TIMOTE

SIN PAUL CAKUAT PAKHATNAK

1 Timothy

Biahmaiṭhi

Asia Minor rammi Khrihfa tlangval Timote hi a pa cu Grik mi a si i a nu cu Judah mi a si. Paul cu phungchim i a vah lengmangnak ah khan hi pa hi Paul hawikom ah a cang i a hawikom lawng si loin a rianṭuanhawi a hung si. Paul nih Timote ca a kuatmi pakhatnak chungah hin thil biapi a simi pathum kan hmuh:

1. Khrihfabu chung i cawnpiaknak ahmaan lomi kong. Hi cawnpiaknak cu Judah mi ruahnak le Jentail mi ruahnak aa cawhmi a si i hi kan vawlei hi a ṭha hrimhrim lomi vawlei a si i cucaah cun khamhnak hmuh khawhnak ding caah hin hawi hngalh lomi biathli hngalh le ngeih a herh i cu pinah ei le din kong zongah i sum i nupi ṭhit le va ngeih zong ngeih lo ding le ṭhit lo ding a si, ti a si. Hi cawnpiaknak ahmaan loning kha Paul nih hin fiang tein Timote sinah khan a langhter.

2. Khrihfabu chung rianṭuanning le Pathian biakning le Khrihfa upa le hruaitu hna nih zei bantuk ziaza dah an ngeih awk a si ti kha a si.

3. Timote cu Jesuh zummi bu dangdang cungah khan zumh awk tlakmi rianṭuantu na si awk a si, tiah a ti.

Tlangpi hna
Biahmaiṭhi 1.1-2
Khrihfabu chung rianṭuantu hna le Khrihfabu cawnpiaknak 1.33.16
Timote a rian kong a cawnpiakmi 4.16.21

1Timote 1

1Kan Khamhtu Pathian le kan i ruahchanmi Khrih Jesuh nawl in lamkaltu a simi keimah Paul nih.

2Zumhnak i ka fa taktak a simi Timote, ca kan kuat.

Pathian kan Pa le Khrih Jesuh kan Bawipa nih vel lezaangfahnak le daihnak in pe ko seh. *

Cawnpiaknak Hmaanlo Ralrinnak

3Masidonia ram lei ka rak kalpah i ka rak in fial bantuk khan, Efesa khua ah um law ti ka duh. Efesa khua ah khan, cawnpiaknak hmaanlo a cawnpiaktu hna an um i kha hna kha ngolter kho hna law ti ka duh. 4Kha bantuk tuanbia menmen hna le chuahkehnak min sau pipi in an ṭialmi cazin menmen hna kha cu, zeihmanh an si lo caah, hlaw hna u, tiah na rak chimh hna lai; zeicahtiah kha bantuk thil nih khan bia alnak lawnglawng a chuahpi i zumhnak in hngalh khawh a simi Pathian khuakhannak kha zeihmanh a langhter lo. 5Hi bantukin bia kan cah tikah kaa tinhmi cu, a thiangmi lungthin le a thiangmi chiaṭha thleidannak le zumhnak taktak a simi chungin a chuakmi dawtnak kha a si. 6Hi bantuk thil tu hi mi a cheu nih an hlawt riangmang hna i bia i al lengmangnak hruhnak burbuk chungah khan an lut. 7Pathian nawlbia cawnpiaktu saya si cu an duh, sihmanhsehlaw anmah chimmi bia lila kha a sullam an hngal lo i a hngal ngai bantukin an chim lengmangmi thil kong zong kha an hngal taktak fawn lo.

8Nawlbia hi a sining ding bantukin hman a si ahcun a ṭha ko ti kha kan hngalh. 9Sihmanhsehlaw kan hngalh awk cu, nawlbia cu miṭha mi hna caah ser a si lo i nawlbia a buarmi hna le bia ngai duh lomi hna le Pathian zei i a rel lomi hna le misual mi hna le biaknak zei i a rel lomi hna le thlarau lei thil zei i a rel lomi hna le an nu an pa a nawngmi hna le 10nu le pa sualnak a tuahmi hna le nu le pa kong ah ningcanglo in khua a sami hna le minung fir a hmangmi hna le lihchim a hmangmi hna le tehte dinglo a simi hna le cawnpiaknak ahmaanmi he aa tlak lomi thil a tuahmi hna ca tu ah khan tuah a si. 11Ahmaanmi cawnpiaknak cu thanh fial ka simi Thawngṭha chungah khan a um i cu Thawngṭha cu sunparnak le thangṭhatnak in a khatmi Pathian sinin a rami kha a si.

Pathian Zaangfahnak Ca Lawmhnak

12Ka rianṭuannak ah thazang a ka petu kan Bawipa Khrih Jesuh cu ka lawmh. Amah rianṭuantu ah ser awk tlak i a ka ruah caah a cungah kaa lawm. 13Hlanah cun ka rak thangchiat i ka rak hrem i ka rak serhsat, asinain Pathian cu ka cungah zaangfahnak a ngei; cu bantukin ka rak tuah cu amah kha ka rak zumh lo i ka tuahmi cu zeidah a si ti awk ka rak hngalh lo caah a si. * 14Cun kan Bawipa nih cun a tam ngaingaimi a vel kha a toih in a ka toih i Khrih Jesuh he kan i pehtlaihnak thawngin zumhnak le dawtnak kha a ka pek i cu hna cu kanmah ta an si cang. 15Khrih Jesuh cu misual mi hna khamh awkah vawlei ah a rung ṭum, timi hi ahmaanmi le cohlan awk a tlakmi le zumh awk bia a si. Keimah cu an lakah a sual bik ka si ko, 16sihmanhsehlaw hi ruang thengte ah hin Pathian nih ka cung i zaangfahnak a ngeih cu a si. Cu bantukin Pathian nih a ka zaangfah i misual mi hna lak i a sual bikmi keimah cungah Khrih Jesuh nih a lungsaunak le a thinfualnak a langhter cu, hmailei ah a hun zum i cu zumhnak thawngin zungzal nunnak a hmumi hna caah zohchunh awk siseh ti kha a duh caah a si. 17Zungzal in a hmunmi Siangpahrang, thih a thiam lomi le mit in hmuh khawh a si lomi Pathian, Amah lawnglawng Pathian a simi cu, zungzal in zungzal tiang, upatnak le sunparnak, pek si ko seh! Amen.

18Ka fa, Timote, hi bantukin mi va chimhhrinnak ding rian hi na kut chungah ka chiah. Hi ka chiahmi cu nangmah kongah rak chimchungmi bia ning khan a si. Kha bia kha raldohnak hriam ah i hman hna law na zumhnak le na lungthin kha fek tein umter hna. 19Mi a cheu cu an chiaṭha thleidannak kha zeirello in an um tawn caah an zumhnak kha an rawhter tawn. 20Cu hna lakah cun Hymenaias le Alekzandar kha an i tel i annih cu Satan kut chungah ka pek cang hna. Cu nih cun Pathian thangchiat ngol kha a cawnpiak hna lai.

⇑

[Remove Footnotes]