MALAKHI

Thuhmaihruai

Malakhi cabu hi 500 BC hrawng Jerusalem Biakinn sak sal hnu ziangtik lai maw caan ih nganmi a si. Profet ih tumtah mi cu -puithiam pawl le miseenpi pawl kha Pathian thawn an thukamnak rinsan tlak in tharter salnak ding thu kha a si. Pathian ih miphun pawlih nunnak le biaknak ah daithlannak le hlohralnak a um ti cu a fiang. Puithiam le mipi pawl in Pathian kha an pek ding, an neih mi peknak pawl pe loin le a zirhnak bangtuk ih nung loin an bum. Asinain Bawipa in a miphun pawl thuṭhen ding le thianter dingah a ra ding ih a hlankhan in a lamzin sial ciatu ding le a thukam phuang dingah milai a thlah ding.

Thutlangpi
Israel ih sualnak (1:1-2:16)
Pathian ih thuṭhennak le a zaangfahnak (2:17-4:6)

Malakhi 1

1Israel mi pawl sim dingah Bawipa in a thuailam thu cu Malakhi hnenah a thlenter.

Bawipa In Israel A Duhdawt

2 Bawipa in a minung pawl hnenah, “Nannih cu ka lo duhdawt ringring a si,” a ti.

Asinain annih in, “In duhdawtnak cu ziangvek in so na langter?” tiah an ti.

Cutikah Bawipa in, “Esau le Jakob cu unau an si, a sinain Jakob le a tesinfa pawl ka duhdawt ih, 3Esau le a tesinfa pawl cu ka hua. Esau ih tlangpar ram ka siatsuah ṭheh ih a leilung cu hramlak cinghnia hrangah ka taan a si,” a ti.

4Esau tesinfa Edom mi pawl in, “Kan khawpi pawl cu siatsuah ṭheh an si zo nain kan din sal pei,” an ti ahcun Ziangkimtithei Bawipa in, “An duh ahcun din sal ko haiseh; ka bal ṭheh sal thotho ding. Mi in ‘Ram sualral,’ ti in le ‘Bawipa ih thinhengnak kumkhua in a tongtu miphun,’ tiah an ko ding,” tiah a ti. 5Cumi cu anmah Israel mi an mit rori in an hmu ding ih, “Bawipa cu Israel ram sung lawngah si loin a leng khalah a nasa a si,” an ti ding.

Bawipa In Puithiam Pawl a Kawk

6Ziangkimtithei Bawipa in puithiam pawl hnenah, “Fapa in a pa cu a upat, siahhlawh in a bawipa cu a upat. Keimah hi nan pa ka si, ziangah so in upat lo? Keimah hi nan bawipa ka si, ziangah so in ṭihzah lo? In hmuhsuam ih nannih in, ‘Ziangtin so kan lo hmuhsuam?’ tiah in sut hrih lai. 7Ka biakṭheng parah rawl thiang lo nan retnak in in hmuhsuam a si. Cule nannih in ‘Ziangvek in so kan lo upat lo?’ tiah in sut. Ka lo sim: ka biakṭheng nan nautat ih zianghman ih nan siar lonak in in upat lonak a lang a si. 8A mit a cawmi, a si lole a nami, a si lole a ke a awlmi ṭilva pawl thawinak ah ka hnenih nan pek tikah a ṭha ṭheh ko, zianghman a poi lo, tiah nan ruat maw si? Cuvek ṭilva kha ramuktu hnenah pek hnik uh! Nan parah a lung a awi ding maw? Nan parah mithmai ṭha a nei ding tiah nan zum maw?” a ti.

9Puithiam pawl, kan parah ṭhatnak tuah aw, tiah Pathian cu dil hnik uh. Nan thlacamnak a ngai hrimhrim lo ding ih cumi cu nanmah ih mawh ruangah a si ding. 10Ziangkimtithei Bawipa in, “Biakinn sungah lut tahrat in ka biakṭheng parah zianghman ṭhahnem lo meisa nan van lonak dingah nanmah lakah pakhat khat in biakinn sangka cu khar uhla ka duh a si. Nan parah lungawinak ka nei lo; ka hnenih nan rak kenmi thawinak pawl cu ka saang lo ding. 11Leilung tlun um miphun hmuahhmuah, nisuahnak ihsin nitlaknak tiang, keimah cu in upat. Khawzakip ah ka hmin upatnak ah rimhmui an ur ih cotlakmi thawinak pawl in pek. An zatein in upat a si! 12Sikhalsehla nannih pawl cun in upat lo; kan biakṭheng cu a borhhlawh mi biakṭheng nan ti ih nan nautatmi rawl a parah ret tahrat in ka hmin in thangsiat a si. 13‘Hi vek cu kan ning tuk zo,’ nan ti ih nan hnar in phiit. Ka hnenih pek dingah rukmi ṭilva nan rak keng, a si lole a ke-awlmi le a naa mi nan rak keng. Cu pawl cu ka lo saang ding tiah nan ruat maw si? 14Pek dingah in kam ciami ṭilva ṭhazet kha a tuurual lakah a um ko nain ka hnenah santlai lo ṭilva thawinak ih i petu cu a parah siatserhnak umseh! Ziangahtile keimah cu a maksakmi siangpahrang ka si ih miphun hmuahhmuah in in ṭihzah a si,” tiah Ziangkimtithei Bawipa in a ti.

⇑

[Remove Footnotes]