RUTH

Thuhmaihruai

Ruth thuanthu hi Thuṭhentu pawl san sungih rak ummi thu a si. Ruth cu Moab mi a si ih Israel pa thawn an nei-aw. A pasal a thih tikah Israel mi a ni le Israel Pathian parah rinsantlak zetin a um thotho. A netnak ah a pasal ih sungkhat pawl thawn an nei-aw ih cutiih an neih awknak ruangah Israel pawlih siangpahrang tum bik David suahkehnak ah a cang.

Thuṭhentu pawl cabu sungah Pathian ih minung pawl in amah an dungtun tikah an parah siatnak a thleng ṭheu a si ti kan hmu. Ruth cabu sungah cun miphun dang pakhat in Israel Pathian a biak tikah thlawsuah a ngah ve thotho ih rinsantlak miphun ah a cang ti thu a langter.

Thutlangpi
Naomi le Ruth cu Bethlehem ah an kir (1:1-22)
Ruth le Boaz an tong-aw (2:1-3:18)
Boaz le Ruth an nei-aw (4:1-22)

Ruth 1

Elimelek Le A Innsang Cu Moab Ram An Thleng

1Thuṭhentu pawl in Israel ram an rak uk laiah an ram sungah paam a rak tlung. Curuangah Judah ram Bethlehem khuaih a ummi mipa pakhat cu Moab ram ih um dingah a nupi le a fapa pahnih thawn an vung feh. 2Cupa ih hmin cu Elimelek a si; a nupi cu Naomi a si ih an fapa pahnih hmin cu Mahlon le Chilion an si. Anmah cu Efrath hrin an si. Moab ramah cun an vung thleng ih an vung um. Moab ram ih an um lai ah, 3Elimelek cu a thi ih Naomi cu a fapa pahnih thawn an hmei. 4A fapa pahnih cun Moab fala an ṭhit. Pakhat ih hmin cu Orpah a si ih a dang pakhat ih hmin cu Ruth a si. Cule cutawk ramsungih kum hra tluk an um hnuah, 5Mahlon le Chilion an thi lala ih Naomi cu pasal lo le fapa loin amah pakhat lawnglawng a rung taang.

Bethlehem Ah Naomi A Kir Ih Ruth In A Thlun

6 Bawipa in amah ih minung pawl thlawsuahnak a pek ih rawl an paṭhazet a si ti kha Moab ramih a um laiah Naomi in a thei.Curuangah a fapa le ih nupi pawl thawn Moab ram taanta dingah an tim an tuah. 7Cule Judah ramih kir dingah cun hmun khatah an pok. 8Asinain lamzinah Naomi cun, “Nan inn ah kir uhla nan nu-ih hnen veve ah vung um uh. Keimah le in thihsan zotu pawl parih nan ṭhat bangin Bawipa cu nan parah ṭha ve hramseh. 9Cule pasal nei sal in hnangamte ih nunkhuasak sal thei dingah Pathian in thlawsuah lo pe hramseh,” tiah an hnenah a ti.

Curuangah Naomi cun damte in va kir uh, tiah a hnam hai. Asinain a fapa ih nupi pahnih cu napi in an ṭap ih, 10“In taanta hram hlah aw; na miphun hnenah kan lo thlun ko pei,” tiah an ti.

11Cutikah Naomi in, “Asilo, fanu le uh; nan kir tengteng a ṭul a si. Ziangah so ka hnenih feh cu nan duh? Nan pasal dingah fapa pawl ka nei nawn ding maw si? * 12Inn ah vung tlung uh; kei pasal nei sal dingah cun ka tar tuk zo. Cun ruahsannak a um lai, tiah ti tahrat in tuih zanah pasal nei in fapa pawl ka neih khalle, 13patling an si lai hlan lo nan pasal dingah nan hngak thei ding maw si? Pasal dang neih a lo dawntu ah an cang sawn lo ding maw? Fanu le uh, a cang thei lomi a si ti nan thei ko. Bawipa in mi vanduai ah i tuah ih nan hrangah hin ka riah a sia ngaingai a si,” tiah a ti.

14Cule ring zetin an ṭap sal thotho. Cun Orpah in a ni * cu damte in tiah a hnamta ih a miphun hnenah a kir. Sikhalsehla Ruth cu kir loin a ni cu a kaih fetfet. 15Cutikah Naomi in, “Ruth, na pasal unau ih nupi cu a miphun le a khawzing * hnenah a kir zo. Nang khal amah thawn inn ah vung tlung aw,” tiah a ti.

16Asinain Ruth cun, “Nangmah lo taanta ih kir ding cu i fial nawn hlah aw. Na hnenah ka feh ve hram pei. Na fehnak kipah ka feh ve ding; na umnak kipah ka um ve ding. Na miphun cu ka miphun a si ding ih na Pathian cu ka Pathian a si ve ding. 17Na thihnak ah ka thi ding ih cutawkah phum ka si ve ding. Nang le kei hi thihnak siar lo zianghman in in ṭhen hlah seh. Thu dang ruangah ṭhen dingih ka lung a kim pang a si ahcun Bawipa ih hremnak ṭihnungza cu ka parah thleng seh,” tiah a ti.

18Cutiih feh ve a tumtah zia cu Naomi in a hmuh tikah zianghman a ṭong nawn lo.

19An pahnih in an feh ih Bethlehem khua cu an thleng. An thlen thu an theih tikah khuasungmi pawl cu lungawi in an sa hiamhiam. Cule nunau pawl in, “Naomi kha maw na si?” tiah an sut.

20Cutikah Naomi in, “Naomi, * tiah i ko nawn hlah uh. Marah, tiah i ko sawn uh; ziangah tile Ziangkimtithei Pathian in riahsiatpi tlak in i tuah zo a si. 21Hitawk ihsin ka rak feh laiah khan neinungzet le famkimzet tein ka rak feh; a sinain atu-ah Bawipa in i hruai kir tikah ka lawngte in ka thleng a si. Hitiin Ziangkimtithei Bawipa in i hnong ih i tisiat tikah hin ziangah so nannih in, Naomi, tiah in kawh duh rero?” tiah a ti.

22Cuticun Naomi cu a fapa ih nupi Moab nunau Ruth thawn Moab ram ihsin an ra kir ih barli fang an ah thok pekte-ah Bethlehem khua ah an ra thleng.

⇑

[Remove Footnotes]