JOHAN

CAKUAT PAKHATNAK

1 John

Biahmaiṭhi

Johan cakuat pakhatnak nih hin tinhmi pahnih a ngei:

1. Pathian le a Fapa Jesuh Khrih he hawikomhnak ngei in nun awk.

2. Cu hawikomhnak a hrawktu cawnpiaknak kha zulh lo ding.
Cu cawnpiaknak hmaanlo cawnpiakning cu hitihin a si: hi vawlei hi a sual tuk hringhran caah hi vawlei he aa pehtlaimi thil paohpaoh hi zeipaoh a sual dih, cucaah cun Pathian Fapa Jesuh cu minung taktak a si ahcun, hi vawlei he aa pehtlaimi a si ve lai i hi vawlei he aa pehtlaimi a si ahcun a sualmi a si ve lai caah, minung ngaingai cu a si lo, ti a si. Hi bantuk cawnpiaktu saya pawl nih cun, khamhnak hmuhnak dingah cun hi vawleicung nunnak he hin kan i ṭhen awk a herh an ti i cuhleiah khamhnak hi ziaza ṭha timi le minung hawi dawtnak he hin zeihmanh i pehtlaihnak a ngei lo, an ti fawn.

Hi cawnpiaknak hmaanlo a hmaan loning langhternak caah khan hi cakuat hi a ṭial i Jesuh Khrih cu minung hrimhrim a si ti kha fiang tein a chim i Jesuh Khrih a zum i Pathian a dawmi nih cun a minung hawi kha a dawt hrimhrim awk a si ti kha fak piin a chim fawn.

Tlangpi Hna
Biahmaiṭhi 1.1-4
Ceunak le muihnak 1.52.29
Pathian fa hna le khuachia fa hna 3.1-24
Biatak le palhnak 4.1-6
Dawtnak rian 4.7-21
Teitu zumhnak 5.1-21

1Johan 1

Nunnak Bia

1A hramthawk tein a rak um cangmi nunnak Bia kong kha ca in kan in kuat hna: cucu kan hna in kan theihmi le kan mit in kan hmuhmi kha a si; asi, kan mit in kan rak hmuh i kan kut in kan rak tawngh. * 2Cu nunnak cu hmuh khawhmi i a hung can tikah kannih nih khan kan rak hmuh; cucaah cu kong cu kannih nih kan chim i Pa he a rak um ṭimi zungzal nunnak, kannih sinah langhter a simi kong kha kan in chimh hna. * 3Kannih nih kan hmuhmi le kan theihmi cu nannih zong kha kan in chimh hna, zeicahtiah Pa le a Fapa Jesuh Khrih he hawikomhnak kan ngeihmi chungah khan nan i tel khawh ve nakhnga kan duh. 4Hi ca kan in kuat hna cu kan i lawmhnak kha a tlin nakhnga caah a si.

Pathian Cu Ceunak A Si

5Fapa sinin kan theih i nannih kan in thanhmi hna bia cu hihi a si: Pathian cu ceunak a si i a chungah muihnak zeihmanh a um lo. 6Cucaah kannih nih amah he hawikomhnak kan ngei kan ti i muihnak chung i kan um ko ṭung ahcun, kan bia in siseh, kan tuahnak in siseh, lih kan chim a si. 7Sihmanhsehlaw ceunak chung i a um bantukin kannih zong ceunak chung i kan um ahcun pakhat le pakhat hawikomhnak kan ngei i a Fapa Jesuh thi nih khan kan sualnak vialte in a kan thianh.

8Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo. 9Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai. 10Asinain kan sual lo kan ti ahcun Pathian cu lihchim ah kan ser i a bia cu kan chungah a um lo.

⇑

[Remove Footnotes]