THUṬHENTU

(Judges)

Thuhmaihruai

Thuṭhentu cabu sungah hin Israel mi pawl in Kanaan ram an lak ihsin siangpahrang an neih hlan sungih cin le daan neilo ih an khuasak lai thuanthu a um. Hi thuanthu cu anmah ih ram sungih mi ralṭha, “Thuṭhentu,” tiih kawhmi pawl an si ih, cin le daan vekih ram hruaitu pawl si loin ralkap lamih hruai-awk daan sawn in ram uktu an si. Himi lakah mi tam bikih theih mi cu Samson a si. A hnaṭuannak pawl cu bung 13-16 sungah a um.

Hi cabu ih a zirh bikmi pakhat cu: Israel mi pawl hi an nun theinak dingah Pathian rinsan an ṭul ih Pathian parah rinsan tlak loih an um tik poh ah siatralnak an tong ti thu hi a si. Asinain cumi hnak hmanih a thupi deuh mi cu: an Pathian parah rinsan tlak loin an um ih siatralnak an ton hnu hmanah Pathian in a minung pawl cu an sual an siir-awk a si ahcun ngaithiam ih rundam dingah ralring cia ringring in Pathian cu a um, timi thu hi a si.

Thutlangpi
Joshua thih tiang thuhla (1:1-2:10)
Israel thuṭhentu pawl (2:1-16:31)
Thusuak dangdang (17:1-21:25)

Thuṭhentu 1

Adonibezek An Kai

1Joshua a thih hnuah Israel mi pawl in, “Kanmah lakah Kanaan mi pawl do ding in zo hrin so a feh hmaisa bik ding?” tiah Bawipa an sut.

2 Bawipa in, “Judah hrin pawl an feh hmaisa bik pei. Hi ram cu an hnenah ka pe zo a si,” tiah a ti.

3Cule Judah mi pawl in an unau Simeon mi pawl hnenah, “Bawipa ih in zemmi ram ah kanmah pawl thawn hmun khatah kan feh pei ih Kanaan mi pawl cu kan do tlang pei. Cuih hnuah an lo zemmi ram ah kan feh leh pei,” tiah an sawm. Curuangah Simeon mi pawl le, 4Judah mi pawl cu hmun khatah ral an do tlang. Kanaan mi le Periz mi pawl tlunah nehnak Bawipa in a pek ih Israel mi in Bezek ah mi thawnghra an that. 5Cutawkah siangpahrang Adonibezek a rak um ih an do. Kanaan mi le Periz mi pawl cu an neh. 6Adonibezek cu a tlan; a sinan an dawi ih an kaih hnuah a kut zungpi le a ke zungpi an tan. 7Cutikah Adonibezek cun, “An kut zungpi le an ke zungpi tan ṭheh mi siangpahrang sawm sarih in ka cabuai hnuai ah rawl ṭilfuan an rak sar ṭheu. Atu-ah an parih ka rak tuah vekin Pathian in ka parah a tuah ve a si hi,” tiah a ti. Amah cu Jerusalem khua ah an fehpi ih cutawkah a thi.

Jerusalem Le Hebron An Neh

8Cun Judah mi pawl in Jerusalem an nam ih an lak. Khawsung mi pawl an thah ṭheh hnuah an khua cu meisa in an ur. 9Cuih hnuah tlangpar ram, Negev * ram le hmunrawn ram ih a um mi Kanaan mi pawl do dingah an feh. 10Judah mi pawl cun a hlan ih Kiriath Arba khawpi an timi Hebron khua sungih a ummi Kanaan mi pawl cu an do ih Sheshai, Ahiman, le Talmai tla an neh a si.

Othniel In Debir Khawpi A Neh

(Jos 15.13-19)

11Cutawk ihsin Judah mi cu an feh ih a hlan ih Kiriath Sefer an rak timi Debir khua cu an do. 12Cule anmah lakih pakhat Kaleb in, “Kiriath Sefer a nehsuaktu cu ka fanu Aksah ka pe ding,” tiah a ti. 13Cutikah Kaleb ih naupa Kenaz ih fapa Othniel in Debir khawpi cu a neh ih curuangah Kaleb in a fanu Aksah cu a nupi ah a pek. 14A hnenih a thlen tikah a pasal Othniel * cun a pa hnen ihsin lo pakhat dil dingah a fial. Curuangah a pa Kaleb hnen ahcun a feh ih a laak par ihsin a ṭum tikah a pa in, “Ziang so na poi?” tiah a rak sut. 15Cutikah a fanu Aksah cun, “Thil ka lo dil a si. Negev ram ramcaar ih i umter ruangah tikhur kan ṭul ih i zaangfah hram aw,” tiah a ti. Curuangah a pa cun saklam tikhur le thlanglam tikhur a rak pek.

Judah Le Benjamin Pawl Nehmi

16Moses ih puzon Ken miphun ih tefa sin pawl cu Judah mi pawl thawn Ungkung Khawpi an ti mi Jerikho ihsin Judah ram Arad thlanglam ih a ummi ram caar lamah an feh ih cutawk ahcun Amalek mi pawl lakah an vung um. 17Cule Judah mi pawl cu Simeon mi pawl thawn an feh ih Zefath khua ih um Kanaan mi pawl an neh ih an that thluh. Cuih khua cu an camsiat ih an siatsuah; cule Hormah * tiah hmin an sak. 18Cun Gaza khua, Ashkelon khua, le Ekron khua pawl cu an ukmi ram ciar thawn an lak ṭheh. 19Judah mi pawl cu Bawipa in a bawm ruangah tlangpar ram khal an lak thluh. Asinain tipikap hmunrawn ih a ummi pawl cu thir rangleng tla an neih ruangah an neh thei lo. 20Moses ih thu a rak pekmi vekin Hebron cu Kaleb hnenah pek a si. Cule Kaleb in Anak ih fapa pathum pawl cu Hebron ihsin a dawi. 21Asinain Benjamin hrin pawl cun Jerusalem ih a ummi Jebus mi pawl cu an dawi suak lo. Curuangah Jebus mi pawl le Benjamin hrin pawl cu Jerusalem ah tuih san tiangin an um tlang a si.

Josef Hrin Pawl In Bethel An Neh

22-23Josef hrin Efraim le Manasseh phun pawl in Luz ti ih an rak kawh mi Bethel khawpi an va do. An hnenah Bawipa cu a um. Bethel khawpi ahcun mi thlingthlatu pawl an thlah ih, 24khawsung ihsin mi pakhat a ra suakmi an hmu ih a hnenah, “Hi khawpi sungih luh theinak in sim hnik aw; zianghman kan lo ti lo ding,” tiah an ti. 25Cutiin a sim hai ih cupa le a innsang zate siar lo Josef hrin pawl cun Bethel khawsung mi hmuahhmuah cu an that ṭheh. 26Cupa cu Hit mi pawl ih ramah a feh ih khawpi pakhat a sak ih Luz tiah hmin a sak. Tuih san tiangin a cuih khua hmin cu Luz a si lai.

Dawi Suak Lomi Pawl

27Manasseh hrin pawl cun Beth Shan khua, Taanak khua, Dor khua, Ibleam khua, Megiddo khua pawl le an kiangkap khuate pawl sung um Kanaan mi pawl cu an dawi suak lo. Atu tiangin acuih khua ah cun an um lai. 28Israel mi pawl an hung cah deuhdeuh tikah Kanaan mi pawl cu hranhram in hna an ṭuanter; a sinan a dawi cu an dawi suak thluh lo.

29Efraim hrin pawl in Gezer khawpi ih a ummi Kanaan mi pawl cu an dawisuak thluh lo ruangah tuihsun tiangin cutawk ah an um lai a si.

30Zebulun hrin pawl in Kitron le Nahalol khawpi ih um Kanaan mi pawl cu an dawi suak thluh lo hrangah cutawk ahcun tuihsun tiangin an um lai. Zebulun hrin pawl in hranhram in anmah riantu ah an canter.

31Asher hrin pawl in Akko khua, Sidon khua, Ahlab khua, Akzib khua, Helbah khua, Afek khua, le Rehob khawpi pawl ih a um a ummi Kanaan mi pawl cu an dawi suak thluh lo. 32Cutiih an dawisuak thluh lo ruangah cutawk ahcun Asher mi le Kanaan mi pawl cu an um tlang a si.

33Naftali hrin pawl in Beth Shemesh le Beth Anah khawpi ih a ummi Kanaan mi pawl an dawi suak thluh lo ruangah hmun khat ah an um tlang. Asinain Kanaan mi pawl cu Naftali hrin pawl in hranhram in anmah riantu ah an canter.

34Amor mi pawl in Dan hrin pawl cu tlangpar ram ah an dawi ih hmunrawn ram ih ṭum an kham. 35Cule Amor mi pawl cu Heres Tlang, Aijalon le Shaalbim ah an um thotho; a sinain Josef hrin Efraim le Manasseh tesinfa pawl in an uk hai ih hranhram in an hna an ṭuanter.

36Amor mi pawl ih ramri cu Akrabbim Tlangkawn ihsin Sela in saklampi tiang a hung thleng.

⇑

[Remove Footnotes]