THESALON

KHUAMI SIN PAUL CAKUAT PAKHATNAK

1 Thessalonians

Biahmaiṭhi

Thesalonika khua hi Rom cozah ukmi Masidonia peng khualipi a si. Paul nih Filipi khua khan Thesalonika khua ah hin a kal i hi khua ah hin Khrihfabu pakhat a ser. Asinain tlawmpal hnuah cun Paul a nahchuahtu Judah mi nih khan hnahnawhnak an tuah. Paul cu an dawiter hna i Berea khua ah khan a zam. Cun Paul cu Korinth khua a phak hnuah Thesalonika khua Khrihfabu umtuning kha a rianṭuan hawi Timote nih khan a ra chimh.

Paul nih Thesalonika khua Khrihfabu ca a kuatmi hna a hmasa u hi an lung ṭhawnternak ding le an zumhnak fehter awk chin ca i a ṭialmi a si. An zumhnak thawng le dawtnak an ngeihnak thawng a theih tik i a lunglawmhnak le a thanuamnak kha Pathian a hngalhter i an sinah a um lio i a umtu ziaza kha rak hngal ṭhan u tiah a ti hna. Cun Jesuh Khrih rat ṭhannak kong Khrihfabu chung bia aa tuaimi kha hitihin a leh hna. Cu bia aa tuaimi cu: Jesuh a ṭum ṭhan hlan i a thimi hna hi Jesuh ṭum ṭhannak nih a rat pimi zungzal nunnak chungah hin an i tel kho ve lai maw? Cun Khrih cu tah zeitik set ah dah a rat lai? ti tehna hi an si. Paul nih cun Jesuh Khrih rat ṭhan orhnak ah hin dai tein um u law rian kha ṭha tein ṭuan zungzal ko u, a ti hna.

Tlangpi Hna
Biahmaiṭhi 1.1
Lawmhnak le thangṭhatnak 1.23.13
Khrihfa ziaza forhnak 4.1-12
Khrih rat ṭhannak kong 4.135.11
Donghnak forhnak 5.12-22
Biatlangkawm 5.23-28

1Thesalon 1

1Paul, Silas le Timote nih,

Thesalonika khua i a ummi Khrih-fabu,
Pathian kan Pa le Bawipa Jesuh Khrih ta a simi kha, ca kan in kuat hna.

Vel le daihnak cu nan ta si ko seh. *

Thesalon Mi Hna Nunnak le Zumhnak

2Nanmah kong ah Pathian kha kan lawmh zungzal i thla kan cam fate nanmah kha kan in campiak zungzal hna. 3Nan zumhnak cu rianṭuannak ah nan langhterning le dawtnak nan ngeihmi nih fak piin rian an ṭuanter hna ning le kan Bawipa Jesuh Khrih chung i ruahchannak nan ngeihmi a fehning kha Pathian kan Pa hmaiah kan philh lo. 4U le nau hna, Pathian nih an dawt hna i amah mi si awkah an thim hna kha kan hngalh. 5Thawngṭha kha nan sin kan phakpi tikah bia lawnglawng in si loin, ṭhawnnak le Thiang Thlarau le biatak a si fiang tein kan hngalhnak he khan a si. Nan sin kan um ah khan zeitindah kan umtuzia a si cu nan hngalh; nanmah ca ṭhatnak ding caah kha ti kan um kha a si. 6Kanmah le Bawipa kha kan nawl nan kan cawn i temhinnak tampi nan huah nain Thiang Thlarau sinin a rami bia kha lawm tein nan cohlan. * 7Cucaah Masidonia le Grik ram i a ummi Khrihfa hna caah nannih cu zohchun awk nan rak si. 8Zeicahtiah nanmah sinin a chuakmi thawngpang Bawipa kong kha Masidonia le Grik ram leng a phan i Pathian nan zumhnak thawng nih khan khuazakip a cul. Cucaah kan khualtlawnnak kong cu kanmah nih chim a herh ti lo, 9anmah tu nih khan nanmah kan in tlawn hna ah khan zeitindah nan kan conglawmh ti kha an chim ko. 10Pathian taktak a simi Pathian nung biak awk le vancung in a ra laimi a Fapa hngah awkah siasal biaknak in Pathian leiah nan i mer kha an chim i cu a fapa Jesuh cu thihnak in a thawhtermi le a ra liomi Pathian thinhunnak in a kan chanhtu kha a si.

⇑

[Remove Footnotes]