PUITHIAM HNAṬUANNAK

(Leviticus)

Thuhmaihruai

Puithiam Hnaṭuannak (Leviticus) cabu sungah hlanlai Israel pawl, Pathian an biak tikih an thlun ding daan le biaknak puai tuah tikih thlun ding daan tla, a cuih zirh awknak bangtuk ih ṭuansuaktu dingah puithiam pawlih thlun ding daan tla a um.

Hi cabu ih tumtah bikmi thu cu Pathian ih thianhlimnak le a miphun pawl thawn, “Israel pawlih Pathian thianghlim,” tiih an pehtlaih awknak a nun thei ringringnak ding le a miphun pawlih amah an biak daan ding lamzin tla a si.

Hi cabu sungah mi ih theih tam bikmi thu cu a tumpi 19:18 sungih ta Jesuh ih a pahnihnak thukham tumbik, “Nangmah le nangmah na duhdawt bangin na innhnen na duhdaw pei,” timi thu hi a si.

Thutlangpi
Thil pek le raithawinak thu ih daan (1:1-7:38)
Aaron le a fapa pawl puithiam nemhngehnak (8:1-10:20)
Biaknak puai thu ih a thiang le thiang lo (11:1-15:33)
Rem awknak Ni (16:1-34)
Nunnak le biaknak ih thianhlimnak ding daan (3 17:1-27:34)

Puithiam Hnaṭuannak 1

A Pum Ih Mei-ur Thawinak

1 Bawipa in Moses cu Bawipa umnak Puanthlam ihsin a ko ih, 2Israel mi pawl in Pathian hnenih thawinak an pek tikih thlun dingah a hnuailam daan pawl cu a pek.

Zokhal Bawipa ih hnenih thawinak a pek a sile a cawrual sung ihsin, a si lole a tuu le a merual sung ihsin a si pei. 3A cawrual sung ihsin mei-ur thawinak a pek ahcun raitluanmi cawcang a si pei. Bawipa ih cohlanmi a sinak dingah a cawcang cu Bawipa umnak Puanthlam sangka ah a rak keng ding. 4Cule a cawcang ih lu parah a kut a suang pei; cumi cu Bawipa in sualngaithiamnak raithawi-ah a cohlan sak ding. 5Cutawkah a cawcang cu a that pei ih Aaron fapa puithiam pawl in cawcang ih thisen cu Bawipa hnenih an pek hnuah Puanthlam sangka ih a ummi biakṭheng ih kap li-ah cun an theh pei. 6Cun a cawcang cu a vun a hawk pei ih a sa a can thluh pei. 7Aaron fapa puithiam pawl in biakṭheng parah cun zanthing an ret pei ih meisa an muah pei. 8Cule can ciami sa cu a lu le a thau pawl thawn meisa parah an ret pei. 9Amah in a sungril pawl le a dunglam ke pawl cu a kholh pei ih puithiam in sa cu biakṭheng parah a zatein a ur thluh pei. Himi cu Bawipa ih hrangah a rim a thawmi mei-ur thawinak a si.

10Zokhal a tuurual sungin, a si lole a merual sungin thawinak a pek a sile, raitluanmi tuucang, a si lole mecang a si pei. 11Biakṭheng ihsin saklam kapah a ṭilva cu a that pei ih a thisen cu biakṭheng ih kap li-ah puithiam pawl in an theh pei. 12Cule a sa cu a can ṭheh hnuah puithiam in a zatein a lu le a thau thawn meisa parah a ret pei. 13Amah in a sungril le a dunglam ke pawl a kholh pei ih puithiam in thawinak sa cu Bawipa ih hnenah a pek pei ih biakṭheng parah cun a zatein a ur pei. Himi cu Bawipa ih hrangah a rim a thawmi mei-ur thawinak a si.

14Mi pakhat in vate cu mei-ur thawinakih a pek a sile thuro a si lole laileng note a si pei. 15Puithiam in vate cu biakṭheng ah a keng pei ih a hngawng a merhtan pei ih a lu cu biakṭheng parah a ur pei. A thisen cu biakṭheng ih kap ah kang ko in a thler pei. 16A cur le a cur sung ummi pawl a lak pei ih vutcam an retnak, biakṭheng ihsin nisuahnak lamah a hlon pei. 17A thla thla hnih in a kai pei ih a thla pawl cat lo tein a ruangpi cu a bauh pei ih biakṭheng parah a ur pei. Cumi cu Bawipa lungawi tertu rimthaw thawinak a si.

⇑

[Remove Footnotes]