JONAH

Thuhmaihruai

Jonah cabu hi Baibal sungih a dang profet cabu tla thawn an bang-aw lo. Zianghrangah tile himi cabu hin a simmi cu Pathian ih fialmi ngai duh lo ih rak tlanhlo tumtu profet ih thuhla a sim. Israel ih ral a si mi Assiria khawpi Nineveh ah feh a fial. Asinain Jonah cun feh a duh lo. Pathian in a cuih khua kha siatsuah ding a timi khal a siatsuah ngaingai lem lo ding tiah Jonah in a zum. Amah ih taksa parah hmuhsaknak thu dangdang a um hnuah duh lo nacing in a feh sal ih Nineveh a siat ding tiih a rak simmi kha a siat sal lo ngaingai tikah a thin a hengzet.

Hi cabu sungah Pathian cu a seemsuahmi hmuahhmuah uktu a si ti thu a um. A simmi hmuahhmuah lakah a thupi bik cu: Pathian cu duhdawtnak le zaangfahnak neitu a si ih a ral pawl rori hman kha harsatnak pek ih hremsiat hnakin an sualnak ngaithiam in anmah runtu a si sawn, ti thu a langter.

Thutlangpi
Jonah kawhnak le thu a ngailonak (1:1-17)
A sualsir awknak le a luatsalnak (2:1-10)
Nineveh hnenih thu a simnak (3:1-10)
Pathian ih Nineveh a zaangfahnak (4:10-11)

Jonah 1

Jonah In Pathian Thu A Ngai Lo

1Nikhat ni ah Amittai ih fapa Jonah hnenah Bawipa in hiti hin a sim. 2“Tho awla a nasa zetmi khawlipi Nineveh ah va feh awla a sual zia va phuang aw. A ṭhat lozia hi ka hmu ṭheh a si,” a ti. 3Sikhalsehla Jonah cu Pathian hnen ihsin tlan dingah Tarshish khua ah feh a tum. Joppa khua ah a vung feh ih cutawkah Tarshish feh ding lawng pakhat a hmu. Long man a pek ih Bawipa ih hmuh ban lonak Tarshish khua ih feh dingah lawng parah cun a kai.

4Asinain Bawipa in thlipi nasa zetin a hranter ih tifinriat parah cun tilet maksak a tho ih an long cu a kuai ṭheh zik. 5Long hnaṭuantu pawl an thin a phang ngaingai ih an khawzing hnen ciar ah heh-le-heh tiah thla an cam ciamco. Cule an lawng zaang seh tiah lawng thilri tampi tidai sungah an hlon. Culai ah Jonah cu hnuaita khaan ah a rak itthat. 6Long bawipa cu a ra ih, “Ziangvek minung so na si, na rak ih thah meen? Tho awla na khawzing hnenah thlacam hmeen! Na khawzing in hlohter siang loin in run ruat khal a si thei meen so khaw!” tiah a ti.

7Cule neta bikah lawng hnaṭuantu pawl cun, “Ra hnik uh, hi tlukih kan van a siat hi zo ih ruangah so a si, camcawhfung kan zuuk hnik pei,” tiah an ti. Camcawhfung cu an zuuk ngaingai ih Jonah parah a tla riai! 8Cutikah a hnenah, “Hi tlukih kan van a siat hi zo ih ruangah so a si, in simhnik? Zianghna so na ṭuan? Khui ram in so na rat? Ziang miphun so na si?” tiah an suut ciamco.

9Jonah cun an hnenah, “Hebru mi ka si ih tifinriat le leilungpi a tuahtu vancung Pathian Bawipa a biatu ka si,” tiah a ti. 10Cun Jonah in Pathian hnen ihsin a tlan thu a sim hai tikah lawng hnaṭuantu pawl cu an ṭih sinsin ih, “Ziangah so hibangtuk thil cu na tuah?” tiah an kawk ciamco.

11Cule annih in, “Thlisia dai dingah ziangtinso kan lo ti ding?” tiah an suut. Ziangahtile thlisia cu a zual deuhdeuh!

12Cutikah Jonah cun, “Tidai sungah i hlon uhla thlisia hi a dai ding. Hitiih thlisia nasa zetih a hran hi keimah ih ruangah a si ti ka thei,” a ti.

13Long hnaṭuantu pawl cun leilung lam pan dingah an hlau rero nain tilet cu a nasa deuhdeuh ruangah an ti thei hrimhrim lo. 14A netnak ah Bawipa hnenah an au ih, “Maw Bawipa, hi minung pakhat ruangah hin kan zatein in cemter siang hram hlah aw. Mawh nei lo thisen kan parah tla lo dingin in zaangfah hram aw. Maw Bawipa, nang cun na duh bangin ziang hmuahhmuah hi na cangter a si,” tiah thla an cam. 15Cuih hnuah Jonah cu an cawi ih tifinriat sungah cun an hlon; cule tilet cu a dai. 16Cutikah lawng hnaṭuantu pawl in Bawipa cu an ṭih ngaingai ih thawinak an pek hnuah amah rian dingin thu an kam aw.

17 Bawipa in Jonah dolhtu dingah ngapi a fial ih Jonah cu ngapi pum sungah ni thum le zanthum a um.

⇑

[Remove Footnotes]