KORIN

KHUA KHRIHFABU SIN PAUL

CAKUAT PAKHATNAK

1 Corinthians

Biahmaiṭhi

Korin khuami hna sinah Paul nih ca a kuatmi pakhatnak hi Korin khua chung i Paul nih a sermi khrihfabu chung i hnahnawhnak le harnak a chuakmi ruangah a si. Cu lioah cun Korin khua cu Grik mi khualipi a si i Rom cozah kut tang i a ummi Akhaiaram khuapi a si. Korin khua cu chawlehnak le chawhrawlnak leiah minthang a si i fimnak lei zongah minthang a si; sualnak lei le biaknak phung dangdang lei zongah a min a thang ngai fawn.

Paul nih aa awlokchonh bikmi cu an bu chung i a hung chuakmi i ṭhennak tehna, an sualnak tehna, nupi ṭhitnak lei kong i an buainak tehna, raithawinak sa ei le ei lo kong i an chiaṭha thleidannak aa tuaining tehna, khrihfabu chung umtu ziaza kong tehna, Thiang Thlarau laksawng timi kong tehna le thawhṭhannak kong i ruahnak an ngeihning tehna kha a si. Hi bantuk thil vialte chungah hin Thawngṭha nih zei bia dah a chim ti kha a langhter duh bikmi a si.

Dal 13 ah kan hmuhmi, dawtnak kong hi, dawtnak hi Pathian laksawng lakah a ngan bik a si ti kha a langhter i hi cauk chung i zapi nih hngalh bikmi dal zong a si.

Tlangpi Hna
Biahmaiṭhi 1.1-9
Khrihfabu chung buainak 1.104.21
Nupa sualnak le chungkhar 5.17.40
Khrihfa le lawkih 8.111.1
Khrihfa nunning le biaknak 11.214.40
Khrih Thawhṭhannak le zumtu hna 15.1-58
Judea ram Khrihfa hna ca thawhlawm 16.1-4
Pumpak biacah le tlangkawmnak 16.5-24

1Korin 1

1Pathian duhnak in Khrih Jesuh lamkaltu si dingah kawhmi keimah Paul le kan unau Sosthenes nih, Korin khua i a ummi Pathian khrihfabu kha ca kan in kuat hna. 2Nannih cu Pathian mithiang si awkah kawh nan si i Khrih Jesuh he nan i pehtlaihnak thawngin Pathian ta nan si. Cun Jesuh Khrih cu kan Bawi zong a si i an Bawi zong a si ve bantukin kan Bawipa Jesuh Khrih min in thla a cammi paoh cu khuazeika i a ummi an si hmanh ah Pathian ta cu an si ve. *

3Pathian kan Pa le Bawipa Jesuh Khrih nih vel le daihnak in pe ko hna seh.

Khrih Thawngin Hmuhmi Thluachuahnak

4Khrih Jesuh thawngin an pekmi hna a vel ruangah hin ka Pathian cu ka lawmh zungzal. 5Zeicahtiah Khrih thawngin zeizong vialte ah nan rum cang, holh lei le hngalhnak lei zongah nan rum cang. 6Cu a langhnak cu Khrih kong kan chimmi biatak kha nan chung i fek tein a umnak ah hin a si i kan Bawipa Jesuh Khrih a langh lainak nan hngahnak ah hin 7thluachuahnak nan hmuh lomi pakhatte hmanh a um lo. 8Amah nih cun a dongh tiangin fek tein an umter hna lai i kan Bawipa Jesuh Khrih Ni ah cun ahohmanh nih sual an in phaw kho hna lai lo. 9A Fapa Jesuh Khrih kan Bawipa he hawikomhnak ngeih awkah an kotu hna Pathian cu zumhawktlak a si ko.

Khrihfabu Chung Ṭhennak

10Ka u le ka nau hna, kan Bawipa Jesuh Khrih min in kan nawl hna: nan dihlak in pakhat le pakhat lungnge tein um tuah u, i ṭhen hlah u. Lungthin khat, ruahnak khat in um u. 11Ka u le ka nau hna, Khalawi innchungkhar chungmi nih an ka chimh i an i si lengmang an in ti hna. 12Ka chim duhmi cu: a cheu nih, “Kannih cu Paul a ṭanhmi kan si,” nan timi le, a cheu nih, “Kannih cu Apollo a ṭanhmi kan si,” nan timi le a cheu nih, “Kannih cu Peter a ṭanhmi kan si,” nan timi le, a cheu nih, “Kannih cu Khrih a ṭanhmi kan si,” nan timi hi a si. * 13Khrih cu a cheuh in nan i cheu dih. Nan ca i vailamtahnak ah a thimi kha Paul dahra a si? Tipil nan in kha Paul zultu si awkah dahra a si?

14Vanṭhat ah, Krispas le Gaius dah ti lo cu ahohmanh tipilnak kan pekmi hna nan um lo. * 15Cucaah cun, Paul zultu si awkah tipilnak kan ing, tiah ahohmanh nih nan ti kho lai lo. 16(A, Stefanas le a innchungkhar kha tipilnak ka rak pek taktak hna, midang cu ka pek hna le pek hna lo ka cing ti lo). * 17Khrih nih hin, tipil va pe hna, tiah a ka thlah lo, Thawngṭha kha va chim hna, tiah a ka thlah i cucu minung fimnak bia i bochan dingin a si lo. Zeicahtiah vailamtahnak i Khrih a thih kha minung fimnak bia in chim ahcun a hmual a lolak sual hnga.

Khrih Cu Pathian Hmual le Fimnak A Si

18Vailamtahnak i Khrih a thihnak kong hi a tlau lio lengmangmi hna caah cun pakpalawng bia a si ko, sihmanhsehlaw khamh lio lengmangmi hna kannih caah cun Pathian hmual a si. 19Cathiang nih,

20Cucaah cu nih cun nan mifim hna cu khuazei ah dah a chiah hna? Nan cathiam hna zong cu tah? Vawlei fimnak in bia al a thiammi hna kha tah? Vawlei fimnak hi cu hruhnak a si ti kha Pathian nih a langhter. *

21Minung nih anmah fimnak in Pathian hngalh khawh lo ding kha Pathian nih a fimnak in a rak tuahmi a si. Kan chimmi “hruh bia” tu hin Pathian nih zumhnak a ngeimi cu khamh a duh hna. 22Judah mi nih cun, ahmaan maw hmaan lo ti hngalh khawhnak ding caah khuaruahharnak um kha an duh, cun Grik mi hna nih cun fimnak kha an kawl, 23sihmanhsehlaw kannih nih cun vailamtahnak cung i thahmi Khrih kong kha kan chim i cu kong cu Judah mi caah cun tluknak lung a si i Grik mi hna caah cun hruhnak bia a si. 24Sihmanhsehlaw Pathian nih a kawhmi hna caah cun, Judah mi an si zongah Jentail mi an si zongah, cu bia cu Khrih kha a si i Khrih cu Pathian hmual le Pathian fimnak kha a si. 25Zeicahtiah Pathian hruhnak a si rua timi cu minung fimnak nakin a fim deuh ṭhiamṭhiam i Pathian dernak a si rua timi cu minung ṭhawnnak nakin a ṭhawng deuh ṭhiamṭhiam.

26Ka u le ka naule hna, Pathian nih a rak in auh hna ah khan, zei bantuk mi nan si kha i philh hlah u. Minung hmuhning lei in ti ahcun, a fimmi le thil a ti khomi le upat hmaizah awk tlak a simi cu tlawmte lawnglawng nan rak si. 27Vawlei nih zeihmanh ah a rel lomi thil Pathian nih a thim thengnak cu, mifim mi kha an ningzak seh tinak caah a si i vawlei nih a der tiah a timi thil a thim thengnak cu miṭhawng mi le thil ti khomi hna kha an ningzak seh ti caah a si. 28Vawlei nih thil pipa i a ruahmi kha hrawh awkah vawlei nih a nautatmi le zei i a rel lomi le pakpalawng i a ruahmi hna a thim hnanak cu a si. 29Cu nih cun a fiantermi cu, Pathian hmaiah cun ahohmanh an i porhlaw kho lo, ti hi a si. 30Sihmanhsehlaw Pathian nih cun kannih cu Khrih Jesuh he a kan pehtlaihter cang i Pathian nih Khrih cu kannih fimnak caah a ser cang; amah thawng cun kannih cu Pathian he kan i rem i Pathian mithiang ah kan cang i a luatmi kan si. 31Cucaah cun Cathiang nih,

⇑

[Remove Footnotes]