ZEKHARIAH

Thuhmaihruai

Zekhariah cabu hi ṭhen hnih ah ṭhen a theih: (1) Bung 1-8 tiang: 520-518 BC karlak sung Zekhariah ih simmi thu kha a um. Himi thu pawl hi hmuhnak lawnglawng in a si ih Jerusalem remsalnak ding thu le Biakinn sak salnak ding, Pathian ih milai pawl thianternak le a thleng lai dingmi Messiah uknak thu a si. (2) Bung 9-14: Hi sungah hin a cuih hnu deuh ih simmi thu an um ih an ruahsan mi Messiah thu le neta bik thuṭhennak thu pawl an si.

Thutlangpi
Ralrin peknak le ruahsannak (1:1-8:23)
Israel kiangkap ram pawl thuṭhennak (9:1-8)
Hmailam ṭhansonak le daihnak (9:9-14:21b)

Zekhariah 1

Bawipa In A Minung Pawl A Ko

1Darias in Persia siangpahrang a ṭuannak kum hnihnak kum, thlariat thla ah, Iddo ih fasuan, Berekhiah ih fapa profet Zekhariah hnenah Bawipa ih thu cu hiti in a ra. 2Cungnungbik Bawipa in Zekhariah cu Israel mi hnenah hiti in sim dingin a fial. “Keimah, nan Bawipa cu nan pu le pa pawl parah ka thin a heng ngaingai; 3a sinain atu-ah nan hnenah hiti in ka lo sim. Ka hnenah ra kir uhla nan hnenah ka kir ve ding. 4Nan pu le nan pa bangtuk si hlah uh. Khuahlan laiah profet pawl in ka thu an sim hai ih sualnak tuah lo ding le thil ṭha lo tuah lo dingin an sim. Asinain ka thu an ngai duh lo, a thlun khal an thlun lo a si. 5Cuih profet pawl le nan pupa pawl cu an nung nawn lo. 6Ka sal profet pawl hmangin nan pupa pawl ka thu le ka thukham ka pek, a sinan zianghman ah an siar lo; curuangah harsatnak tampi an tong a si. Cule hremtlak an si ruangih hrem dingih a rak tumtu cu Cungnungbik Bawipa keimah ka si kha an run thei ih an sir-aw sal a si,” a ti.

Profet In Langnak In Rang A Hmu.

7Darias in siangpahrang a ṭuannak kum hnihnak kum, thla hleikhat thla (Shebat thla), ni kul hluanli ni ah zan ah Bawipa in langnak in thu i sim. 8Rang sen par a tomi Bawipa ih vancungmi pakhat, phairawn ih lenhmui kung lakah a cawl ih a dungah rang dang pawl an um: rang sen, rang ṭial le rang raang pawl tla an si. 9 ‘Bawipa, hi rang pawl ih tican cu ziangso a si?” tiah ka sut.

Vancungmi in, “Atican ka lo sim ding. 10Leilung pumpi thleng thluh ding le zoh dingah Bawipa in a thlah a si,” tiah a ti.

11Rang pawl cun, vancung mi hnenah, “Leilung tlun khuazakip ah kan thleng ṭheh zo ih leilung pumpi cu daitein le hnangamte in a um a si, ti kan hmu zo,” tiah an sim.

12Cutikah vancungmi cun, “Cungnungbik Bawipa, Jerusalem le Judah khawpi dang pawl parah kum sawmsarih sung na thin a heng zo. An parih zaangfah thinpemnak na neih sal hlan, ziangtik tiangso hiti in an um hrih ding,” tiah an sut.

13 Bawipa in vancungmi cu thinhnemnak ṭongkam in a sawn ih, 14cuih Cungnungbik Bawipa ih ṭongkam cu tlang-aupi ding ah vancungmi in i fial. “Ka khawpi thianghlim Jerusalem hrangah duhdawtnak le seherhnak tamzet ka nei. 15Asinain thlangamnak le daihnak a ngahtu miphun pawl parah ka thin ka sup rero nain cuih miphun pawl in ka minung pawl tuarnak cu an luarter deuhdeuh. 16Curuangah Jerusalem khawpi parih ka zaangfahnak langter dingah ka ra kir a si. Ka Biakinn cu saksaal a si ding ih Jerusalem khawpi cu dinsal a si ding,” tiah a ti.

17Vancungmi in ka hnenah, “Cungnungbik Bawipa in ‘Ka khua pawl cu an ṭhangsozet sal ding ih Jerusalem khuapi cu ka bawm ding ih ka ta tiah ka ti sal ding,’ a ti. Cumi cu tlang-aupi hrih aw,” tiah i ti.

Profet In Ki Pawl A Hmuhnak

18Langnak pakhat a um sal ih cawcang ki pali ka hmu. 19Ka hnenih a ṭong rerotu vancungmi hnenah cun, “Hi ki pawl ih tican cu ziangso a si?” tiah ka sut.

Anih in, “Judah mi, Israel mi le Jerusalem mi pawl khuazakip ih a ṭhekdarhtu miphun pawl can-ai an si,” a ti.

20Cule Bawipa in sobul thawn hnaṭuantu pali i hmuh. 21“Himi pawl hi ziang tuah dingah so an rat?” tiah ka sut.

Anih in, “Himi pawl cu Judah ram a ṭiotertu le a minung pawl a ṭhekdarh ṭhehtu miphun pawl ṭhihṭhaih ding le hlonhlo ṭheh dingah an ra a si,” tiah i sawn.

⇑

[Remove Footnotes]