NEHEMIAH

Thuhmaihruai

Nehemiah cabu hi ṭhen li ih ṭhen a theih.

(1) Persia siangpahrang ih thlahmi Nehemiah ra kirnak thu.

(2) Jerusalem khua phardawl an dawl salnak thu.

(3) Ezra in an Daan a siar ih an minung pawl in an sual an phuannak thu.

(4) Judah Mangki bawi Nehemiah ih cangvaihnak a dangdang.

Hi cabu sungih hminsin tlak thupi pakhat cu - Nehemiah hin nasa zetin Pathian a rinsan ih a hnenah thla a cam ringring timi hi a si. (Neh 1.4; 5.19; 6.9,14; 13.14,22,29-31).

Thutlangpi
Nehemiah Jerusalem ah a kirsal (1:1-2:20)
Jerusalem khua kulhnak phar an dawl sal (3:1-7:73)
Daan thu an siar ih thukam an tharter saal (8:1-10:39)
Nehemiah ih cangvaihnak a dangdang pawl (11:1-13:31)

Nehemiah 1

1Hakaliah ih fapa Nehemiah ih ṭuansuahmi thuanthu cu hiti in a si.

Artakzaksis * siangpahrang a ṭuan kum kulnak, Kislev * thla ah keimah Nehemiah cu Susa * khawpi ah ka um. 2Culai ah ka unau pakhat Hanani cu a rualpi dang pawl thawn Judah ram ihsin an ra thleng; cule Babilon ram saltaannak ihsin Jerusalem ih a kirmi Judah mi pawl thuhla ka sut. 3Cutiih ka suh tikah, saltaannak in a suak ih an khua le an ram a thlengmi pawl cu harsatnak tampi an tong ih an kiangkap ih ummi miphun dang pawl in an hmuhsuam hai a si tiah in sim. Cuih tlunah Jerusalem kulhnak phar pawl cu an cim thluh ih, an ur thluh hnu in kotka pawl tla cu an tuah sal hrih lo a si, ti tla in sim. 4Cuih thu ka theih tikah ka to ih ka ṭap.

Ni tampi sung riahsia in ka um ih zianghman ei loin rawl ka ul. Pathian hnenah thla ka cam ih, 5“Maw Bawipa, Van ih Pathian, nang cu na maksak ih kan lo ṭihzah ngaingai. Nang cu rintlak na si ih a lo duhdawtu le na thupekmi a thluntu pawl parah cun na thukam cu na kimter ringring. 6Maw ka Bawipa, na mit in i run zoh awla Israel mi na siahhlawh pawl hrangah sunzan ih thla ka camnak hi na hna in i run theihsak hram aw. Na parah Israel mi pawl cu kan sual ngaingai zo ih cuih kan sualnak cu ka phuang a si. Ka pupa pawl an rak sual ih keimah tla ka sual a si. 7Ṭha lozet le mawi lozetin na hmaiah kan nung a si. Na thupekmi kan tuah lo; na siahhlawh Moses hnen ihsin in pek mi daan pawl cu kan thlun lo. 8Asinain Moses hnenah, ‘Nannih Israel mi pawl zumtlak lo nan si ahcun ram dang le miphun dang lakah ka lo ṭhekdarh thluh ding. 9Sikhalsehla ka hnenah nan kirsal ih ka thupekmi nan thlun a si ahcun, vanrang deng tiang ṭhekdarh thluhmi sikhal uhla, keimah in biaknak dingah ka hriil zomi hmun ahcun ka lo kirter sal ding a si,’ tiih na rak timi kha cingkeng hram aw.

Jerusalem Hrangah Thla A Cam

10“Maw Bawipa, hi milai pawl hi na siahhlawh an si, nangmah ih minung an si. Na baan thacak le na huham in na runsuak mi an si. 11Kei ka thlacamnak le na hmin upat a lo duhtu na siahhlawh dang pawl ih thlacamnak hi run ngai hram aw. Tuihsun ahhin i hlawhtlingter hram awla Siangpahrang Bawipa cu ka parah zaangfahnak neiter hram aw,” ka ti.

Culai ahcun keimah cu siangpahrang bawipa ih Sabitti petu ka si.

⇑

[Remove Footnotes]