ZEFANIAH

Thuhmaihruai

Profet Zefaniah ih thusim caan cu 650 BC hrawngah a si ih 621 BC kum siangpahrang Josiah in biaknak remsalnak a tuah hlan deuhte kum hra hrawngah sisehla a bang. Hi cabu sungah hin profet dang pawlih sim ciami khal a tel ve. Cumi cu Judah pawl in khawzing dangdang an biak ruangah Pathian in a hrem ding; cun Bawipa in miphun dang pawl khal a hrem ding, cule Jerusalem cu a siat ding nain remsal leh a si ding ih a sungah mi nunnem le mifel pawl an um ding, tiah a um.

Thutlangpi
Pathian ih thuṭhennak ni (1:1-2:3)
Israel kiangkap pawl harsat an tonnak ding (2:4-15)
Jerusalem harsatnak le tlennak a ngahnak ding thu (3:1-20)

Zefaniah 1

1Amon ih fapa Josiah in Judah siangpahrang a ṭuan laiah Bawipa ih thu cu Zefaniah hnenah a ra thleng. Zefaniah cu siangpahrang Hezekiah tesinfa a si ih a pupa pawl cu Amariah, Gedaliah le Kushi an si.

Bawipa Ih Thuṭhennak Ni

2 Bawipa in, “Leilung tlun ziang hmuahhmuah hi ka siatsuah ṭheh ding, 3minung siseh, ramsa siseh, vate le nga tiangin ka tisiat ṭheh ding. Mi ṭha lo pawl ka dirhthlak hai ding. Minung cu ka cimit ding ih pakhat hman an luat lo ding. Bawipa keimah in ka ṭong zo.

4“Judah mi le Jerusalem mi pawl ka hrem ding. Baal khuavang an biaknak a taangsun mi khal ka siatralter ding ih Baal khuavang a riantu khawvel puithiam pawl cu zohman in an thei nawn lo ding. 5Inn parah kai tahrat in ni le thlapi le arsi a biatu pawl cu ka siatsuah ṭheh ding. Keimah i biatu le ka hmin rinsan in siatsertu a sinan Milkom khuavang hmin in siat a sertu lala cu ka siatsuah ding a si. 6Keimah i tlansan ih i thlun nawn lotu le ka hnenah ra loin keimah thu i ra ron lotu pawl cu ka tisiat ṭheh ding,” tiah a ti.

7 Bawipa ih thuṭhennak ni cu a nai a si. Curuangah a hmaiah daite’n um uh. Bawipa in a miphun pawl cu thawinak ih pek dingah a tum ih Judah ram siatsuah dingah ral pawl a sawm a si. 8 Bawipa in, “Thawinak pek ni ahcun siangpahrang fapa pawl le bawi pawl le miphun dangih nunphung daan a thluntu pawl cu ka hrem hai ding. 9Lawki mi vekin khuavang a biatu le an bawipa ih inn sungih thilri khatte ih a umnak dingah mi a thattu le ruk a rutu pawl cu ka hrem hai ding.

10“Cuih ni ahcun Jerusalem ih Nga Kotka ah ṭah thawng nan thei ding. Tuah tharmi khawpi veng ah aihramnak nan thei ding ih tlangpar ah ri durdo ih a tlumi thawng nan thei ding. 11Cumi nan theih tikah nannih khal ṭap uhla ai rero uh; nannih khawpi thuailam ih a umtu pawl cu; ziangahtile sumtuahtu pawl cu an thi ṭheh ding a si.

12“Cuih caan ah mei-inn keng tahrat in Jerusalem cu ka hawl ding. Mah le mah zum-awzet le hnangamzet ih a umtu pawl, ‘Bawipa cun zianghman a tuah dah lo; a ṭha khal a tuah lo, a sia khal a tuah lo,’ a titu pawl cu ka hrem hai ding. 13An lennak cu lon ṭheh a si ding ih an inn pawl cu siat ṭheh a si ding. An sak rero mi an inn pawl cu an hngak dah lo ding ih an phun rero mi Sabit hri ih Sabitti cu an in dah lo ding,” a ti.

14 Bawipa ih ni cu a nai zo: a naizet zo ih reilote ah a ra cing ding. Cuih ni cu siatnak ni a si ding, ziangahtile ralkap ral ṭha bik hman beidong in an ṭap ding. 15Cuih ni cu thin ai-thok ni a si ding, harsatnak le vansaanglam ih um ni, siatsuah ni le hloral ni, thimnak ni le thinpih ni, ni dum le khawdur ni a si ding. 16Raldonak thawmvang le tawtawrawt thawngin a khatmi ni, ralkap pawl in ralhruang in kulhmi khawpi le ralvennak innsang pawl an do ding ih an do phah ih an au-nak in a khatmi ni a si ding.

17 Bawipa in, “Minung parih siatralnak ka thlenter mi cu a nasa tuk ding ih mi hmuahhmuah mitcaw bangin an vak ding. Ka parih an sual tuk zo ruangah an thisen tidai bangin thlet a si ding ih an ruak cu leilung ah an thu an ṭawtralta ding a si,” tiah a ti.

18Cuih ni, Bawipa in a thinhengnak a langter ni ahcun an sui le an ngun in zohman a run thei hai lo ding. A thinhengnak meisa in leilung pumpi hi a kang ding a si. Leilung tlun ih a ummi hmuahhmuah hi rinlopi in an nunnak a cemter ding a si.

⇑

[Remove Footnotes]