawn ti kha Job lawngin a tep ngah.

Thutlangpi
Thu hramthok (1:1-2:13)
Job le a rualpi pawl (3:1-31:40)
   (a) Job ih phunzainak (3:1-26)
   (b) A voikhatnak biak awknak (4:1-14:22)
   (c) A voihnihnak biak awknak (15:1-21:34)
   (d) A voithumnak biak awknak (22:1-27:23)
   (e) Fimnak a lawm (28:1–28)
   (f) Job ih a neta bik thusim (29:1-31:40)
Elihu ih simmi thu (32:1-37:24)
Pathian in Job thu a let (38:1-42:6)
Thunetnak (42:7-17)

Job 1

Job Le A Innsang

1Uz * an timi ramah mi pakhat a rak um ih a hmin cu Job a si. Job cu Pathian betu le a rinsan zettu a si. Amah cu miṭhazet a si ih thil ṭha lo zianghman tuah a duh lo. 2Fapa pasarih le fanu pathum a neih ih tlunah, 3tuu thawng sarih, kalauk thawng thum, caw thawng khat le laak zanga a nei. Hnenum tampi tla a nei ih Nisuahnak lam hmuahhmuah ah milian bik a si.

4A fapa pawl cun a haha tein rawl ei puai an tuah ṭheu ih hmun khatah rawl an ei khawm ṭheu; an farnu pawl tla an sawm ṭheu. 5An puai a cem tikah a thaizing zingpitah Job cu a tho ih a faate pawl thianfaiternak ah thawinak a pe ṭheu. Tumtah hrimnak um loin Pathian an hmuhsuam ding ih an sual pang ding ti a phan ruangah cuticun a tuah ringring a si.

Pathian Le Satan Biakawknak

6 Bawipa ih hmaiah vanmi pawl an ra suah ni a thlen tikah Satan * khal cu an hnenah a tel ve. 7Cutikah Bawipa in, “Khuilam inso na rat?” tiah Satan cu a sut.

Satan in, “Leilung pumpuluk, suk le so ka vahnak in ka ra,” tiah a ti.

8 Bawipa in, “Ka siahhlawh Job khi na hmu maw? Leilung pumpuluk ah amah bangtuk miṭha le rinsantlak zohman an um lo. Keimah i bia ih thil ṭha lo zianghman a tuah lo,” tiah a ti.

9Cutikah Satan in, “Zianghman ngah hlah sehla a lo bia duh leem pei maw? 10Amah siseh, a innsang siseh, a neihmi hmuahhmuah tiangin na humhim ih na kilkhawi. Thil a tuahmi hmuahhmuah parah mal na sawm ih rannung na pekmi pawl an tamtuk ih an ramah a khat ṭheh a si. 11A neihmi hmuahhmuah khi laksak ṭheh cila na hmaika rori ah a lo cam mai ding,” tiah a ti.

12 Bawipa in Satan hnenah, “Na ti bangtuk cun siseh. A neihmi hmuahhmuah na kut sungah a um. Amah Job lawngte na siatsuah lo pei,” tiah a ti. Cule Satan cu a feh.

Satan In Job A Hniksak

13Voikhat ah Job ih faate pawl cu an upa bik pa ih inn ah rawl ei khawmnak puai an tuah laifangah, 14mi pakhat cu Job hnenah a ra tlan ih, “Caw thawn lei kan let rero ih laak pawl cu kan kiangkapah hrampi an piat rero laiah, 15rinlopi in Sabean * mi pawl in an ra siim ih kan rannung hmuahhmuah in long ṭheh. Keimah siar lo na hnenum hmuahhmuah an that ṭheh. Keimah lawnghi zualkotu ah ka tlan man a si,” tiah Job cu a ra sim.

16Cupa ih ṭong a cem hlanah hnenum dang pakhat a ra thleng ih “ṭeek in na tuurual le na tuukhaal pawl a tlak ih an zatein an thi ṭheh. Keimah lawng hi zualkotu ah ka tlan man a si,” tiah Job cu a ra ti.

17A ṭong hman a cem hlanah hnenum dang pakhat a ra tlan lala ih, “Khaldean * mi damiah rual bu thum in in siim ih kalauk hmuahhmuah an lak thluh ih tlunah keimah siar lo na hnenum dang hmuahhmuah an that ṭheh. Keimah lawnghi zualkotu ah ka tlan man a si,” a ti.

18A ṭong hman a cem hlanah, hnenum dang pakhat a ra lala ih, “Na fanu le na fapa pawl cu na fapa upa bik inn ih rawl ei puai an tuah laifangah, 19nelrawn ihsin thlisia a ra hrangih an inn a nuaithluk ih a sung um minung hmuahhmuah an thi ṭheh. Keimah lawnghi zualkotu ah ka tlan man a si,” tiah Job cu a ti.

20Cutikah Job cu a tho ih riahsia in a hnipuan a thlek ṭheh. A sam a meetkolh ṭheh ih leilung ah bok tahrat in, 21“Lawngfangkheh in ka suak ih lawngfangkheh in ka thi ding. Bawipa in i pek ih atu-ah a lak sal. A hmin thangṭhat si ko seh,” tiah a ti.

22A hnenah hibangtuk thil a thleng nain Job cun Pathian a mawhthluk lo ih Pathian hmaiah a sual lo.

⇑

[Remove Footnotes]