MIPUM SIARNAK

(Numbers)

Thuhmaihruai

Mipum Siarnak cabu hin Israel pawl Sinai tlang an liam hnu nisuahnak ramri Pathian ih ramtiam an thlen tiang kum sawmli hrawng an vahvaihnak thuanthu kha a sim. A cabu hmin hi Sinai tlang ihsin an pawhsuak hlan Moses ih mipum siarnak le cumi hnu sankhat hnuah Jordan nisuahnak Moab ramih mipum siarnak thuhla laak ih sakmi hmin a si. Hi mipum siarnak voihnih karlakah hin Israel pawl cu Kanaan ram thlanglam ih um Kadesh Barnea ah an thleng. Cutawk zawn ihsin ramtiam ramih luh an tum nain an hlawhtling lo. Cutawk sehveel ahcun kum tampi an um hnuah Jordan Tiva ralkhat tlangtluan ah an feh. Cutawk ihsin a hrekkhat cu tiva tan in Kanaan ram lut dingah an timtuah, a sinain a hrekkhat cu a cutawk hmun ahcun khua an to cih.

Mipum Siarnak cabu hi harsatnak ton tikah ṭih le phangin an bei a dong ṭheu ih tlunah anmah hruaitu dingah Pathian ih hrilmi Moses le Pathian amah hrimhrim rak dodal ṭheutu miphun pawlih thuhla ngannak a si. Himi hi a miphun pawl thazaang der in a thu rak ngai ṭheu lo hmanhaisehla rinsan tlak le thinsaute in a minung a rak tuamhlawmtu Pathian ih thuanthu le a caancaanah thintawi ṭheu hmansehla thinlung hngetkhoh zetin Pathian le a miphun hnenah pum a pe-awtu Moses ih thuanthu a si.

Thutlangpi
Israel pawl Sinai tlang ihsin fehsuak an tum (1:1-9:23)
   (a) A hmaisa mipum siarnak (1:1-4:49)
   (b) Cin le daan a phunphun (5:1-8:26)
   (c) A voihnihnak Lantak Puai (9:1-23)
Sinai tlang ihsin Moab ramah (10:1-21:35)
Moab ramih an um daan (22:1-32:42)
Ezipt ihsin Moab tiang an fehnak thutlangpi (33:1-49)
Jordan an tan hlanih zirh awknak (33:50-36:13)

Mipum Siarnak 1

Hmaisa Bik Mipum Siarnak

1Israel mi pawl Ezipt ram ihsin an suah hnu kum hnihnak a thla hnihnak ih * ni hmaisa bik ni ah, Sinai Nelrawn ih ummi Pathian umnak Puanthlam sungah Bawipa in Moses hnenah thu a sim. A thusimmi cu hiti in a si: 2“Nangmah le Aaron in Israel mi pawl cu an hrin ciar le an innsang ciarin mipum nan siar pei. Kum kul le a tlun lam mipa, 3ralkap a ṭuan thei ding mi hmuahhmuah cu an hmin cazin lak uh. 4A lo bawmtu dingah hrin khat ihsin an lal ciar sawm uh. 5Cuih an lal ciar cu a tanglam bangtuk in an si:

Reuben hrin ihsin Shedeur fapa Elizur,

6Simeon hrin ihsin Zurishaddai fapa Shelumiel,

7Judah hrin ihsin Amminadab fapa Nahshon,

8Issakhar hrin ihsin Zuar fapa Nethanel,

9Zebulun hrin ihsin Helon fapa Eliab,

10Josef fapa pawl: Efraim hrin ihsin Ammihud fapa Elishama,

Manasseh hrin ihsin Pedahzur fapa Gamaliel,

11Benjamin hrin ihsin Gideoni fapa Abidan,

12Dan hrin ihsin Ammishaddai fapa Ahiezer,

13Asher hrin ihsin Okhran fapa Pagiel,

14Gad hrin ihsin Deuel fapa Eliasaf,

15Naftali hrin ihsin Enan fapa Ahira. 16A tlunih lal pawl cu an hrin ciarah hotu an si ih mipum siar hnaṭuantu dingah hrilmi an si,” tiah a ti.

17Hi lal hleihnih pawl cu Moses le Aaron in an sawm ih, 18thlahnihnak ni hmaisa bik ni ah Israel mi pawl cu an zatein an kokhawm a si. Israel mi zatein an hrin ciar le an innsang ciar in mipum cazin an lak ih Bawipa ih thupekmi bangtuk in, 19kum kul le a tlunlam mipa hmuahhmuah cu an siar ih an hmin an khum ṭheh.

Sinai Nelrawn ahcun Moses in Israel mi pawl mipum cazin cu a lak a si. 20Ralkap a ṭuan thei ding mipa kum kul le a tlunlam pawl cu an hmin rori in, Jakob fapa upa bik Reuben hrinih thok in an hrin le an innsang fekfek ciar in, cazin ah an khum. Mipum cazin an lakmi zat cu a tanglam bangtuk a si:

21Reuben hrin ihsin thawng sawmli thawng ruk le zanga, 22-23Simeon hrin ihsin thawng sawmnga thawng kua le zathum, 24-25Gad hrin ihsin thawng sawmli thawngnga, zaruk le sawmnga, 26-27Judah hrin ihsin thawng sawmsarih thawngli le zaruk, 28-29Issakhar hrin ihsin thawng sawmnga thawngli le zali, 30-31Zebulun hrin ihsin thawng sawmnga thawng sarih le zali, 32-33Efraim hrin ihsin thawng sawmli le zanga, 34-35Manasseh hrin ihsin thawng sawmthum thawnghnih le zahnih, 36-37Benjamin hrin ihsin thawng sawmthum thawngnga le zali, 38-39Dan hrin ihsin thawng sawmruk thawnghnih le zasarih, 40-41Asher hrin ihsin thawng sawmli thawngkhat le zanga, 42-43Naftali hrin ihsin thawng sawmnga thawngthum le zali. 44-46An zate ih kom tikah thawng zaruk thawngthum zanga le sawmnga an si.

47Sikhalsehla Levi hrin pawl cu mipum siarnak ah telhcih an si lo, 48ziangah tile Bawipa in Moses hnenah, 49“Israel mi pawl ralkap ṭuan thei ding mipum nan siar tikah Levi mi pawl cu telhcih hlah uh,” tiih a rak ti ruangah a si. 50Cuih tlunah Bawipa in Moses hnenah, “Levi mi pawl cu ka Puanthlam le a sungih hmanmi thilri pawl kilkhawitu-ah re hai aw. Puanthlam le a thilri pawl cu anmah in an phur pei ih ṭhatein an zoh pei; an riahbuk khal Puanthlam ih kimvel ah an sak pei. 51Nan riahnak nan ṭhawn tikah Levi mi pawl in Puanthlam cu an ṭhet pei ih riahnak hmun a tharih nan khuar tikah cutawkah anmah thotho in an sak sal pei. Midang zokhal Puanthlam kiangkapih an rat a sile thah an si pei. 52Israel mi pawl cun a bur a bur in an riahbuk cu an sak pei ih zozo khal anmah ih hrin ciarin anmah ih thantaar thuai ciarah an sak pei. 53Asinain Puanthlam kiangkapah zohman an rat lonak dingah le ka thinhengnak cu Israel mi pawl parih a thlen lonak dingah Levi mi pawl cun Puanthlam kimvel ah an riahbuk an sak pei ih an kilveng pei,” tiah a ti. 54 Bawipa in Moses hnenih thu a pek bangtuk in Israel mi pawl cun an tuah thluh.

⇑

[Remove Footnotes]